4
Goloa ange gi de temple
(1 Ki 7.23-51)
1 Ia ne hagaduu dahi mommee o ssigidaumaha i bronze, se madalua sugilima de looloa, gai e madalua sugilima de lahalaha, gai se madaangahulu sugilima tuuduu.*Exo 27.1-2 2 Ia ne hagavaivai hogi hanu baalanga ga hai ai dahi daaba moe; se madaangahulu sugilima mai i de hiihii i dahi baasi gi de hiihii i de baasi gee, gai se lima sugilima tuuduu. Gai de haidenga o taaba laa ga holiage ai se matolu sugilima. 3 Gai lalo de hiihii o taaba laa e maaga ange ada o hanu kaau ma e holiage ai, gai e madaangahulu kaau ange gi dahi sugilima. Gai e lua hagataaunga o denga kaau laa e maaga ange gi taaba laa.
4 Gai taaba laa e duu i honga e madaangahulu ma lua kaau, e dolu e huuhuli gi ngaiho, e dolu e huuhuli gi dai, e dolu e huuhuli gi ngaage, gai e dolu e huuhuli gi dua. Taaba e duu i olaadeu elunga, gai muli o denga manu laa i lalo taaba. 5 Gai de maadolu o taaba laa se dahi ianga; de hiihii e bei de hiihii o de ubu, gai e bei hogi de huaala o de lilii. Gai se dolumano bath*3,000 bathagu made se 15,000 gaalene. e hhao ai.
6 Ia ne hai hogi e madaangahulu beisini nnui e hagagilimalali ai, ga dugu e lima i de baasi madau, gai e lima i de baasi masui. Gai go lodo beisini nei e hagagilimalali ai mee e hai ai ssigidaumaha dudu, gai taaba laa se mee e hagagilimalali ai de gau haimeedabu.*Exo 30.17-21
7 Ia ne hai hogi e madaangahulu mee dugu laama i goolo bei de hai gu hagaago ange ai laa, ga hagatuu i lo te temple, e lima i de baasi madau, gai e lima i de baasi masui.*Exo 25.23-40
8 E madaangahulu hogi ana deebele ne hai ga dugu i lo te temple, e lima i de baasi madau, gai e lima i de baasi masui. Ia ne hai hogi e lau beisini i goolo.
9 Ia ne hai hogi dahi mommee buibui moo de gau haimeedabu, ma dahi mommee buibui laumalie ma ono haitoga, ga haoli olaadeu abaaba i denga bronze. 10 Gai ia ne hagaduu taaba laa i tege gi ngaage i de bido gi dua.
11 Huram ne hai hogi denga anibada, ma savolo, aama beisini.
Ia ne hai ga lava hegau alodahi a de hodooligi go Solomon ne lodo ia gi haia ange gi de hale o de Maadua:
12 luu duludulu laa;
mee be ni boolo i ulu luu duludulu laa;
luu gaini e hagalaagii ai laa luu mee be ni boolo i denga duludulu;
13 de haalau pomegranate ange gi gaini e lua laa (e lua hagataaunga i dahi gaini, e hagalaagii ai denga mee be ni boolo i ulu luu duludulu laa);
14 denga hada ma denga beisini;
15 taaba, ma de madaangahulu ma lua kaau i ono lalo laa;
16 denga anibada, ma savolo, ma poogo, ma goloa alodahi.
Goloa alodahi a Huram-Abi ne hai maa de hodooligi go Solomon ange gi de hale o Tagi Maolunga, ne hai i bronze hagamalamalama. 17 Gai de hodooligi ne hagavaivai denga bronze, ga hai ai mee laa alodahi i de geelonga i gaogao Jordan, se mommee iai bela pigi i magavaa o Succoth ma Zeredah. 18 Solomon ne hai ga lagolago mmao mee nei, deelaa ai, taemaha o denga bronze ne hai ai mee laa tee maua donu gi iloo.
19 Gai Solomon ne hai hogi goloa alodahi i lo te hale o de Maadua:
go de mommee o ssigidaumaha goolo;
denga deebele e dugu ai pelaoaa i Mada Luoono Mada;
20 denga mee dugu laama ma olaadeu laama i goolo danuaa, e haula ai gi ula i mada i mua o de aabi e mua gi lodo, bei de hai gu tala ange ai;
21 denga huaala, ma laama, ma igohi ne hai i goolo hagamogomogo;
22 denga mee diinei laama, ma beisini, ma gumedi o mee maanongi, ma mee e hhao ai maga ahi ne hai hogi i goolo hagamogomogo; denga abaaba o de Aabi Dabu mmao, ma abaaba o de aabi e mua gi daha ne hai hogi i goolo.