8
E hanu ange hegau a Solomon
(1 Ki 9.10-28)
1 Gai ga odi huu de madalua ngadau a Solomon ne hagaduu ai laa de hale o Tagi Maolunga aama dono hale donu, 2 gai Solomon ne hagaahe age denga aduhale a Hiram ne gaavange laa gi de ia, ga hai hanu dangada gi hulo gi nnoho ai. 3 Gai Solomon ne hano hogi ga hagadee kii ma de kave Hamath Zobah. 4 Ia ne hagaduu hogi Tadmor e duu laa i de vao aama denga aduhale doange alodahi aana ne hagatuu i Hamath. 5 Ia ne hagaahe age hogi Beth Horon e mua gi lunga, ma Beth Horon e mua gi lalo ga buibui, aama de gaavange olaau haitoga ma mee e hagamakaga ai, 6 ma Baalath, ma denga aduhale doange alodahi, ma aduhale alodahi e dugu ai ono hada hebagi ma ana hoosa, ma mommee alodahi aana ne lodo e hagatuu i Jerusalem, ma Lebanon, aama mommee alodahi oona e hodooligi ai.
7 Gai de gau Amor e doe, ma de gau Heth, ma de gau Perez, ma de gau Hiv, aama de gau Jebus, (de gau nei e dee ni dangada Israel), 8 gai olaadeu hagadiilinga goi nnoho huu i honga de henua, go hiidinga de gau Israel tee maua i de daa gilaadeu gi odi — aanei dangada a Solomon ne hagahai hegau hagaduasala, ga dae mai ai gi anailaa nei. 9 Gai Solomon tee hagahai hegau hagaduasala de gau Israel, aagai ia ne hai gilaadeu gi ni daane hebagi, ma dagi o denga daane hebagi, ma dagi o ono hada hebagi ma daane e kage i honga hoosa. 10 Hanu gilaadeu ne hai hogi gi dagina dangada e hai hegau ange gi de hodooligi go Solomon; se 250 gilaadeu e dagina denga daane.
11 Solomon ne gaamai hogi tamaa hine a Pharaoh i de aduhale o David, gi noho i de hale aana ne hagaduu ange laa e noho ai ia, go hiidinga ia ne hagadaba, “Dogu bodu e dee noho i de hale o David, de hodooligi o Israel, go hiidinga mommee o de ngavesi a Tagi Maolunga gu ulu aagena e dabu.”
12 Gai Solomon ne hai denga sigidaumaha dudu ange gi Tagi Maolunga i honga de mommee o ssigidaumaha aana ne hagaduu laa i mada i mua o de temple, 13 gai ia ne hai denga sigidaumaha i dahi laangi, bei de hai a Moses gu hagamodu ange ai laa gi denga laangi Sabbath, ma taonga o de duu de maasina i dai, aama ange gi denga daonga e dolu i lo te ngadau — go Taonga o Pelaoaa Dee Hagahua, ma Taonga o denga Uvigi, aama Taonga o denga Baasi Hale. 14 Ia ne hili hogi denga hagabuulinga o de gau haimeedabu gi haia alaadeu hegau, bei dagodo muna a dono damana go David, gai denga daane de aamuli o Levi gi haia denga daahili, ma de bale ange de gau haimeedabu i hegau e hai i de laa tubua. Ia ne hili hogi denga hagabuulinga e hagaloosi ina denga haitoga, go hiidinga deelaa de hai a David taane o de Maadua gu tala ange ai. 15 Gai gilaadeu tee hai gee donu mee a de hodooligi gu tala ange gi de gau haimeedabu, ma ange gi denga daane de aamuli o Levi, aama de hai e hai ai denga mommee doange.
16 Gai gu lava hegau alodahi a Solomon ne hai, mai i de laangi ne hagadagodo ai tagelo o de hale o Tagi Maolunga ga dae ai gi de lava. Gai de hale o Tagi Maolunga gu lava.
17 Gai Solomon ne hano gi Ezion Geber ma Elath, i tagudai o Edom. 18 Gai Hiram ne hai gi loomai ono vaga ma ono daane hai moni, ma denga daane iloo dagodo o de moana. Gai gilaadeu ne hulo madali denga daane o Solomon gi Ophir, ga gaamai ai e 450 talent*450 talente bei se 17 dana. goolo ga gaavange gi de hodooligi go Solomon.