21
De hodooligi o Manasseh i Judah
(2 Ch 33.1-20)
1 Manasseh gu madaangahulu ma lua ono ngadau i de masavaa oona ne dae ange ai ga hodooligi, gai ia ne hodooligi i e madalima ma lima ngadau i Jerusalem. Gai de ingoo o dono dinana go Hephzibah. 2 Gai ia ne hai de baubau i mada luu mada o Tagi Maolunga, ia ne ago ange i dahulinga hakino gee a denga huaahenua a Tagi Maolunga ne hai laa gi hulo gee mai i daho de gau Israel.*Jer 15.4 3 Ia ne hagatuu age ange denga mommee daumaha, a dono damana go Hezekiah gu oha laa; ia ne hagatuu age hogi hanu mommee o ssigidaumaha o Baal, ma dahi duludulu laagau o Asherah, bei dagodo hegau a Ahab, de hodooligi o Israel. Ia ne ino ma de daumaha ange gi denga heduu alodahi i lo te langi. 4 Ia ne hagatuu hogi hanu mommee o ssigidaumaha ⌊ange gi denga diinonga⌋ i lo te hale o Tagi Maolunga, go de mommee a Tagi Maolunga gu hai ange laa, “Jerusalem go de mommee e dugu ai dogu ingoo.” *2 Sa 7.13 5 Gai ia ne hagatuu denga mommee o ssigidaumaha ange gi denga heduu alodahi i lo te langi, i lo te buibui o de hale o Tagi Maolunga. 6 Ia ne dudu dana dama daane i lo te ahi, ga hai ai ssigidaumaha, ia ne hai denga huuhuaa mee, ma de tala mee e loomai, ma de ssala de bale i daho denga hilohilo ma eidu, ma denga hagasaalunga o de gau maakau. Gai ne lagolago donu ana hegau baubau ne hai i mada luu mada o Tagi Maolunga ga hai ai ia ga lili.
7 Ia ne kave hogi tuludulu laagau o Asherah aana ne hai laa ga hagaduu i lo te temple, go de mommee a Tagi Maolunga gu hai ange laa gi David ma dana dama go Solomon, “Go de hale nei ma Jerusalem aagu gu hili i mommee alodahi o aamuli o de gau Israel, e hagadubu ai dogu ingoo ga hano ai.*1 Ki 9.3-5; 2 Ch 7.12-18 8 Gai au e dee ahe ange naa donu e hai de gau Israel gi hulo gee mai i de henua aagu gu gaavange gi olaadeu dubuna madagidagi, noo gilaadeu e kana ange ga daudali i mee alodahi aagu gu tala ange gi gilaadeu, ma de daohi hainga alodahi a dogu dangada hai hegau go Moses gu gaavange gi gilaadeu.” 9 Aagai gilaadeu tee hagallongo ange gi ana muna; Manasseh ne dagi gilaadeu gi haia denga dahulinga baubau, e kii ange laa de baubau i dahulinga a denga huaahenua a Tagi Maolunga ne hai laa gi hulo gee mai i daho de gau Israel.
10 Gai Tagi Maolunga ne hagadaba i daho ono dangada hai hegau go denga pelaabisi, 11 “Go hiidinga Manasseh, de hodooligi o Judah, gu hai denga dahulinga hakino gee nei, ni dahulinga e kii ange de baubau i dahulinga a de gau Amor, nogo nnoho laa i de henua nei i mua; ia ne hai hogi dangada o Judah gi daumaha ange gi denga diinonga aana ne hai, 12 deelaa ai, Tagi Maolunga, de Maadua o Israel, gu hagadaba: Au e hai naa gi humai dahi hai ngadaa laumalie gi Jerusalem ma Judah, gai dangada alodahi e langona mee nei e lele mouli naa. 13 Gai au e haide naa Jerusalem i de uga haide aagu ne haide ai laa Samaria, aama de huaabodu o Ahab. Au e ssolo naa Jerusalem gi bei de hai e ssolo ai laa gi deai mee i dahi gumedi; au e ssolo gi odi mee iai ga huli gi lalo. 14 Gai au e tili naa dangada e doe i ogu dangada, ma de dugu ange olaadeu hagadaumee gi hagadee kii ina gilaadeu. Gilaadeu e hagadee kii ina naa ga gaavee gee bei dagodo o denga goloa e maua i de hebagi, 15 go hiidinga gilaadeu gu hai denga dahulinga baubau i mada luoogu mada ma gu hagadaemaha ai au, mai i de masavaa o olaadeu dubuna madagidagi ne ssao mai ai i Egypt, ga dae mai ai gi anailaa nei.”
16 Gai Manasseh ne soa hogi dangada tigi haisala aana ne daa ga maakau, ma de hai ga dohu Jerusalem alodahi i olaadeu dodo; gai e dee deenei donu huu, gai ia ne hai hogi dangada i Judah gi haia de baubau, ga hagahaisala ai gilaadeu i mada luu mada o Tagi Maolunga.
17 Gai hegau a Manasseh ange laa, ma mee alodahi aana ne hai, aama ana hegau baubau alodahi, e sisi i lo te beebaa e daohi ai laa hegau a denga hodooligi o Judah. 18 Gai Manasseh ne magau bei ono dubuna madagidagi ga danu i lo te veelenga o dono hale, go de veelenga a Uzza. Gai dana dama daane go Amon ga sui ia ga hodooligi ai.
De hodooligi o Amon i Judah
(2 Ch 33.21-25)
19 Amon gu madalua ma lua ono ngadau i de masavaa oona ne dae ange ai ga hodooligi, gai ia ne hodooligi i e lua ngadau i Jerusalem. Gai de ingoo o dono dinana go Meshullemeth, tamaa hine a Haruz, taane Jotbah. 20 Gai ia ne hai de baubau i mada luu mada o Tagi Maolunga, bei hegau a dono damana go Manasseh. 21 Ia ne ago ange i dahulinga a dono damana ne hai, ga daumaha ange gi denga diinonga o dono damana ne hai hegau ange laa aagena aama de daumaha ange gi gilaadeu. 22 Ia ne tili Tagi Maolunga, de Maadua o ono dubuna madagidagi, ia tee daudali i lodo o Tagi Maolunga.
23 Gai de gau hai hegau o Amon ne buni, bolo e hai baasi ange gi de ia, gai gilaadeu ga daa de hodooligi gu magau i dono hale. 24 Gai dangada o de henua ga daa gu maakau gilaadeu alodahi ne hai baasi ange laa gi de hodooligi go Amon. Gai gilaadeu ga hai dana dama daane go Josiah gi suuia ia gi hodooligi ai.
25 Gai hegau a Amon ange laa ma ana mee ne hai, e sisi i lo te beebaa e daohi ai laa hegau a denga hodooligi o Judah. 26 Gai ia ne danu i dana daanunga i lo te veelenga a Uzza. Gai dana dama daane go Josiah ga sui ia ga hodooligi ai.