16
1 Gai gilaadeu ne gaamai de ngavesi a de Maadua ga dugu i lo te hale malo a David gu hagaduu laa; gai gilaadeu ga hai denga sigidaumaha dudu ma sigidaumaha hagadanuaa magavaa i mada luu mada o de Maadua. 2 Gai de masavaa a David ne hagalava ai denga sigidaumaha dudu ma sigidaumaha hagadanuaa magavaa, gai ia ga hagamanuuia dangada i de ingoo o Tagi Maolunga. 3 Gai ia ne duha ange dagidahi duudangaa pelaoaa, ma hanu date puli, ma hanu raisin puli gi daane ma haahine alodahi o Israel.
4 Ia ne hili ange hogi hanu daane de aamuli o Levi gi haia hegau i mada i mua o de ngavesi a Tagi Maolunga, gi dalodalo, ma de hagaahe ange de abodonu, aama de tuhi Tagi Maolunga, de Maadua o Israel. 5 Tagi go Asaph, togolua go Zechariah, ma Jeiel, ma Shemiramoth, ma Jehiel, ma Mattithiah, ma Eliab, ma Benaiah, ma Obed-Edom, aama Jeiel. Gilaadeu nei ne hagadangidangi i denga harp ma lyre, gai Asaph ne hagailiili denga cymbal; 6 gai Benaiah ma Jahaziel go luu dangada haimeedabu e ilihia denga hanga manu i masavaa alodahi i mada i mua o de ngavesi o de hagatoo donu hagaheloongoi a de Maadua.
Taahili tuhi a David
(Psa 105.1-15; 96.1-13; 106.1, 47-48)
7 De laangi laa gai David ne hili Asaph ma ono dangada ange laa gi daahili ma de hagaahe ange de abodonu gi Tagi Maolunga:
8 Hagaahea ange de abodonu gi Tagi Maolunga,
dalodalo i dono ingoo;
daalaa dagodo ana hegau i daho denga huaahenua.
9 Daahili ange gi de ia i taahili tuhi,
daalaa dagodo o ana hegau hagalele mouli alodahi.
10 Hagamahamaha ina dono ingoo dabu;
dangada alodahi e saalaa Tagi Maolunga gi malangilangi!
11 Saalaa Tagi Maolunga ma ono mahi;
saalaa ia i masavaa alodahi.
12 Manadua ana hegau hagalele mouli,
ana sauaa ma ana hagamodu gu tala.
13 De aamuli o Israel, dono dangada hai hegau,
de hagadiilinga o Jacob, go dangada aana gu hili.
14 Go ia go Iahweh taadeu Maadua;
ana hagamodu muna e hai ange gi henua i lalo alodahi.
15 Ia e manadua dana hagatoo donu hagaheloongoi ga hano ai,
ma ana muna gu tala, ange gi e mano atangada,
16 go dana hagatoo donu hagaheloongoi ange gi Abraham,
ma dana hagatoo donu ange gi Isaac.*Gen 12.7; 26.3
17 Ia ne hai gi too donu ange gi Jacob de hainga nei,
ma de hai dahi hagatoo donu hagaheloongoi ange gi Israel ga hano ai:*Gen 28.13
18 “Au e gaavadu naa gi de goe de henua go Canaan
e hai ai de mommee oou e henua ai.”
19 De masavaa olaadeu goi sogoisi ai,
e dee dau, gai ni dangada henua gee i de henua laa,
20 gilaadeu ne silivaahea saele i denga huaahenua,
mai i dahi nohoanga hodooligi gi dahi nohoanga hodooligi.
21 Gai ia tee dugu ange dahi gi hagaduasala ina gilaadeu;
ma de hagasee denga hodooligi i olaadeu hiidinga, ga hai ange,*Gen 20.3-7
22 “Goodou e dee poo ange gi gilaadeu aagu gu hagadabu i de lolo,
gai gi dee hagammae ina ogu pelaabisi.”
23 Henua i lalo alodahi, daahili ange gi Tagi Maolunga;
daalaa dagodo o dana hagaola i laangi alodahi.
24 Daalaa dagodo o dono mahamaha i magavaa o denga huaahenua,
ma ana hegau hagalele mouli ange gi dangada alodahi.
25 Tagi Maolunga e maolunga mmao,
gai e heohi taadeu tuhi ia;
gai gi kii ange taadeu maatagu
i de ia i denga maadua alodahi.
26 Go hiidinga maadua alodahi o denga huaahenua ni ngadi diinonga;
aagai go Tagi Maolunga ne haia de langi.
27 De mahamaha ma ssauaa i ono mada i mua;
de mmahi ma de malangilangi i dono mommee noho.
28 Huaabodu o denga huaahenua, goodou daalaa dagodo o Tagi Maolunga,
daalaa dagodo de mahamaha ma de mmahi o Tagi Maolunga.
29 Goodou daalaa dagodo de mahamaha
o de ingoo o Tagi Maolunga.
Goodou gaamai dahi sigidaumaha loomai ai gi mada luoono mada.
Daumaha ange gi Tagi Maolunga
i de mahamaha o dono dabu.
30 Henua i lalo alodahi gi bolebole i ono mada i mua!
Henua i lalo gu hagaduu ma gu makaga,
gai e dee maua naa donu gi baguu.
31 De langi gi malangilangi,
henua i lalo gi lodo danuaa;
gilaadeu gi daalaa i daho denga huaahenua,
“Go Tagi Maolunga e dagina!”
32 Tai ma mee alodahi iai gi hagangolo,
denga duu malaelae ma mee alodahi iai gi malangilangi!
33 Denga manu ssomo i lodo henua gi daahili i de malangilangi
i mada luu mada o Tagi Maolunga,
go hiidinga ia e humai naa
e hagamodu muna o henua i lalo.
34 Hagaahe ange de abodonu gi Tagi Maolunga,
go hiidinga ia e danuaa;
dono abodonu e dee helui ga hano ai.*2 Ch 5.13; 7.3; Ezra 3.11; Psa 100.5; 106.1; 107.1; 118.1; 136.1; Jer 33.11
35 Goodou hagataba,
“De Maadua demaadeu Ia Hagaola;
hagaola ina gimaadeu,
hagabuni ina mai gimaadeu
ma de hagaola mai gimaadeu i denga huaahenua,
gai gimaadeu ga tuhi ai doo ingoo dabu,
ma de hagamahamaha goe i de tuhi.
36 Duuhia Tagi Maolunga, de Maadua o Israel,
mai i de masavaa e dee ngado mai
ga dae ai gi de masavaa e dee ngado mai.”
Gai dangada alodahi ne hagataba, “Amen!” aama de tuhi Tagi Maolunga.
37 Gai David ne dugu Asaph ma ono dangada ange laa i mada i mua o de ngavesi o de hagatoo donu hagaheloongoi a Tagi Maolunga, gai gilaadeu ga hai hegau i kilaa i de laa tubua, i mee gu hagatau ange gi dahi laangi. 38 Ia ne hai hogi Obed-Edom ma ono dangada e dinoono ma dogovalu gi hai hegau madali gilaadeu. Gai go Obed-Edom, tama daane a Jeduthun, aama Hosah e hagaloosia ina de haitoga.
39 Ia ne hai hogi Zadok, tangada haimeedabu, ma de gau haimeedabu ange laa, gi nnoho i gaogao de tabernacle o Tagi Maolunga, i de mommee daumaha i Gibeon, 40 gai gilaadeu ne hai denga sigidaumaha dudu ange gi Tagi Maolunga, i honga de mommee o ssigidaumaha dudu i de laa tubua, i taiao ma de ahiahi, bei de hai gu sisi ai laa i lodo hainga a Tagi Maolunga ne gaavange laa gi de gau Israel. 41 Gai Heman ma Jeduthun ni dangada hogi ne hili ma de daohi olaadeu ingoo, gi hagaahe ange de abodonu gi Tagi Maolunga, “i hiidinga dono abodonu e dagodo ga hano ai.” 42 Heman ma Jeduthun go luu daane e dagina dangada e ilihia denga trumpet ma de hagailiili denga cymbal, ma de hagadangidangi i denga mee hagadangidangi madali denga daahili dabu. Gai denga dama daane a Jeduthun e tuu i gaogao de haitoga o de buibui.
43 Gai dangada alodahi ne aahe gi olaadeu hale, gai David ne ahe hogi gi dono hale ga hagamanuuia dono huaabodu.*2 Sa 6.19-20