21
De sui ange mee ne hai ange gi de gau Gibeon
1 De masavaa o David e hodooligi ai, gai ne duudagi de hai de onge i honga de henua i e dolu ngadau. Gai David ne ssili ange gi Tagi Maolunga dagodo o de onge. Gai Tagi Maolunga ne hai ange, “De onge nei ne hai i hiidinga o Saul ma dono huaabodu daa dangada; go hiidinga gilaadeu ne daa ga maakau de gau Gibeon.”
2 Gai de hodooligi ga hagahi de gau Gibeon gi loomai gi ono daha. (De gau Gibeon e dee ni dangada Israel, aagai ni dangada e doe mai i de gau Amor. Gai de gau Israel ne hagatoo donu bolo gilaadeu e dee daa gi maakau de gau Gibeon, aagai a Saul ne hagatale de daa gilaadeu gi odi, i hiidinga dono lodo mmahi i de bale ange Israel ma Judah.)*Josh 9.3-15 3 Gai David ne hai ange gi de gau Gibeon, “Se aha aagu e hai e sui ai mee gu hai adu gi goodou, gai goodou ga hagamanuuia ai dangada o Tagi Maolunga?”
4 Gai de gau Gibeon ga hai ange gi de ia, “E dee go goolo be go selevaa e hagaheohi ina mee i omaadeu magavaa ma Saul ma dono huaabodu; e deai hogi semaadeu heohi e daa ai dahi dangada Israel gi magau.”
Gai David ne ssili ange, “Gai se aha oodou e llodo au gi haia adu moodou?”
5 Gilaadeu ne hai ange gi de hodooligi, “Gimaadeu e llodo i taane ne daia hanu gimaadeu ma de hagatale de daa gimaadeu alodahi gi maakau, gi dee nnoho ai gimaadeu i Israel, 6 gai gaamai e dogohidu daane mai i dono hagadiilinga, gai gimaadeu ga daa gilaadeu gi maakau e daudau age i denga manu i mada luu mada o Tagi Maolunga i Gibeah o Saul, de ia a Tagi Maolunga ne hili.”
Gai de hodooligi ga hai ange, “Au e gaavadu donu gilaadeu gi goodou.”
7 Aagai de hodooligi ne hagaola Mephibosheth, tama daane a Jonathan, de mogobuna o Saul, go hiidinga delaau hagatoo donu ma Jonathan ne hai i mada luu mada o Tagi Maolunga.*1 Sa 20.15-17; 2 Sa 9.1-7 8 Aagai de hodooligi ne kave luu dama daane a Rizpah, tamaa hine a Aiah ange gi a Saul, go Armoni ma Mephibosheth, ma denga dama daane dogolima a Merab,*Merab: hanu beebaa duai ange laa e hai ange Michal. tamaa hine a Saul ange gi Adriel, tama daane a Barzillai, taane Meholah.*1 Sa 18.19 9 Gai ia ne gaavange gilaadeu gi de gau Gibeon gi daia gi maakau, gai gilaadeu ga daa gilaadeu ga daudau age i honga de mounga i mada luu mada o Tagi Maolunga, gai gilaadeu dogohidu laa gu maakau alodahi. Gilaadeu ne daa ga maakau i laangi ne daamada ai de hagihagi denga barley.
10 Gai Rizpah, tamaa hine a Aiah, ne kave dahi malo daladala ga hhola i honga dahi hadu ga noho ai, mai de taamada o de masavaa o de hagihagi ga dae ai gi de masavaa ne pala iho ai de langi gi honga olaadeu angaanga. Ia tee dugu ange donu denga manu llele gi toga ange gi honga olaadeu angaanga i de laangi, aabe go denga manu alasala i de boo. 11 Gai ga langona huu e David mee a Rizpah, tamaa hine a Aiah, de bodu laa daha o Saul ne hai, 12 gai ia ne hano ga gaamai ivi o Saul ma dana dama go Jonathan i daho de gau Jabesh Gilead. (Gilaadeu ne kave hagammuni olaau angaanga mai i lo te aduhale go Beth Shan, go de mommee a de gau Philistia ne kave olaau angaanga ga daudau age ai, i de laangi alaadeu ne daa ai a Saul ga magau i honga de mounga go Gilboa.)*1 Sa 31.8-13 13 Gai David ga gaamai ivi o Saul ma dana dama daane go Jonathan i kilaa, aama ivi o denga daane a de gau Gibeon ne daa laa ga daudau age i denga manu ssomo.
14 Gai dangada ne kave ivi o Saul ma dana dama go Jonathan ga danu i Zela, i de henua o Benjamin, i lo te daanunga a Kish, tamana o Saul. Gai dangada ne hagassula mee alodahi a de hodooligi ne tala ange gilaadeu gi haia. Dua mee laa gai de Maadua ne hai ga bei dalodalo a dangada i hiidinga o de henua.
Denga hebagi ne hai ange gi de gau Philistia
(1 Ch 20.4-8)
15 Gai ne hai ange hogi de hebagi i magavaa o de gau Philistia ma de gau Israel. Gai David ne hano madali ono dangada hai hegau, gai gilaadeu ga hebagi ange gi de gau Philistia, gai ia gu kona dono dalea. 16 Gai Ishbi-Benob, dahi hagadiilinga o denga doa, dono dao bronze se dolulau shekel†300 shekele bei se 7½ pauni. taemaha, gai ia e dau dahi gadilaasa hoou, ne hagatale de daa David gi magau. 17 Aagai Abishai, tama daane a Zeruiah, ne humai ga bale ange David, ga daa ai taane Philistia laa gu magau. Gai denga daane o David ne hagatoo donu ga hai ange gi de ia, “Koe gu dee ahe ange donu e hano gi de hebagi madali gimaadeu, kana daia goe ga magau, gai gi dee made ai de laama a Israel.” *1 Ki 11.36; Psa 132.17
18 Dua mee laa gai gilaadeu ne hebagi ange hogi gi de gau Philistia i Gob; gai Sibbecai, taane Hushah, ne daa Saph ga magau, dahi daane mai i de aamuli o denga doa.
19 Gai gilaadeu ne hebagi ange hogi gi de gau Philistia i Gob; gai Elhanan, tama daane a Jaare-Oregim,‡Jaare-Oregim, aabe go tama daane a tangada langa mee. taane Bethlehem, ne daa ga magau Goliath,§tama daane a Jaare-Oregim, taane Bethlehem, ne daa ga magau Goliath: muna nei go lo te Beebaa Hebrew iai. 1 Ch 20.5 e hai ange bolo go tama daane a Jair ne daia laa Lahmi taina daane o Goliath. taane Gath, go taane niiana laa tao iai laa de gau laumalie bei de laagau o de mee llanga malo.
20 Gai gu hai ange hogi de hebagi i Gath; gai e dahi doa i kilaa, e dagiono ono madannia ma dabuvae, se madalua ma haa ono madannia ma ono dabuvae alodahi. Ia se daane hogi de aamuli o denga doa. 21 Ia ne basa hagamaolunga i de gau Israel, gai Jonathan, tama daane a Shimea,*Shimea: hanu beebaa Hebrew ange laa e hai ange Shimei. taina daane o David, ga daa ia gu magau.
22 Denga daane e dogohaa nei ni daane de aamuli o denga doa i Gath; gai David ma ono daane hebagi ne daa gilaadeu ga maakau.
*21:2 Josh 9.3-15
*21:7 1 Sa 20.15-17; 2 Sa 9.1-7
*21:8 Merab: hanu beebaa duai ange laa e hai ange Michal.
*21:8 1 Sa 18.19
*21:12 1 Sa 31.8-13
†21:16 300 shekele bei se 7½ pauni.
*21:17 1 Ki 11.36; Psa 132.17
‡21:19 Jaare-Oregim, aabe go tama daane a tangada langa mee.
§21:19 tama daane a Jaare-Oregim, taane Bethlehem, ne daa ga magau Goliath: muna nei go lo te Beebaa Hebrew iai. 1 Ch 20.5 e hai ange bolo go tama daane a Jair ne daia laa Lahmi taina daane o Goliath.
*21:21 Shimea: hanu beebaa Hebrew ange laa e hai ange Shimei.