20
De magi ma de ieiangi o Hezekiah
(Isa 38.1-8, 21-22; 2 Ch 32.24-26)
1 De masavaa laa gai Hezekiah ne magi ga dai magau. Gai de pelaabisi go Isaiah, tama daane a Amoz ne humai gi ono daha, ga hai ange, “E hagadaba Tagi Maolunga: Hagadabena ina mee i doo hale, go hiidinga koe e dee ieiangi naa donu gai e magau.”
2 Gai Hezekiah ga dige ga huli ange gi de baasi o de hale, ga dalodalo ange gi Tagi Maolunga, ga hai ange, 3 “Tagi Maolunga, au e dangidangi adu koe gi manadua bolo au ne hai hegau adu gi de goe i de muna abodonu i ogu lodo alodahi, ma de hai hegau i de heohi i mada luoo mada.” Gai Hezekiah ne kona mmao dono dangi.
4 Gai i mua de sao o Isaiah gi tua de buibui o de hale, gai Tagi Maolunga ga hagaago ange ana muna gi de ia, ga hai ange, 5 “Ahe hai ange gi Hezekiah tagi o ogu dangada, ‘E hagadaba Tagi Maolunga, de Maadua o doo dubuna go David: Au gu langona dau dalodalo, gai au gu gidee oo loimada. Tilo, au e hagaieiangi donu goe. Dua naa huu e dolu laangi gai koe e hano naa gi de hale o Tagi Maolunga. 6 Au e dugu adu naa goe gi mouli i e madaangahulu ma lima ange ngadau. Au e hagaola naa goe ma de aduhale nei mai i de hodooligi o Assyria, gai au e buibui naa de aduhale nei i hiidinga o dogu ingoo, aama hiidinga o dogu dangada hai hegau go David.’ ”
7 Isaiah ga hai ange, “Haia hanu fig ga hulu ange gi dono hagahoa, gi ieiangi ai ia.”
8 Gai Hezekiah ne hai ange gi Isaiah, “Dee hee de hagailonga e hagadonu ai bolo Tagi Maolunga e hagaieiangi au, gai au e maua i de hano gi de hale o Tagi Maolunga i dua e dolu laangi?”
9 Isaiah ne hai ange, “Deenei de hagailonga mai i daho Tagi Maolunga e hagadonu ai bolo Tagi Maolunga e hai naa donu gi bei dana hagatoo donu: koe e lodo de goohunga o de laa i honga de gaagenga gi ngalue adu gi mua i honga e madaangahulu vae o de gaagenga laa, aabe gi ngalue dua i honga e madaangahulu vae gaagenga?”
10 Hezekiah ne hai ange, “Se mee hai ngaohie donu de hai gi ngalue adu ange de goohunga o de laa gi honga e madaangahulu vae gaagenga. Deenei ai, haia gi ngalue dua i honga e madaangahulu vae gaagenga.”
11 Gai de pelaabisi go Isaiah ne dalodalo ange gi Tagi Maolunga, gai Tagi Maolunga ga hai de goohunga o de laa gi ahe dua i honga e madaangahulu vae gaagenga, i honga de gaagenga o Ahaz.
De gau sui mai i Babylon
(Isa 39.1-8)
12 De masavaa laa gai Merodak-Baladan, tama daane a Baladan, de hodooligi o Babylon, ne gaamai hanu leda ma dahi mee ngadi gaavange gi Hezekiah, go hiidinga ia gu langona bolo ia nogo magi. 13 Gai Hezekiah ga abodonu ange gi gilaadeu, ga hagaago ange gi gilaadeu mee alodahi i lodo ono hale doange goloa: go selevaa, ma goolo, ma mee manongi, ma lolo danuaa, ma dono mommee doange goloa hebagi, go mee alodahi i lodo ono hale doange. Teai donu se mee i dono hale aabe go dono nohoanga hodooligi a Hezekiah tee hagaago ange gi gilaadeu.
14 Dua mee laa gai de pelaabisi go Isaiah ne humai gi daho de hodooligi go Hezekiah, ga hai ange gi de ia, “Aahee muna a denga daane laa ne hai adu gi de goe? Gai go hee olaadeu ne loomai ai laa?”
Gai Hezekiah ga hai ange, “Gilaadeu ne loomai i dahi henua mmao, go de henua go Babylon.”
15 Isaiah ne ssili ange, “Gai ni aha alaadeu ne gidee laa i doo hale?”
Gai Hezekiah ne hai ange, “Gilaadeu ne gidee mee alodahi i dogu hale; teai donu se mee daudahi i lodo ogu mommee doange, aagu tee hagaago ange gi gilaadeu.”
16 Gai Isaiah ga hai ange gi Hezekiah, “Noho mai hagalaangona muna a Tagi Maolunga: 17 Tilo, dahi laangi naa huu gai mee alodahi i doo hale, ma goloa alodahi a oo dubuna ne hagabudu laa ga doange ga dae mai ai gi anailaa nei, e moolia naa ga gaavee gi Babylon. Gai e deai naa donu se mee daudahi e doe, go Tagi Maolunga e hagadaba.*2 Ki 24.13; 2 Ch 36.10 18 Gai hanu au dama daane ne hagadili e gaavee naa hogi, ga hai ai denga eunuch i de hale o de hodooligi o Babylon.” *2 Ki 24.14-15; Dan 1.1-7
19 Gai Hezekiah ga hai ange gi Isaiah, “Muna a Tagi Maolunga aau gu tala mai naa e danuaa donu.” Go hiidinga Hezekiah ne maanadu, “E dee beaha donu, noo au e noho baba i de masavaa oogu e mouli ai.”
De magau o Hezekiah
(2 Ch 32.32-33)
20 Gai hegau a Hezekiah ange laa ma dono mmahi, ma dana mommee hhao vai ne hai, ma dana mommee ne hhoa i lodo hadu ga hagasahu mai ai denga vai gi lo te aduhale, gu sisi i lo te beebaa e daohi ai laa hegau a denga hodooligi o Judah. 21 Gai Hezekiah ne magau bei ono dubuna, gai dana dama daane go Manasseh ga sui ia ga hodooligi ai.