1 Jesús ki̱saꞌ Capernaum, iwá̱n yajki ipan estado de Judea iwá̱n iyi̱ka̱n we̱ya̱ꞌ Jordán iki̱sáya̱mpa to̱nati̱ꞌ. Ompa sej monejnechko̱lo̱ꞌ, iwá̱n pe̱waꞌ sej tamachtij ken nochipa kitekichi̱wa. 2 Iwá̱n sekin fariseojmej kitechojkej Jesús ka̱nsan makima̱wetzi̱lti̱ka̱n ipan itájto̱l. Kitajtankej siga se̱ ta̱gaꞌ wel kikajte̱wa isiwa̱ꞌ. 3 Jesús kijtoj:

—¿Kén mitztekimakakej Moisés?

4 Yejeme̱n kijtojkej:

—Moisés kijtoj iga se̱ ta̱gaꞌ wel kika̱wa isiwa̱ꞌ, siga kichi̱wiliá se̱ a̱maꞌ ka̱n kijtowa iga momelaꞌkájkeja.

5 Iwá̱n Jesús kijtoj:

—Moisés mitzkajte̱wilijkej inó̱n ley iga poxsan anyo̱ltakuaktikej. 6 Eꞌ kua̱ꞌ pe̱waꞌ, Dios kichij inewi yej onoꞌ, kichij ta̱gaꞌ iwá̱n siwa̱ꞌ. 7 “Inó̱n iga se̱ ta̱gaꞌ, kua̱ꞌ mona̱miktiá, kikajte̱was itaj iwá̱n iye̱ꞌ iga moseka̱ntí̱skeja iwá̱n isiwa̱ꞌ, 8 iwá̱n iyo̱mextimej mochi̱waskej ken se̱san.” Ayoꞌ o̱me̱n, sino que se̱san. 9 Inó̱n iga amo agaj makiyokati yej Dios kise̱tilij.

10 Kua̱ꞌ Jesús iwá̱n idisci̱polojmej onókeja kalijtiꞌ, kitajtankej sej Jesús de inó̱n. 11 Jesús kijtoj:

—Yej kiyokaka̱wa isiwa̱ꞌ, iwá̱n mona̱miktiá iwá̱n seꞌ, iga ijkó̱n kichi̱wa, kichi̱wiliá yej aye̱kti yej áchtopa isiwa̱ꞌ. 12 Ijko̱nsan no̱ siwa̱ꞌ, siga kiyokaka̱wa iwé̱j, iwá̱n mona̱miktiá iwá̱n seꞌ, iga ijkó̱n kichi̱wa, kichi̱wiliá yej aye̱kti yej áchtopa iwé̱j.

13 Iwá̱n Jesús kiwijwi̱guilia̱yaj ko̱kone̱ꞌ iga makitajtanili Dios iga maye̱ꞌonoka̱n. Eꞌ disci̱polojmej pe̱wakej iga kajajwakej ino̱mej yej nemi asij iwá̱n iko̱kone̱ꞌ. 14 Kua̱ꞌ Jesús kitaꞌ iga ijkó̱n nemi kichi̱waj idisci̱polojmej, kuesiwiꞌ, kijtoj:

—Xika̱waka̱n in ko̱kone̱ꞌ, ka̱ma mane̱techo̱ka̱n, amo xikojtzakuili̱ka̱n; iga yej mochi̱wa ken ini̱mej ko̱kone̱ꞌ, kajasi iga Dios marreina̱ro ipan yéj. 15 Nimitznojma‑ijliáj iga yej ayá̱ꞌ mote̱makas iga Dios makimanda̱ro ken se̱ yej aya yo̱lej, awel kalakis ka̱n reina̱rowa Dios.

16 Iwá̱n kinawajkej, iwá̱n kitajtá̱lijpa ima̱ꞌ iga kite̱ne̱wij Dios iga yejemej.

17 Kua̱ꞌ Jesús némiya ojkui, motalojtiwa̱laj se̱ ta̱gaꞌ, iwá̱n motankua̱ketztiki̱saꞌ ite̱noj, iwá̱n kitajtan:

—Tamachtia̱ni yej tiye̱ꞌnemi, ¿té̱ nikchi̱was iga nochipa manono iwá̱n Dios?

18 Jesús kijlij:

—¿Te iga tine‑ijliá iga niye̱ꞌnemi? Sé̱sanwaꞌ in yej kichi̱wa yej ye̱kti, ino̱nwaꞌ Dios. 19 Tej tikmátiya ken Dios tatekimaka: “Yej na̱miktitoꞌ amo mayawi wa̱n seꞌ; amo xitamikti; amo xitachteki; amo xitakajkaya̱wa; amo xikijto yej ayéj ijkó̱n, xikye̱ꞌita motaj iwá̱n moye̱ꞌ.” *10:19 Ex 20:12-16; Dt 5:16-20

20 Ta̱gaꞌ kijtoj:

—Tamachtia̱ni, inewi iní̱n nikchijtoꞌ este kua̱ꞌ aya niyo̱lej.

21 Iwá̱n Jesús kitachi̱lij iwá̱n kiye̱ꞌitaꞌ, iwá̱n kijlij:

—Se̱san mitzpolowa iga xikchí̱: xiknamaka inewi yej tikpiá, iwá̱n xikmajmaka yej ayá̱ꞌ motapialiáj. Ijkó̱n tikpiás yej pox ye̱kti ipan cielo; iwá̱n xine̱toka, malej iga este mamitzmikti̱ka̱n.

22 Kua̱ꞌ ta̱gaꞌ kikaguiꞌ inó̱n, mokno̱matiꞌ, iwá̱n ijkó̱n mokno̱matitiajki iga pox kipiaya tomi̱n.

23 Iwá̱n Jesús ta̱tacháꞌ nij neí, iwá̱n kijlij idisci̱polojmej:

—¡Pox difícil iga yej motapialiáj mamote̱makaka̱n iga Dios marreina̱ro ipan yejeme̱n!

24 Iwá̱n disci̱polojmej poxsan madmira̱dojkej iga ijkó̱n kijtoj Jesús. Eꞌ Jesús sej kijtoj:

—Nopilowa̱n, ¡nimitzijliáj iga se̱ yej moconfia̱rowa ipan itomi̱n, poxsan difícil iga mote̱maka iga Dios marreina̱ro ipan yej! 25 Má̱j wel mapano se̱ camello†10:25 Xikita glosario “Camello”. ipan ixapoyo a̱ko̱xaj, que se̱ yej motapialiá mamote̱maka iga Dios marreina̱ro ipan yéj.

26 Kua̱ꞌ disci̱polojmej kikakikej iní̱n, poxsan madmira̱dojkej, iwá̱n motajtaniáj:

—¿A̱ꞌtaj wel moma̱nawi̱j?

27 Jesús kitachi̱lij idisci̱polojmej, iwá̱n kijtoj:

—Tajta̱gaꞌ awel kichi̱waj, eꞌ Dios wel kichi̱wa; iga Dios ateyi yej ken awel makichi̱wa.

28 Iwá̱n Pedro kijlij:

—NoTe̱ko, nejeme̱n nikajtejkej inewi yej nikpiayaj, iwá̱n némiya nimitztokaj.

29 Iwá̱n Jesús kijtoj:

—Nimitzijliáj, siga agaj kikajte̱wa íkal, o iyikni̱wa̱n, o itaj, o iye̱ꞌ, o isiwa̱ꞌ, o ipilowa̱n, o íta̱l, igasan ne̱tokaj iwá̱n iga kipowaj itájto̱l Dios, 30 nimitzijliáj iga ipan iní̱n ta̱jli yawij kipiatij cien ve̱j má̱j, kajlimej, iyikni̱wa̱n, iye̱mej, ipilowa̱n iwá̱n ita̱lmej, malej iga kijiyaj; iwá̱n ipan seꞌ ta̱jli yej wi̱‑oꞌ nochipa onoskej. 31 Eꞌ miaꞌ yej iná̱n tayaka̱ntokej, yawij ka̱witij tatepotztaj, iwá̱n yej iná̱n onokej tatepotztaj yawij tayaka̱ntotij.

32 Jesús iwá̱n idisci̱polojmej nemi ya̱yaj Jerusalén; Jesús tapano̱tia̱ya. Disci̱polojmej poxsan madmira̱dojkej; iwá̱n sekin kimo̱ka̱tokatia̱yaj. Iwá̱n Jesús kino̱tzaꞌ, iyoka ino̱mej disci̱polojmej, iwá̱n kijlijkej yej yawij kichi̱wili̱tij kua̱ꞌ asis Jerusalén. 33 Kijtoj:

—Ken ankitaj amejeme̱n, nemi tiawij Jerusalén. Ompa nej yej iPiltzi̱n Ta̱gaꞌ, yawij ne̱ki̱tzki̱tij ije̱fejmej sacerdo̱tejmej iwá̱n yej tamachtiáj ipan iley Moisés, yawij kijto̱tij iga mane̱mikti̱ka̱n iwá̱n ne̱ti̱taniskej ipan ima̱mej yej ayéj togé̱ntejpa. 34 Yawij ne̱pi̱najti̱tij, ne̱magaskej, ne̱chijchaskej, iwá̱n ne̱mikti̱skej; eꞌ ipan e̱yi día iga nimikis, nia ni‑ojpa‑isati sej.

35 Jacobo iwá̱n Juan, yej ipilowa̱n Zebedeo, kitechojkej Jesús, iwá̱n kijlijkej:

—Tamachtia̱ni, niknekij iga achi xine̱chi̱wili̱ka̱n yej nimitztajtaniliáj.

36 Yéj kijtoj:

—¿Te̱ ankinekij manikchí̱?

37 Kijtojkej:

—Xikchí̱ iga nejeme̱n, kua̱ꞌ tiaya tirreina̱ro̱ti, manimota̱li̱ka̱n ompa ka̱n tej timota̱li̱j, se̱ moye̱ꞌka̱mpa, sewoꞌ moo̱pochka̱mpa.

38 Jesús kijtoj:

—Amejeme̱n ayá̱ꞌ ankimatij te̱ nemi ankitajtanij. ¿Ix ankijyo̱wi̱skej ken nej nikijyo̱wi̱j kua̱ꞌ ne‑ikno̱chi̱waskej? ¿Ix wel ampano̱skej ka̱n nej nipano̱j?

39 Yejeme̱n kijtojkej:

—Kena, wel.

Jesús kijtoj:

—Kena ankijyo̱wi̱skej inewi sufrimiento ken nej nia nikijyo̱wi̱ti kua̱ꞌ ne‑ikno̱chi̱waskej, iwá̱n ampano̱skej ka̱n nej nipano̱j. 40 Eꞌ iga ximota̱li̱ka̱n noye̱ꞌka̱mpa o noo̱pochka̱mpa, inó̱n nej ayá̱ꞌ nikmati, iga notaj Dios kimati a̱ꞌyéj kimakas.

41 Kua̱ꞌ ino̱mej seꞌ diez disci̱polojmej kimatikej inó̱n, kikuesowilijkej Jacobo iwá̱n Juan. 42 Eꞌ Jesús tano̱tzaꞌ, kijtoj:

—Amejeme̱n ankimatij iga yej manda̱rowaj ipan iní̱n ta̱jli, poxsan kitajtaksa ige̱ntej iwá̱n yej goberna̱rowaj, yo̱lki̱saj pan yej até̱ iteki, ka̱nsan mane̱si iga manda̱rowaj. 43 Eꞌ amejeme̱n ayéj ijkó̱n. Ma̱jwaꞌ yej kineki matayaka̱nto ipan amejeme̱n, inó̱n achto makipale̱wi tokni̱mej. 44 Iwá̱n agaj yej kineki matayaka̱nto, mamochi̱wa esclavo iga nochi tokni̱wa̱n. 45 Iga nej yej iPiltzi̱n Ta̱gaꞌ ayá̱ꞌ niwa̱laj iga mane̱pale̱wi̱ka̱n, sino iga manitapale̱wi iwá̱n iga manimiki iga miaꞌ manikxitoma yej ken ilpitokej iga aye̱kti kichijtokej.

46 Iwá̱n asikej Jericó. Kua̱ꞌ Jesús ki̱stia̱ya ompa iwá̱n idisci̱polojmej iwá̱n poxsan miaꞌ gente, se̱ pacha e̱watoya ipan ojte̱n, kitajtantoya tomi̱n. Ito̱ka̱ꞌ Bartimeo, yej ipíltzi̱mpa Timeo. 47 Kua̱ꞌ kikaguiꞌ iga nemi kitechojtiá Jesús de Nazaret, pacha tzajtziꞌ:

—¡Jesús, iPiltzi̱n David, achi xine‑ikne̱li!

48 Sekin kajajwakej iga ayoꞌ matzajtzito, eꞌ yéj ma̱jya tzajtziꞌ:

—¡Jesús, iPiltzi̱n David, áchikej xine‑ikne̱li!

49 Jesús moketzaꞌ iwá̱n kijtoj:

—Xikno̱tzatij.

Iwá̱n kino̱tzatoj inó̱n pacha, kijlijkej:

—Ximoconfia̱ro iwá̱n ximoketza, iga nemi mitzno̱tza.

50 Iwá̱n inó̱n pacha kitájkal itejkuix, este witó̱niꞌpa iga moketzaꞌ, iwá̱n kitecho̱to Jesús. 51 Jesús kitajtan:

—¿Té̱ tikneki manimitzchi̱wili?

Pacha kijtoj:

—Tamachtia̱ni, ¡nikneki manitachá!

52 Jesús kijtoj:

—Iga timoconfia̱roj, titachaꞌya, welja tia.

Iwá̱n íkua̱ꞌsan inó̱n pacha welja tacháꞌ, iwá̱n kitokatiájkiya Jesús.