27
De mommee o ssigidaumaha i de mounga go Ebal
1 Gai Moses ma dagi o Israel ne hai ange gi de huaadangada, “Goodou daohia hainga alodahi aagu gu tala adu gi goodou anailaa nei. 2 De masavaa naa huu oodou e hulo ai ga tae gi de baasi laa o Jordan, go de henua a Tagi Maolunga doodou Maadua e gaavadu gi goodou, gai goodou ga hagatuu hanu hadu nnui ga hagamalali i denga plaster.*Josh 8.30-32 3 Gai goodou ga sisi ange muna o de hainga nei gi honga hadu laa, i de masavaa oodou e hulo ai ga tae gi de mommee a Tagi Maolunga doodou Maadua e gaavadu gi goodou, go de henua iai vai uu ma hooni lagolago, bei de hai a Tagi Maolunga de Maadua o oodou dubuna madagidagi gu hagatoo donu adu ai gi goodou. 4 Gai de masavaa naa huu oodou e tae ai gi baasi dai o Jordan, gai goodou ga hagatuu denga hadu nei i de mounga go Ebal, bei dagu hai gu tala adu ai gi goodou anailaa nei, ga hagamalali i denga plaster. 5 Gai goodou ga bae dahi mommee o ssigidaumaha i kilaa ange gi Tagi Maolunga doodou Maadua, gai hadu e hai ai e dee daadaa gi malali, i denga goloa baalanga.*Exo 20.25 6 Gai baea de mommee o ssigidaumaha a Tagi Maolunga doodou Maadua i hadu tigi hagamalali, ga hai ai ssigidaumaha dudu ange gi Tagi Maolunga doodou Maadua. 7 Gai goodou ga hai ai ssigidaumaha hagadanuaa magavaa, ga gaimee ai ga malangilangi i mada luu mada o Tagi Maolunga doodou Maadua. 8 Gai goodou ga sisi gi madea danuaa muna o de hainga alodahi i honga denga hadu nei.”
Hagamalaia mai i de mounga go Ebal
9 Gai Moses ma de gau haimeedabu i de aamuli o Levi, ne hai ange gi de gau Israel alodahi, “De gau Israel, goodou nnoho mai hagalaangona! Anailaa nei gai goodou go de huaadangada o Tagi Maolunga doodou Maadua. 10 Deenei ai, goodou hagallongo ange gi Tagi Maolunga doodou Maadua, ma de daohi ana hainga ma ana mee gu hagasauaa, go mee aagu gu tala adu gi goodou anailaa nei.”
11 Gai Moses ne tala ange gi dangada i de laangi laa, ga hai ange:
12 De masavaa naa huu oodou e tae ai gi baasi dai o Jordan, gai denga aamuli nei e hulo e tuu i honga de mounga go Gerizim e hagamanuuia ai dangada: go de aamuli o Simeon, ma Levi, ma Judah, ma Issachar, ma Joseph, aama Benjamin.*Deut 11.29; Josh 8.33-35 13 Gai denga aamuli nei e hulo e tuu i honga de mounga go Ebal e hagamalaia ai dangada: go de aamuli o Reuben, ma Gad, ma Asher, ma Zebulun, ma Dan, aama Naphtali. 14 Gai de aamuli o Levi gi hevaalogi gi hai ange gi de huaadangada alodahi o Israel:
15 “E malaia tangada e hai dahi diinonga i laagau aabe ni baalanga hagavaivai — de mee nei se mee niio Tagi Maolunga e kino ai, se mee ne hai i luu lima o de labagau — gai ne hagaduu i de mommee e dee gidee.” *Exo 20.4; 34.17; Lev 19.4; 26.1; Deut 4.15-18; 5.8
Gai dangada alodahi gi hai ange, “Amen!”
16 “E malaia tangada e dee hagadubu ina dono damana ma dono dinana.” *Exo 20.12; Deut 5.16
Gai dangada alodahi gi hai ange, “Amen!”
17 “E malaia tangada e uea goinga o tangada e baa ange gi de ia.”
Gai dangada alodahi gi hai ange, “Amen!”
18 “E malaia tangada e dagina tangada dee gide ga kave gee i de haiava.” *Lev 19.14
Gai dangada alodahi gi hai ange, “Amen!”
19 “E malaia tangada e dee hai hegau i de heohi ange gi tangada henua gee, ma de gauligi gu deai sono damana, aama de hine gu magau dono bodu.” *Exo 22.21; 23.9; Lev 19.33-34; Deut 24.17-18
Gai dangada alodahi gi hai ange, “Amen!”
20 “E malaia tangada e dagodo haisala ma de bodu o dono damana, go hiidinga ia tee hagadubu dono damana.” *Lev 18.8; 20.11; Deut 22.30
Gai dangada alodahi gi hai ange, “Amen!”
21 “E hagamalaia tangada e dagodo haisala ma dahi manu.” *Exo 22.19; Lev 18.23; 20.15
Gai dangada alodahi gi hai ange, “Amen!”
22 “E malaia tangada e dagodo haisala ma dono daina hahine, se damana daudahi aabe se dinana daudahi olaau.” *Lev 18.9; 20.17
Gai dangada alodahi gi hai ange, “Amen!”
23 “E malaia tangada e dagodo haisala ma tinana o dono bodu.” *Lev 18.17; 20.14
Gai dangada alodahi gi hai ange, “Amen!”
24 “E malaia tangada e daia ga magau tangada e baa ange gi de ia, gai teai dangada ne gidee.”
Gai dangada alodahi gi hai ange, “Amen!”
25 “E malaia tangada e gaavee de ngadi gaavange hagasenga, gai ia ga daa ai gi magau tangada tigi haisala.”
Gai dangada alodahi gi hai ange, “Amen!”
26 “E malaia tangada e dee hagassula ina muna o de hainga nei ma de hai hegau ai.” *Gal 3.10
Gai dangada alodahi gi hai ange, “Amen!”
*27:2 Josh 8.30-32
*27:5 Exo 20.25
*27:12 Deut 11.29; Josh 8.33-35
*27:15 Exo 20.4; 34.17; Lev 19.4; 26.1; Deut 4.15-18; 5.8
*27:16 Exo 20.12; Deut 5.16
*27:18 Lev 19.14
*27:19 Exo 22.21; 23.9; Lev 19.33-34; Deut 24.17-18
*27:20 Lev 18.8; 20.11; Deut 22.30
*27:21 Exo 22.19; Lev 18.23; 20.15
*27:22 Lev 18.9; 20.17
*27:23 Lev 18.17; 20.14
*27:26 Gal 3.10