23
Muna hagaodi a David
1 Aanei muna hagaodi a David:
“Muna a David tama daane a Jesse,
muna a taane gu hagaamua
i daho de Ia Maolunga Mmao laa,
go taane a de Maadua o Jacob gu hagadabu i de lolo,
gai go de ia e haia daahili danuaa a de gau Israel:*de ia e haia daahili danuaa a de gau Israel, aabe go de ia daahili hagaaloha o de gau Israel.
2 De Hagasaalunga o Tagi Maolunga ne hai au gi daalaa ana muna;
gai ana muna e daakodo i lo togu ngudu.
3 De Maadua o Israel gu basa,
de Baba o Israel ne hai mai gi de au,
‘Tangada e dagina dangada i de mee heohi,
ma de dagi dangada i dono madagu i de Maadua,
4 ia e bei de maalama o de laa i taiao,
ma de laa e dii laa i de laangi e deai hagausinga iai,
ma de maalama i dua de pala de langi
e hagassomo ina laa helii i honga de gelegele.’
5 E aha, e dee aanei dagodo o dogu huaabodu i daho de Maadua?
Ia gu hai dahi hagatoo donu hagaheloongoi dee ngado mai madali au,
ma de hai gi too donu mee alodahi iai.
E aha, ia e dee hai naa gi sula dogu hagaola,
ma mee alodahi oogu e lodo ai?
6 Aagai de gau baubau e tili naa
bei dagodo o denga manu daladala;
e dee maua laa i de poo i lo te lima o tangada,
7 aagai tangada e poo ange gi mee nei
e poo i de iron aama tao e dahi ono gau;
gilaadeu e dudu naa ga odi i lo te ahi.”
Denga daane hebagi dau o David
(1 Ch 11.10-41)
8 Aanei ingoo o denga daane hebagi mmahi o David: go Josheb-Basshebeth, taane Tahkemon, go tagi o denga daane dau dogodolu. Ia ne hai dono dao ga hebagi ange ai gi e dinovalu daane ga daa gilaadeu gu maakau i e dahi donu huu hanonga.
9 Taane e mua ange gi de ia i denga daane dogodolu laa go Eleazar, tama daane a Dodo, taane Ahoh. Ia ne bale ange David ga daa ai gu maakau denga daane Philistia ne hagabuni laa e hebagi. Denga daane Israel gu saavini ma gu hulo, 10 aagai ia ne hidi ga daa denga daane Philistia ga dae ai gi de made dono lima, ga pigi ange gi dana gadilaasa, gu dee maua i de aau. Gai Tagi Maolunga ne hai gi kii gilaadeu i de laangi laa. Gai dangada ne aahe mai gi ono daha, ga kave ai goloa o de gau maakau i kilaa.
11 Gai taane e mua ange gi de ia go Shammah, tama daane a Agee, taane Harar. Denga daane Philistia ne hagabuni i Lehi, i dahi mommee e ssomo ai laa denga lentil; gai denga daane Israel ne saavini ga hulo gee mai i denga daane Philistia. 12 Aagai ia ne duu i de mommee laa ga daa gu maakau de gau Philistia, gai Tagi Maolunga ne hai ga laumalie delaadeu kii i de laangi laa.
13 De masavaa o de hagihagi, gai e dogodolu daane mai i denga daane dinodolu mmahi laa, ne hulo gi daho David i lo te haonga i gaogao de mounga i Adullam, gai dahi hagabuulinga hebagi o Philistia e nnoho i lo te geelonga go Rephaim. 14 De masavaa laa gai David e noho i lo te mommee buibui makaga, gai denga daane hebagi o Philistia e nnoho i Bethlehem. 15 Gai David ne hagadaba age, “Mee naa gi dahi dangada e hano e gaamai hanu vai mai i de vai geli i gaogao de haitoga o de buibui o Bethlehem, e unu au!” 16 Gai denga daane mmahi dogodolu laa ne ulu laa magavaa o denga daane hebagi o Philistia, ga hulo ga asu mai hanu vai i de vai geli i gaogao de haitoga i Bethlehem, ga gaamai gi David. Aagai David tee unu vai laa; ia ne llingi vai laa e sigidaumaha ange ai gi Tagi Maolunga, 17 ma de hagadaba, “Tagi Maolunga, e dee heohi dagu hai de mee nei! Vai nei e bei donu dodo o denga daane nei, go hiidinga gilaadeu ne hagangadi mee olaadeu mouli.” Gai David tee unu vai laa. Aanei hegau a denga daane mmahi dogodolu laa ne hai.
18 Gai Abishai, taina daane o Joab, tama daane a Zeruiah, tagi o denga daane e dinodolu†dinodolu: hanu beebaa duai ange laa e hai ange dogodolu. laa. Ia ne hai dono dao ga daa ai ga maakau e dolulau daane, deelaa ai, ia gu dau madali denga daane e dinodolu laa. 19 Gai e kii ange de laumalie dono hagadubu i denga daane e dogodolu‡dogodolu: hanu beebaa duai ange laa e hai ange dinodolu. laa, gai go ia delaadeu dagi, aagai ia tee dau madali denga daane dogodolu ange laa.
20 Gai Benaiah, tama daane a Jehoiada, ia se daane aabo i de hebagi mai i Kabzeel, gai ne lagolago hogi ana hegau danuaa ne hai. Ia ne daa ga maakau e dogolua daane mmahi o Moab. Gai ia ne iho hogi gi lo te geelonga ga daa dahi laiono i de masavaa e loiho ai denga snow. 21 Ia ne daa hogi ga magau dahi daane mahamaha o Egypt. Taane Egypt laa e poo dahi dao i dono lima; aagai Benaiah ne hano ga hebagi ange gi de ia i dono dogo, ga kave tao o taane Egypt ga daa ai ia gu magau i dono dao. 22 Aanei hegau a Benaiah, tama daane a Jehoiada ne hai; ia se daane dau hogi madali denga daane mmahi dogodolu laa. 23 Ia se daane dau i magavaa o tinodolu laa, aagai ia tee dau madali denga daane dogodolu laa. Gai David ne hai ia go tagi o ono daane hagaloosi.
24 Gai Asahel, taina daane o Joab, se daane hebagi dau hogi madali denga daane dinodolu laa; ma Elhanan, tama daane a Dodo, taane Bethlehem, 25 ma Shammah, ma Elika, luu daane Harod, 26 ma Helez taane Pelet, ma Ira tama daane a Ikkesh, taane Tekoa, 27 ma Abiezer taane Anathoth, ma Mebunnai taane Hushah, 28 ma Zalmon taane Ahoh, ma Maharai taane Netophah, 29 ma Heleb, tama daane a Baanah, taane Netophah, ma Ittai tama daane a Ribai, taane Gibeah i de vaaenga o Benjamin, 30 ma Benaiah taane Pirathon, ma Hiddai taane mai i denga geelonga o Gaash, 31 ma Abi-Albon taane Arabah, ma Azmaveth taane Bahurim, 32 ma Eliahba taane Shaalbon, ma denga dama daane a Jashen, ma Jonathan, 33 ma Shammah, taane Harar, ma Ahiam, tama daane a Sharar taane Harar, 34 ma Eliphelet tama daane a Ahasbai, taane Maacah, ma Eliam tama daane a Ahithophel, taane Giloh, 35 ma Hezro taane Carmel, ma Paarai taane Arba, 36 ma Igal tama daane a Nathan, taane Zobah, ma Bani taane Gad, 37 ma Zelek taane Ammon, ma Naharai taane Beeroth, go taane e sabaia goloa hebagi o Joab, tama daane a Zeruiah, 38 ma Ira ma Gareb luu daane Jether, 39 ma Uriah taane Heth: se dinodolu ma dogohidu daane nei alodahi.