3
De hagaduu a Solomon de temple
(1 Ki 6.1-38)
1 Dua mee nei gai Solomon ne daamada de hagaduu age de hale o Tagi Maolunga i Jerusalem, i honga de mounga go Moriah, de mommee o Tagi Maolunga ne hakide ange ai laa gi dono damana go David, go de mommee a David gu hagailonga i de mommee hili huamanu o Araunah*Araunah: de Beebaa Hebrew e hai ange go Ornan, go dahi ingoo ange o Araunah. taane Jebus.*Gen 22.22 2 Ia ne daamada de hagaduu i de lua malama o de haa ngadau oona ne hodooligi ai.
3 Aanei haidenga ne gaavange gi Solomon e hagaduu ai de hale o de Maadua: e madaono sugilima de looloa, gai e madalua sugilima de lahalaha (ia ne haide i de haidenga i mua). 4 De velanda i ma te hale e madalua sugilima de looloa, bei de lahalaha o de hale, gai se madalua sugilima tuuduu.
Gai ia ne haoli ono lodo i goolo hagamogomogo. 5 Ia ne haoli lo te aabi e mua gi daha i laagau cypress, ga haoli i goolo hagamogomogo, ma de hagalaagii i denga palm ma seeini ga hagalaagii. 6 Ia ne hagalaagii lo te hale i denga hadu hagamogomogo ma goolo mai i Parvaim. 7 Ia ne haoli denga dogai, ma laagau o de haitoga, ma lo te hale, ma ono abaaba i goolo, ma de maaga ange denga cherubim gi luu baasi i lodo.
8 Ia ne hai de Aabi Dabu mmao gi looloa bei de lahalaha o de hale; se madalua sugilima de looloa ma de lahalaha. Gai ia ne haoli laa lodo i e onolau talent†600 talente bei se 23 dana. goolo hagamogomogo. 9 Gai taemaha o goolo ne hai ai denga neele se madalima shekel.‡50 shekele bei se 1¼ pauni. Ia ne haoli hogi lodo aabi e mua gi lunga i goolo.
10 Gai lo te Aabi Dabu mmao laa iai e lua cherubim ne hagaduu i denga laagau ga haoli i goolo.*Exo 25.18-20 11 Bakau o luu cherubim laa ngaadahi se madalua sugilima. De bakau o dahi cherub laa se lima sugilima, gai e hano ma e duu ange gi de baasi de hale, gai de bakau ange laa e hano ma e duu ange gi dahi bakau o cherub ange laa; 12 de bakau o de cherub ange laa se lima hogi sugilima de looloa, gai e hano ma e duu ange gi de baasi de hale, dono bakau ange laa se lima hogi sugilima, gai e hano ma e duu ange gi dahi bakau o cherub ange laa. 13 Bakau o luu cherubim laa ngaadahi se madalua sugilima i de doha gi daha. Luu cherubim laa e tuu ma e huuhuli ange gi de aabi laumalie o de hale.
14 Ia ne hai hogi dahi malo buibui i malo buluu ma de purple ma de mmea, aama linen danuaa, ga maaga ange hanu cherubim aagena.*Exo 26.31
Luu duludulu bronze
(1 Ki 7.15-22)
15 Ia ne hai hogi e lua duludulu ga hagatuu i ma te hale, dahi duludulu laa se matolu ma lima sugilima tuuduu, gai de mee hagalaagii i ulu o dahi duludulu laa se lima sugilima. 16 Ia ne hai hogi e lua seeini ga dau ange gi honga mee i ulu luu duludulu laa, e lau pomegranate ne hagabigibigi ange gi luu seeini laa. 17 Gai ia ne hagatuu age luu duludulu laa i ma te haitoga o de temple, dahi i baasi ngaage gai dahi i baasi ngaiho. De ingoo o tuludulu i baasi ngaage go Jakin,§Jakin i muna Hebrew e bei ia e hagaduu gi makaga. gai de ingoo o tuludulu i baasi ngaiho go Boaz.*Boaz i muna Hebrew e bei ia e mmahi.