De Lua Beebaa go
Samuel
Hanu dagodo o de beebaa nei
De Lua Beebaa go Samuel e duudagi mai i de mommee ne odi ai Tahi Beebaa go Samuel. E dee iloo danuaa be goai ne siia de beebaa nei. E hanu hogi muna a Nathan ma Gad e sisi ai (1 Chronicles 29.29). Gai ne sisi i daha de 930 b.c., i dua de masavaa o David nogo hodooligi ai.
De beebaa nei e sisi ai taalanga o de nohoanga hodooligi o David. De mada e 1-4 e tala taamada dono hodooligi i Judah, go de mommee i de bido gi ngaage o de henua. De mada e 5-24 e tala dagodo o dono hodooligi i honga de huaahenua alodahi, e bei ia gu hodooligi hogi i Israel, go de mommee i de bido gi ngaiho o de henua. Gai de masavaa aana ne daamada ai de hagalaumalie dono nohoanga hodooligi, ma de hai gi hagapuni luu vaaenga o de henua, gai ia ne hebagi ange i ono hagadaumee i de henua aama ono hagadaumee i denga henua gee. David se daane mmahi dono gai, gai e hagadubu de Maadua. Ia ne maua hogi i de hai ono dangada gi daudali ange i de ia. Aagai ne hanu donu hogi masavaa oona ne hai hegau vaivai dagodo ai. Ia ne hai de baubau gi maua ai e ia ono mee e lodo ai. Aagai de masavaa huu a Tagi Maolunga ne hagaago ange ai ono haisala, i daho de pelaabisi go Nathan, gai ia ga tala ono haisala ga kave dono hagaduasala mai i daho de Maadua.
De gau Israel ne kona delaadeu tuhi de mouli ma hegau a David, deelaa ai, de masavaa huu o de henua ne duasala ai, gai dangada gu llodo ange i dahi hodooligi, gai gilaadeu ne llodo i dahi hagadiilinga o David, e bei laa ono dagodo.
Dahi gubu hagamogomogo: “Gai David gu donu iho bolo Tagi Maolunga gu hili ange ia gi hodooligi i Israel, ma de hai gi maolunga dono nohoanga hodooligi, i hiidinga o ono dangada go de gau Israel” (5.12).
Denga vaevaaenga
De hodooligi o David i Judah (1.1—4.12)
De hodooligi o David i Israel alodahi (5.1—24.25)
a. Ngadau i taamada (5.1—10.19)
b. David ma Bathsheba (11.1—12.25)
c. Denga hai ngadaa (12.26—20.26)
d. Denga ngadau i muli mai (21.1—24.25)
1
De maakau o Saul ma Jonathan
1 Dua de magau o Saul, gai David gu ahe mai i dono hano ga daa de gau Amalek, gai ia ne noho i Ziklag i e lua laangi. 2 Gai ga dolu huu laangi i dua mee laa, gai tilo, dahi daane mai i de mommee nnoho gainga o Saul ne savini mai gi daho David, ia gu ssae ono malo ma de gaavange gelegele gi honga dono biho. De masavaa oona ne humai gi daho David, gai ia ne hagabaguu gi honga de gelegele ga hagadubu David.
3 Gai David ne ssili ange gi de ia, “Go hee oou ne humai ai naa?”
Ia ga hai ange gi de ia, “Au ne savini mai i de mommee nnoho gaainga o de gau Israel.”
4 Gai David ne ssili ange gi de ia, “Daalaa mai, aahee dagodo o de hebagi?”
Taane laa ne hai ange, “Denga daane gu saavini ma gu hulo gee mai i de hebagi. Gai gu soa daane ne maakau, gai a Saul ma dana dama go Jonathan gu maakau hogi.”
5 Gai David ne ssili ange gi tama daane ne gaamai laa de longo gi de ia, “Dee hee dau hai ne iloo ai bolo a Saul ma dana dama go Jonathan gu maakau?”
6 Tama daane laa ne tala ange gi de ia, ga hai ange, “Au nogo i honga de mounga go Gilboa, gai au ne gidee a Saul gu baguu ange gi honga dono dao, gai denga hada hebagi ma gilaadeu e saavini gu paa mai donu gi dono mommee iai laa.*1 Sa 31.1-6; 1 Ch 10.1-6 7 Gai ia ne gidee au i de masavaa oona ne huli dua ai, gai ia ga hagahi mai au. Gai au ga hai ange, ‘Deenei au.’ 8 Gai ia ne ssili mai gi de au, ‘Go koe goai?’ Gai au ne hai ange gi de ia, ‘Au se daane Amalek.’ 9 Gai ia ne hai mai gi de au, ‘Humai i kinei daia ai au gi magau! Go hiidinga au gu kona mmao dogu duasala, gai au goi mouli huu.’ 10 Gai au ga hano ga daa ia gu magau, go hiidinga au gu iloo bolo ia e dee maua naa donu gi mouli. Gai au ne kave de hau hodooligi i honga dono biho ma dono mee ulumagi lima, ga gaamai madali au e gaavadu gi de goe, dogu dangada aamua.”
11 Gai David ga ssae ono malo, gai denga daane madali ia ga saesae hogi olaadeu malo. 12 Gai gilaadeu ne hinangalosaa ma de tangi ma de hagahiikai ga dae ai gi de ahiahi, i hiidinga o Saul ma Jonathan dana dama, ma hiidinga o de hagabuulinga hebagi o Tagi Maolunga ma daane i denga huaabodu o Israel, go hiidinga gilaadeu gu daia ma gu maakau i de gadilaasa.
13 Gai David ga ssili ange gi tama daane ne daalaa ange laa de longo laa gi de ia, “Koe se dangada hee?”
Gai ia ga hai ange, “Au se dama ni dahi dangada Amalek e noho laa i de henua.”
14 David ne hai ange gi de ia, “E aha, koe tee madagu laa donu i de haalo doo lima e daa gi magau tangada a Tagi Maolunga ne hagadabu?”
15 Gai David ga hagahi dahi dama daane, ga hai ange, “Hannoo daia ia gi magau.” Gai tama daane laa ga hano ga daa taane Amalek laa gu magau. 16 Gai David ne hai ange gi taane Amalek, “Doo magau e dau adu donu huu gi de goe. Au muna ne hagabaubau donu huu goe, i dau hagadaba, ‘Au gu daa ga magau de ia a Tagi Maolunga ne hagadabu.’ ”
Taahili hagahinangalosaa o Saul ma Jonathan
17 Gai David ne hadu taahili nei e hagamaanadu ai a Saul ma Jonathan, dana dama daane, 18 gai ia ne hagadaba bolo gi agoagona ange dangada o Judah taahili nei.*taahili nei: muna nei go lo te Beebaa Greek iai. De Beebaa Hebrew e hai ange bolo go de mee hholu. (Taahili nei e sisi i de Beebaa a Jashar.)*Josh 10.13
19 “De mahamaha o Israel gu maakau ma e daakodo i honga denga mommee maolunga!
Denga daane mmahi gu maakau!
20 Goodou gi dee daalaa mee nei i Gath,
gai gi dee hagadele ina i honga haiava i Ashkelon,
gi dee malangilangi ai de gau Philistia;
gi dee lodo danuaa ai gilaadeu tigi tuu dagaholiage.
21 Goodou denga mounga o Gilboa,
gi deai se maluulu be go de langi e pala iho gi oodou elunga,
gai denga veelenga gi deai grain iai!
Go hiidinga de mee hungihungi a taane mmahi ne maoha i kilaa,
de mee hungihungi a Saul gu dee ahe ange e hulu i lolo.
22 Ne hagassali dodo olaadeu ne daa ga maakau,
gai ne duuduu kano o denga daane mmahi,
gai de mee hholu a Jonathan tee haganoho donu;
de gadilaasa a Saul tee ngadi ahe mai donu.
23 Saul ma Jonathan ni daane
niio dangada e aaloha ai aama de mahamaha,
gai gilaau tee mavaevae donu i delaau maakau.
Gilaau e kemo ange i denga igele,
gai e mmahi ange i denga laiono.
24 Denga haahine o Israel, goodou tangi i hiidinga o Saul;
ia ne hakahu goodou i malo mmea mahamaha,
ma de hagadanuaa goodou i denga hakai goolo.
25 Denga daane mmahi gu maakau i de hebagi!
Jonathan gu magau ma e dagodo i honga oo mommee maolunga.
26 Dogu daina go Jonathan,
au gu hinangalosaa mmao i de goe;
koe ne abodonu mmao mai gi de au;
doo aloha i de au e mahamaha mmao,
gai e kii ange i de aloha o denga haahine.
27 Denga daane mmahi gu maakau!
Denga goloa o de hebagi gu tili!”