4
Denga dagi ma goobenaa
1 Gai Solomon gu hodooligi i Israel alodahi. 2 Gai aanei ingoo o dagi o de henua:
go Azariah, tama daane a Zadok — tangada haimeedabu;
3 Elihoreph ma Ahijah, luu dama daane a Shisha — luu dangada sisi;
Jehoshaphat, tama daane a Ahilud — tangada daohi;
4 Benaiah, tama daane a Jehoiada — tagi o denga daane hebagi;
Zadok ma Abiathar — luu dangada haimeedabu;
5 Azariah, tama daane a Nathan — tagi o denga dagi o de henua;
Zabud, tama daane a Nathan — tangada haimeedabu gai se soa niio de hodooligi;
6 Ahishar — tagi o de hale o de hodooligi;
gai Adoniram, tama daane a Abda — tagi o de gau dee kii e hagahai hegau laa.
7 Gai Solomon ne hili hogi e dinoangahulu ma dogolua goobenaa gi dagina denga vaaenga o Israel alodahi; aanei gilaadeu e gaamai gai a de hodooligi ma dangada i dono hale. Dahi gilaadeu e gaamai denga gai i dahi malama i lo te ngadau. 8 Aanei ingoo o denga goobenaa:
go Ben-Hur, tagi i de mommee iai mounga o Ephraim;
9 ma Ben-Deker, tagi i Makaz, ma Shaalbim, ma Beth Shemesh, ma Elon aama Beth-hanan;
10 ma Ben-Hesed, tagi i Arubboth (niiona hogi Socoh ma mommee alodahi o Hepher);
11 ma Ben-Abinadab, tagi o Naphoth Dor alodahi (ia ne hai bodu ange gi Taphath, dahi damaa hine a Solomon);
12 ma Baana, tama daane a Ahilud, tagi i Taanak, ma Megiddo, ma Beth Shean i gaogao o Zarethan ma lalo o Jezreel, ma mai i Beth Shan gi Abel Meholah, gai e hano gi de baasi laa o Jokmeam;
13 ma Ben-Geber, tagi i Ramoth i Gilead (gai denga aduhale vaaligiligi o Jair, tama daane a Manasseh i Gilead niiona hogi, ma de vaaenga go Argob i Bashan, ma denga aduhale nnui e madaono laa, gai mee e hagamakaga ai olaadeu haitoga e hai bronze);
14 ma Ahinadab, tama daane a Iddo, tagi i Mahanaim;
15 ma Ahimaaz, tagi i de vaaenga o Naphtali (ia ne hai bodu ange hogi gi Basemath, dahi damaa hine a Solomon);
16 ma Baana, tama daane a Hushai, tagi i de vaaenga o Asher, ma Bealoth;
17 ma Jehoshaphat, tama daane a Paruah, tagi i de vaaenga o Issachar;
18 ma Shimei, tama daane a Ela, tagi i de vaaenga o Benjamin;
19 ma Geber, tama daane a Uri, tagi i Gilead (de henua o Sihon de hodooligi o de gau Amor madagidagi, aama Og de hodooligi o Bashan). Go ia donu huu de goobenaa o de vaaenga laa.
De lava ma de heiangi o Solomon
20 Gai gu soa mmao dangada i Judah ma Israel, bei de lagolago gelegele i gaogao tai; gai gilaadeu ne gaimee ma de unu ma de lodo malangilangi. 21 Gai Solomon ne dagi denga nohoanga hodooligi mai i ssaalingaa vai go Euphrates ga dae ai gi de henua o de gau Philistia ma de henua go Egypt. Gai dangada o denga henua laa ne hagao ange taagisese gi Solomon, ma de hai hegau ange gi de ia i taulooloa dono mouli.*Gen 15.18; 2 Ch 9.26
22 Gai de lagolago gai e haangai ai dangada i de hale o Solomon se matolu cor*30 coragu made se 4½ dana; 60 coragu made se 9 dana. pelaoaa lligi, ma e madaono cor pelaoaa pada, 23 ma e madaangahulu kaau pedi, ma e madalua kaau e gaimee laa i de mommee iai helii, ma e lau ssiibi, madali denga dia, ma gazelle, ma roebuck, aama manu llele pedi. 24 Go hiidinga Solomon ne dagi denga hodooligi ma olaadeu henua alodahi i baasi dai ssaalingaa vai go Euphrates, mai i Tiphsah ga dae ai gi Gaza. Gai gu deai hebagi e hai i luu baasi alodahi. 25 Gai Judah ma Israel gu nnoho paba, mai i Dan ga dae ai gi Beersheba; dangada alodahi gu nnoho paba, dahi ma dahi gu noho danuaa i lalo dana grapevine aama lalo dana fig i de masavaa o Solomon e mouli ai.
26 Gai Solomon e haasemada ono mommee e hhao ai ana hoosa ma ono hada hebagi, gai se 12,000 ono daane e saavini i honga hoosa.*1 Ki 10.26; 2 Ch 1.14; 9.25
27 Gai go dagi o denga vaaenga e gaamai gai e gaimee ai dangada alodahi e gaimee i daho de hodooligi go Solomon. Gilaadeu ne hai donu gi odi ange mee alodahi, tagi nei ma de gaamai ana mee i dono malama. 28 Gilaadeu ne gaamai hogi denga barley ma denga helii mmasa, ange gi denga hoosa ma hoosa kemo e daangia laa denga hada, gi delaadeu mommee, dahi ma dahi ne gaamai de hagabaaunga gu gaavange gi de ia.
29 Gai de Maadua ne gaavange gi Solomon de heiangi ma de iloo mee, gai dono donu ange gi mee e dee maua i de tala ono dagodo, bei de lagolago o denga gelegele i gaogao tai. 30 Gai de heiangi o Solomon e dubu ange i heiangi o dangada alodahi i denga henua i de baasi i dua, gai e hano laa honga de heiangi alodahi o Egypt. 31 Ia e heiangi ange i de gau ange laa; ia e kii ange i Etham, taane Ezrah, ma Heman, ma Calcol, ma Darda, dama daane a Mahol. Gai ono longo gu dele i denga huaahenua alodahi ange laa. 32 Ia ne tala hogi e dolumano muna heiangi, gai ana daahili ne hadu se 1,005.*Pro 1.1; 10.1; 25.1; Sng 1.1 33 Ia ne tala dagodo o denga manu ssomo, mai de cedar i Lebanon, ga dae ai gi de hyssop e somo laa i magavaa hadu o de buibui. Ia ne tala hogi dagodo o denga manu dolodolo, ma manu llele, ma manu bei labodo, aama denga mamu. 34 Gai dangada mai i denga henua ange laa ne loomai e hagallongo de heiangi o Solomon, aama dangada mai i daho denga hodooligi alodahi o henua i lalo, i hiidinga delaadeu langona dagodo o dono heiangi.