22
Taahili tuhi a David
(Psa 18)
1 Gai David ne daahili ange gi Tagi Maolunga i taahili nei, i de masavaa a Tagi Maolunga ne hagaola ai ia mai i ono hagadaumee alodahi, ma mai i a Saul. 2 Ia ne hagadaba,
“Tagi Maolunga go dogu baba makaga,
ma dogu mommee buibui makaga ma dogu Ia Hagaola;
3 dogu Maadua go dogu baba makaga,
go ono daha oogu e mmuni ai,
go ia dagu mee hungihungi ma de hanga manu e hagaola ina mai au.
Go ia dogu mommee buibui makaga
ma dogu mommee mmuni, aama dogu Ia Hagaola,
e hagaola ina mai au i de gau alasala.
4 Au e hagahi Tagi Maolunga,
go de ia e heohi dagu tuhi,
gai au gu ola mai i ogu hagadaumee.
5 Denga beau o de magau gu duuli au,
de mee mmilo e oohaa laa mee gu haoli au.
6 Daula o de mommee o de gau maakau gu vini au,
gai sele o de magau gu daohi au.
7 Au ne hagahi Tagi Maolunga i dogu duasala;
au ne hagahi dogu Maadua.
Gai ia ne langona mai dogu leo i dono temple,
gai dagu dangi gu dae ange ai gi luoono dalinga.
8 Henua i lalo ne ngalungalue ma de bolebole;
denga dagelo o de langi gu ngalungaalue,
ma de bolebole i hiidinga ia gu lili.
9 De useahi gu buu mai i lodo luoono bongaa usu;
de ahi ula gu sao mai i lo tono ngudu,
gai denga maga ahi e kaa mai i ono daha.
10 Ia e hai gi baa iho de langi, gai ia ga iho ai;
denga hagausinga maadolu i lalo luoono vae.
11 Ia e gage i honga dahi cherubim ma e lele ai;
ia e lele i honga bakau o de madangi.
12 Ia e hai de gohu go dono hale malo —
denga hagausinga maadolu,
e hoohonu i denga vai.
13 De maalama i ono mada i mua
e bei de maga ahi mmahi.
14 Tagi Maolunga e basa mai i de langi bei de babaa denga hatuli,
de Ia Maolunga Mmao laa e hai gi langona dono leo.
15 Ia e tili dao o dana mee hholu gi mavaevae saele ai denga hagadaumee;
de labalaba o denga uila e hai gi ssenga ange gilaadeu.
16 Lodo ava o tai gu ssula age,
gai dagelo o henua i lalo gu gidee,
i de hagasee a Tagi Maolunga,
ga busi luoono bongaa usu.
17 Ia ne ino iho i de mommee maolunga ga poo au,
ia ne dada age au mai i lo te moana gelo.
18 Ia ne hagaola mai au i dogu hagadaumee mmahi,
ma mai i gilaadeu e kino i de au,
go hiidinga gilaadeu e mmahi ange i de au.
19 Gilaadeu ne hebagi mai gi de au i de laangi oogu ne hai ngadaa ai;
aagai Tagi Maolunga ne bale mai au.
20 Ia ne hagasao mai au ga dugu i de mommee lahalaha;
ia ne hagaola ngau, go hiidinga ia e malangilangi i de au.
21 Tagi Maolunga gu sui mai dogu heohi;
ia ne hagao mai au gi bei de gilimalali o agu hegau.
22 Go hiidinga au ne daohi haiava o Tagi Maolunga;
au tee hai de baubau ga hano gee ai i dogu Maadua.
23 Au ne daohi ana hagamodu alodahi;
au tee tili donu ana mee gu hagasauaa.
24 Au tigi haisala donu i mada luoono mada,
gai au ne daohi gi dee haisala au.
25 Tagi Maolunga gu hagao mai au, gi bei dagodo o dogu heohi,
ma de gilimalali o agu hegau i mada luoono mada.
26 Koe e hai hegau i de mee abodonu ange gi tangada
e hai hegau i de mee abodonu;
koe e hai hegau i de heohi ange gi gilaadeu e heohi.
27 Koe e hai hegau i de gilimalali ange gi gilaadeu e gilimalali,
aagai e hagaago ange gi de gau vaivai daakodo doo alasala.
28 Koe e hagaola gilaadeu e llodo maolalo,
aagai koe e hagamaolalo gilaadeu e llodo maolunga.
29 Uaa, Tagi Maolunga, go koe dagu laama;
dogu Maadua e sui de gohu i ogu daha gi se maalama.
30 Go koe e haia gi kii au i dahi hagabuulinga hebagi,
gai dogu Maadua e hai gi maua e au i de gage laa honga de buibui.
31 De Maadua, ono dagodo e honu abodonu;
muna a Tagi Maolunga e heohi abodonu.
Ia se buibui niiolaadeu alodahi
e mmuni i ono daha.
32 Goai de Maadua,
e dee go Iahweh donu huu?
Gai goai de baba makaga,
e dee go taadeu Maadua donu huu?
33 Go de Maadua dogu buibui makaga,
ma de hai gi heohi abodonu dogu haiava.
34 Ia e hai luoogu vae gi bei luu vae o dahi dia,*Hab 3.19
ma de hai gi maua e au i de duu i honga mommee maolunga.
35 Ia e hai gi aabo luoogu lima i de hebagi,
gi maua ai e au i de tili de mee hholu e hai i bronze.
36 Koe e buibui au i dau hagaola,
gai koe ne ino iho ga hai au gi se dangada maolunga.
37 Koe ne hagaduu au i de mommee lahalaha,
gai luoogu vae tee ssege donu.
38 Au ne doolohi ogu hagadaumee ga daa gilaadeu,
gai au tee ahe dua donu
ga dae ai gi de odi gilaadeu i de maakau.
39 Au ne daa gilaadeu alodahi ga maakau,
gilaadeu gu dee maua i de hiihidi age ange;
gilaadeu gu baakuu ma gu daakodo i lalo luoogu vae.
40 Koe ne gaamai gi de au de mmahi e hebagi ai;
koe ne hai ogu hagadaumee gi too gi ogu lalo.
41 Koe ne hai ogu hagadaumee gi saavini gi hulo gee,
gai au gu daa gi maakau gilaadeu e kino i de au.
42 Gilaadeu ne ssala,
aagai teai donu dangada ne hagaola ina gilaadeu;
gilaadeu ne tangi ange gi Tagi Maolunga,
aagai ia tee basa ange gi gilaadeu.
43 Au ne hagailiili gilaadeu ga bei mama o de gelegele;
au ne mmili ma de dagadagahi gilaadeu gi lalo
bei gelegele i honga denga haiava.
44 Koe gu hagaola mai au i ogu dangada
e hai baasi mai gi de au.
Koe gu hai au go tagi o denga huaahenua;
dangada aagu e dee iloo gu hai hegau mai gi de au.
45 De gau henua gee gu loomai ma de maatagu;
de masavaa donu huu alaadeu e langona ai agu muna,
gai gilaadeu e hagallongo mai gi de au.
46 De gau henua gee gu deai selaadeu tali;
gilaadeu gu sasao mai i lodo olaadeu mommee buibui makaga ma de bolebole.
47 Tagi Maolunga e mouli laa!
Hagadegi ina dogu baba makaga!
Hagaamua ina dogu Maadua,
de baba makaga, go dogu hagaola!
48 Go ia de Maadua e suuia ange mee gu hai mai gi de au,
ma de hai denga huaahenua gi nnoho i ogu lalo,
49 go ia e hagaola ina mai au i ogu hagadaumee.
Koe gu hagaamua ngau i ogu hagadaumee,
koe gu hagaola mai au i de gau daa dangada.
au e daahili ma de tuhi doo ingoo.
51 Ia ne hai gi kii de hodooligi aana gu hili,
ia e abodonu ange gi taane aana gu hagadabu i de lolo,
ange gi David ma dono aamuli ga hano ai.”