14
De hale o David ma ana dama
(2 Sa 5.11-16)
1 Gai Hiram, de hodooligi o Tyre, ne hai hanu dangada gi loomai gi daho David, ma hanu laagau cedar, ma hanu labagau o denga hadu ma laagau, gi hagaduulia de hale o David. 2 Gai David gu donu iho bolo Tagi Maolunga gu hagasula ia gi hodooligi i honga Israel, gai dono nohoanga hodooligi gu hagamaolunga, i hiidinga o ono dangada go de gau Israel.
3 Gai David ne hai bodu ange hogi gi hanu haahine i Jerusalem, ga hagadili ange ai hogi hanu dama daane ma damaa hine. 4 Gai aanei ingoo o ana dama ne hagadili i kilaa: go Shammua, ma Shobab, ma Nathan, ma Solomon, 5 ma Ibhar, ma Elishua, ma Elpelet, 6 ma Nogah, ma Nepheg, ma Japhia, 7 ma Elishama, ma Beeliada, aama Eliphelet.
De hagadee kii a David de gau Philistia
(2 Sa 5.17-25)
8 De masavaa huu a de gau Philistia ne langona ai bolo David gu hagadabu gi hodooligi i Israel, gai denga daane alodahi o Philistia ne loomai e ssala ia. Aagai ga langona huu e David, gai ia ga hano e hebagi ange gi gilaadeu. 9 Gai denga daane Philistia ne loomai ga vaivai hai dangada i de geelonga go Rephaim. 10 Gai David ne ssili ange gi de Maadua, “Ga hano au e hebagi ange gi de gau Philistia? Koe e dugu mai au gi hagadee kii ina gilaadeu?”
Gai Tagi Maolunga ga hai ange gi de ia, “Hannoo, gai au e dugu adu naa goe gi hagadee kii ina gilaadeu.”
11 Gai David ne hano gi Baal Perazim ga hagadee kii ai gilaadeu i kilaa; gai ia ga hagadaba, “De Maadua gu hagadee kii ogu hagadaumee bei dagodo o tolona e oohaa laa ga sao i de baasi laa.” Deelaa ai, de mommee laa gu hagaingoo ange go Baal Perazim.*Baal Perazim i muna Hebrew e bei go de ia aamua e oohaa ga sao gi de baasi laa. 12 Gai de gau Philistia ne tili olaadeu diinonga i kilaa, gai David ga hai ange gi ono daane gilaadeu gi duungia diinonga laa.
13 Gai de gau Philistia ne aahe mai ange hogi ga vaivai hai dangada i lo te geelonga; 14 gai David ne ssili ange gi de Maadua, gai de Maadua ga hai ange gi de ia, “Aude hagasoe gi hano gi olaadeu mada i mua, aagai koe hannoo holiage mai ga hebagi ange ai gi gilaadeu i de baasi laa o denga balsam. 15 Gai de masavaa naa huu aau e langona ai de seesee o dangada i honga denga balsam, gai koe ga daamada de hebagi; go hiidinga de Maadua e hano naa i oo mada i mua ga daa gi maakau denga daane hebagi o Philistia.” 16 Gai David ne hai ga bei muna a de Maadua gu tala ange gi de ia, gai ia ga daa gu maakau denga daane Philistia mai i Gibeon ga dae ai gi Gezer.
17 Gai longo o David gu dele i denga henua alodahi, gai Tagi Maolunga ga hai denga huaahenua alodahi gi maatagu i de ia.