22
Èi loko dènge ajꞌu dhu rèti mamuri
1 Èle ka ana pajuu nèti sorga padꞌelo dènge jaꞌa loko èci, dhu èi ne nèti mamuri. Èi ne mèu aadha-aadha nuka sèmi tèru. Na hae mai nèti kadera paredha Ama Lamatua dènge Ana Kalèbho.✡Yeskial 47:1, Sakaria 14:8 2 Hèia hae laꞌe asa talora aae jꞌara oka-hoo ètu dꞌara kota ne. Nèti sebhe-sebhe loko ne, abhu ajꞌu dhu hua na nèti mamuri. Ajꞌu ne dꞌara ca tèu, hua canguru dua hari; ca hèru, ca tèka. Rèu na bisa jꞌajꞌi èi naꞌi ho puri-paꞌèle suku-suku ètu rai-haha nèti papèdꞌa ra.✡Lii Lolo dhu Uru Tèka 2:9 3 Te ngaa rèngu dhu Ama Lamatua tule eele aa dhoo si, abhu boe ètu dꞌara kota ne. Dhu ètu neꞌe, nuka Ama Lamatua dènge Ana Kalèbho dhu madhèdi ètu dedha kadera paredha, aa dènge ana pua-paleha Ra dhu pahaha iisi mi Rèngu.✡Sakaria 14:11
4 Rèngu aaꞌi-aaꞌi bisa ladhe rèdhi rèhu Ama Lamatua. Ètu katangarèi dhèu seꞌe, dhu suri ngara Lamatua. 5 Mèda abhu boe ètu kota neꞌe. De dhèu unu Lamatua parluu boe madha lodꞌo, do labhu, lula Ama Lamatua ka dhu pasaraa kota ne. Bèli-camèdꞌa rèngu sama-sama rèdꞌu paredha toke dꞌai mia-mia laꞌe.✡Yesaya 60:19, Daniel 7:18
Lamatua Yesus katange lii padhadha Na
6 Ka ana pajuu ne peka dènge jaꞌa, na, “Aaꞌi-aaꞌi dhu jaꞌa peka kore dènge èu seꞌe, lèke tareꞌa-reꞌa. Dhèu aaꞌi-aaꞌi bisa parcaya lii jaꞌa se. Uru èèna, Ama Lamatua pake Roh Na ho peka-padhai Lii Holo-Nori Na mi dhèu rèti lii padhai Na. Te ngaa limuri ne, Na pake ana pajuu Na nèti sorga ho lole mi dhèu unu Na, lula-nèti jꞌara aaꞌi-aaꞌi se dhu nèbhu heka hudꞌi jꞌajꞌi ku.”
7 Hèia Yesus padhai lii, peka na, “Sanèdꞌe paie-iie! Nèbhu heka, te Jaꞌa neo mai. Ètu dꞌara sasuri ne, dhu suri aaꞌi mèu-mèu le, ngaa dhu bèli-camèdꞌa jꞌajꞌi. Dhèu aaꞌi-aaꞌi dhu madhutu isi sasuri ne, pe rèngu abhu aꞌoto.”
8 Dhu suri sasuri ne, nuka jaꞌa, Yohanis. Aaꞌi-aaꞌi se jaꞌa nanene dènge roꞌa dhilu jaꞌa, aa kèdhi dènge musi madha jaꞌa. Ropa tadèngi kore, hèia jaꞌa patitu kètu urutuu ho pahaha iisi ètu madha ana pajuu nèti sorga ne, dhu padꞌelo le aaꞌi-aaꞌi se mi jaꞌa. 9 Te ngaa na kai jaꞌa, peka na, “Ee! Èu baku tao sèmi èèna! Èu dhodhoka pahaha iisi mi Ama Lamatua di! Baku mi jaꞌa ne. Te jaꞌa ne ènu Lamatua kahèi, èci èèna ka dènge èu dènge aꞌari èu dhu jꞌajꞌi dhèu rèti lii padhai Na, aa dènge dhèu leo aaꞌi-aaꞌi ra dhu tao madhutu ngaa dhu suri ètu dꞌara sasuri neꞌe.
10 Èu baku pahuni isi sasuri ne dènge dhèu leo. Te nèbhu heka, aaꞌi-aaꞌi dhu suri ètu dꞌara sasuri ne, hudꞌi jꞌajꞌi ku.
11 Dhèu aaꞌi-aaꞌi dhu adꞌu-ue bhabhelu, na,
hudꞌi rèngu sène ra tao kajꞌalu taruu.
Te ngaa aaꞌi-aaꞌi dhu mamuri mola-mèci,
hudꞌi laa ra mamuri mola taruu.
Dhèu aaꞌi-aaꞌi dhu tao karehe,
hudꞌi rèngu sène ra tao bhelu taruu.
Te ngaa aaꞌi-aaꞌi dhu tao beꞌa,
hudꞌi laa ra tao taruu dhu beꞌa.”✡Daniel 12:10
12 Èle èèna ka, Yesus lii hari, aku Nèngu na, “Sanèdꞌe paie! Te nèbhu heka, Jaꞌa dhiu. Pe Jaꞌa bꞌala hia dhèu aaꞌi-aaꞌi, madhutu ngaa dhu ra adꞌu-ue.✡Yesaya 40:10, 62:11, Lii Sodꞌa Koa-Kio 28:4, Yermia 17:10
13 Jaꞌa ne,
Alpa toke Omega.
Jaꞌa ne,
A toke Z.
Aaꞌi-aaꞌi jꞌajꞌajꞌi ra nèti Jaꞌa,
karèi nèti uru, toke dꞌai èle.✡Rai-haha Rupa Hiu 1:8, Yesaya 44:6, 48:12, Rai-haha Rupa Hiu 1:17, 2:8
14 Dhèu dhu rase pamèu le mèdha-papake ra, rèngu ka dhu oto.
Te rèngu ka abhu hak ho maso re babèdho kapai dhu laꞌe asa dꞌara kota ne.
Dhèu dhu mamuri mola, rèngu ka dhu oto.
Te bèli-camèdꞌa rèngu abhu ijin ho raꞌa hua dhu hia dhèu mamuri taa-taa.✡Lii Lolo dhu Uru Tèka 2:9, 3:22
15 Te ngaa dhèu leo bisa boe maso asa era èèna.
Dhèu dhu unu boe Lamatua, bisa boe pea ètu era èèna.
dhèu dhu tao jꞌara makae dènge dhèu dhu jꞌajꞌi boe dhèu èmu-kamali ra, tuka sogo-tagu,
tuka pamadhe dhèu, tuka suagi,
dènge rèngu dhu leko-monya.
Rèngu aaꞌi-aaꞌi ra bisa boe ara asa dꞌara.
Rèngu aaꞌi-aaꞌi ra pea dhoka mi liꞌu di.
16 Jaꞌa ne, Yesus. Jaꞌa ka dhu paleha ana pajuu Jaꞌa nèti sorga, ho bhoke jꞌara seꞌe aaꞌi-aaꞌi ra, sèna ka pe miu lami lole peka lii pajaji Jaꞌa seꞌe mi pidhu jumaꞌat sèra.
Jaꞌa ne, ana-èpu dhèu aae Daud.
Jaꞌa ne, Dhèu Aae dhu kèdꞌu paredha.
Saraa nèti Jaꞌa heo loꞌa-loꞌa,
nuka sèmi Hua-hètu Oe Mèu.
Saraa nèti Jaꞌa madèka titu kèna,
nuka sèmi hua-hètu èèna.”✡Yesaya 11:1, 10
17 Roh Ama Lamatua mai paroa, peka na, “Mai asa neꞌe!”
Bhèni dhu neo kabꞌi paroa kahèi, peka na, “Mai ka!”
Aaꞌi-aaꞌi dhu tadèngi peka kahèi, “Mai ka!”
Dhèu cee dhu koko-kamango, mai ho minu!
Dhèu cee dhu neo ninu èi dhu nèti mamuri,
mai mere ka!
Dhèu bisa rare èi ne
dhu iia-iia dꞌara.
Dhèu bisa rinu èi ne
dhu bꞌae boe.”✡Yesaya 55:1
Lii moa Yohanis dhu limuri tèka
18 Jaꞌa, Yohanis, pasanèdꞌe dhèu aaꞌi-aaꞌi dhu èèna na tadèngi ngaa dhu Ama Lamatua bhoke mema hia jaꞌa ètu dꞌara sasuri ne: ladhe abhu dhèu dhu patabha hari ngaa-ngaa ètu dꞌara sasuri ne, èèna na Ama Lamatua pabie hari hahuku Na mi nèngu dènge pidhu calaka sèra dhu Na dutu mai asa rai-haha. 19 Aa ladhe abhu dhu pakura hari isi sasuri ne, pe Ama Lamatua tao eele hak nèngu, sèna ka bisa boe maso asa dꞌara kota dhu mola-mèci, aa bisa boe naꞌa hua ajꞌu dhu hia dhèu mamuri taa-taa.✡Lole Hari Jꞌara-jꞌara Mamuri 4:2, 12:32
20 Yesus mesa Na ka dhu bhoke jꞌara aaꞌi-aaꞌi sèra. Na moa le, peka na, “Tareꞌa-reꞌa sèmi èèna! Nèbhu heka, Jaꞌa neo dhiu.”
De mai ka, Lamatua Yesus!
21 Jaꞌa manèngi sèna ka Lamatua Yesus padꞌelo dꞌara hua iia Na mi dhèu unu Na aaꞌi-aaꞌi. Lèke tareꞌa sèmi èèna! Amin!
Nèti jaꞌa,
Yohanis
✡22:1 Yeskial 47:1, Sakaria 14:8
✡22:2 Lii Lolo dhu Uru Tèka 2:9
✡22:3 Sakaria 14:11
✡22:5 Yesaya 60:19, Daniel 7:18
✡22:11 Daniel 12:10
✡22:12 Yesaya 40:10, 62:11, Lii Sodꞌa Koa-Kio 28:4, Yermia 17:10
✡22:13 Rai-haha Rupa Hiu 1:8, Yesaya 44:6, 48:12, Rai-haha Rupa Hiu 1:17, 2:8
✡22:14 Lii Lolo dhu Uru Tèka 2:9, 3:22
*22:15 Alkitab lii Yunani suri, peka na, “busa”. Dhèu Yahudi dꞌèi pakasame dhèu Yahudi boe dènge “busa”. Dhèu seꞌe nuka “dhèu leo dhu parcaya boe Lamatua”. Ètu dꞌara ayat neꞌe, Yohanis padhue lula-nèti rupa-rupa dhèu dhu jꞌajꞌi boe maso asa dꞌara sorga. Risi-risi, nuka “dhèu dhu parcaya boe Lamatua”. Jꞌara neꞌe lai lula boe busa maso sorga, do aadꞌo. Te ngaa peka mi rèngu dhu parcaya boe Lamatua.
✡22:16 Yesaya 11:1, 10
✡22:17 Yesaya 55:1
✡22:19 Lole Hari Jꞌara-jꞌara Mamuri 4:2, 12:32