De Beebaa Dabu Deuteronomy 32

1 De langi i lunga, nnoho mai hagalaangona, gai au ga basa adu;

henua i lalo gi hagalaangona agu muna e tala i dogu ngudu.

2 Agu agoago e bei dagodo o de langi pala,

agu muna e loiho bei de mee suungia o taiao;

bei de langi e pala iho laa gi honga helii se goodo matili age,

aama de langi e hano iho maalie laa gi honga denga manu ssomo vaaligiligi.

3 Au e tala dagodo de ingoo o Tagi Maolunga,

gai duuhia de maolunga o taadeu Maadua.

4 Ia se baba makaga, ana hegau e hoohonu danuaa,

gai ia e hai hegau i de hagamodu heohi.

Ia se Maadua e hai hegau i de muna abodonu ma teai se baubau i ono daha,

ia e hagamodu i de heohi ma de soe.

5 Gilaadeu ne hai hegau ange gi de ia i tee heohi,

gilaadeu gu dee ni dama niiana i hiidinga olaadeu baubau;

gilaadeu se atangada e hulo gee i de mee heohi ma de hadu muna.

6 De gau ssenga ma teai oodou mee e iloo,

deenei doodou hai e hagao ange ai Tagi Maolunga?

E dee go ia doodou Damana ne haia ina goodou,

ma de hai goodou ga se huaahenua?

7 Goodou manadua de masavaa madagidagi,

gai hagasaelea age dagodo o denga atangada soa i mua.

Siilia ange gi oodou damana gai gilaadeu ga tala adu;

siilia ange gi oodou dagi, gai gilaadeu ga tala adu.

8 De masavaa a de Ia Maolunga Mmao laa ne bolo ai denga huaahenua,

ma de vaevae ai dangada,

gai ia ne hagatuu goinga o denga huaadangada

gi heohi ange gi taelodo o dama a de Maadua.* *

9 Gai tiba a Tagi Maolunga go dono huaadangada,

Jacob go de vaaenga ne bolo ange gi de ia.

10 Ia ne gidee dono huaadangada i lodo henua,

i de ngadi mommee i de vao.

Ia ne duuli gilaadeu ga tilo ange gilaadeu,

gai ia ne hagaloosi gilaadeu bei tama legalega eidu o dono ganomada.

11 Ia e bei dagodo o de igele e aheahe saele laa

i honga dono hoohanga,

ma e hagaloosi ange ai ana dama,

ia e doha luoono bakau e sigo ai gilaadeu

ga hagauda ai gilaadeu ga kave.

12 Go Tagi Maolunga ne dagina ia;

teai ange donu se diinonga gee madali ia.

13 Ia ne hai gilaadeu gi saavini laa honga denga mommee maolunga o de henua,

ma de gai hua o denga manu ssomo i lo te duu malaelae;

ia e haangai ange gilaadeu i denga hooni lo te baba,

aama lolo o denga olive i lodo hadu makaga.

14 Ia ne haangai ia i vai uu haduhadu o denga kaau

ma vai uu o denga ssiibi ma guudi,

ma mee moomuna o denga ssiibi gauligi ma ssiibi daane,

ma ssiibi ma guudi o Bashan,

madali denga grain danuaa hugadoo;

koe ne unu uvaini danuaa o denga grape.

15 Aagai Jeshurun† ne bedi, ga dagadagahi au;

koe gu bedi i de gaimee ma de daemaha,

ma de bungubungu.

Koe gu tili de Maadua ne haia goe,

ma de hagangadi mee de Baba, doo Ia Hagaola.

16 Gilaadeu ne hai ia ga maagoda i olaadeu diinonga,

ma de hai ga lili ia i alaadeu hegau hakino gee.

17 Gilaadeu ne sigidaumaha ange gi denga hagasaalunga baubau

gilaadeu e dee ni maadua abodonu —

ni maadua niilaadeu tee iloo i mua,

ni maadua se goodo ssula age,

gai ni mee niiodou dubuna madagidagi tee maatagu ai.*

18 Koe gu dee anga ange gi de Baba,

go de ia ne hagadili ina goe;

gai koe gu ngalo de Maadua ne haia goe.

19 Tagi Maolunga gu kino i gilaadeu i dana gide mee nei,

i hiidinga ana dama daane ma damaa hine gu hai ia gi lili.

20 Gai ia ga hagadaba, “Au e huli gee naa i gilaadeu,

e tilo ai be aahee olaadeu dagodo.

Go hiidinga gilaadeu se atangada baubau,

gai ni dama e dee hai hegau i de muna abodonu.

21 Gilaadeu ne hai au ga maagoda i denga diinonga e dee ni maadua abodonu;

gilaadeu gu hai au gi lili i olaadeu ngadi diinonga.

Au e hai naa gilaadeu gi llodo gaiaa i dangada tigi se huaahenua;

au e hai naa gilaadeu gi llili i dahi huaahenua dee heiangi.*

22 Gai de ahi gu hakaa i hiidinga o dogu lili,

gai e ula ga hano gi de mommee o de gau maakau,

gai e dudu naa honga de henua ma mee alodahi e ssomo ai,

ma de haula ga kaa daahido o denga mounga.

23 Au e hagatau dua hia ange naa gi gilaadeu denga hai ngadaa;

au e tili naa gilaadeu i dao o dagu mee hholu.

24 Gilaadeu e hiikai naa i de onge laumalie,

ma de vvela olaadeu angaanga i de magi, ma de mee hagamaakau.

Au e hai naa gi loomai denga manu alasala gi gadigadia gilaadeu,

ma labodo hagammau e tolo i honga de gelegele.

25 De gadilaasa e daa ga maakau dangada i duaahaho,

gai de mee hagamaatagu gu dagodo i lodo,

ange gi denga dama daane ma denga damaa hine,

denga gaagaa ma de gau madumaatua.

26 Au ne hagadaba, ‘Au e hai naa gilaadeu gi mavaevae saele,

ma de hai gi deai dangada e manadua gilaadeu;’

27 aagai au e madagu i muna hagammae manava a de hagadaumee,

kana dee tonu ange denga hagadaumee,

ga hagataba, ‘Gimaadeu ne kii i omaadeu mahi donu;

e dee go Tagi Maolunga donu ne haia mee nei.’ ”

28 Israel se huaahenua e dee heiangi,

gai ni dangada e dee tonu.

29 Mee naa gi ni dangada heiangi gilaadeu ma de tonu ange gi de mee nei,

gai gilaadeu gu tonu ange gi olaadeu dagodo i muli mai!

30 Dee hee de hai a dahi dangada ne maua ai laa i de doolohi e mano dangada,

gai e dogolua dangada ne hagadee kii e dahisemada dangada?

Deelaa donu huu noo delaadeu Baba gu tili gilaadeu,

gai Tagi Maolunga gu hano gee i gilaadeu.

31 Delaadeu baba e dee bei taadeu Baba,

odaadeu hagadaumee e hagasaele hogi bei gidaadeu.

32 Delaadeu grapevine ne gaamai i Sodom,

gai se manu mai i denga veelenga o Gomorrah.

Olaadeu grape e hoohonu i mee hagammau,

gai olaadeu gau looloa e mmala.*

33 Alaadeu uvaini e bei mee hagammau o denga labodo,

ma de hagammau o denga cobra.

34 “E aha, tee dugua e au de mee nei ga doange,

ma de pono ange i lodo ogu mommee doange goloa?

35 Go au e suuia ange de baubau, go au e hagao ina ange.

Gai e dae mai naa de masavaa olaadeu e baakuu ai,

gai de laangi olaadeu e hai ngadaa ai gu baa mai donu,

gai e moolau naa donu de tae mai mee nei gi gilaadeu.” *

36 Tagi Maolunga e hagamodu naa dagodo o ono dangada,

ma de lodo aloha ange gi ono dangada hai hegau,

i de masavaa aana e gidee ai teai olaadeu mahi,

gai gu deai dangada hai hegau aabe ni dangada ilaage e doe.*

37 Ia e ssili naa ga hai ange, “I hee iai olaadeu diinonga,

ma de baba alaadeu ne tali ange laa aagena,

38 ma denga diinonga e gaina laa mee moomuna o alaadeu sigidaumaha,

ma de unu uvaini o alaadeu sigidaumaha?

Gilaadeu gi loomai gi balea adu goodou;

gilaadeu gi buibuia goodou!

39 Goodou kalo mai diiloo, go au donu deenei,

gai e deai ange donu se maadua, go au donu huu.

Go au e daia gi maakau, gai go au e hagamouli ina;

go au e hagalagolagohia ina, gai go au hogi e hagaieiangi ina;

e deai donu se dangada e maua i de hagaola dahi

mai i dogu lima sauaa.

40 Au e haalo age dogu lima gi de langi e hagatoo donu:

i taulooloa dogu mouli ga hano ai,

41 de masavaa naa huu aagu e hakaa ai dagu gadilaasa ga malamalama

ma de poo i dogu lima e hagamodu ai muna,

gai au e sui ange naa hegau baubau a ogu hagadaumee,

ma de hagao ange hegau alaadeu e kino i de au.

42 Au e hai naa dao o dagu mee hholu gi honu i denga dodo,

gai dagu gadilaasa e duuduu naa dangada,

ma de baalau i dodo o de gau maakau ma gilaadeu tee kii,

aama de duuduu biho iai ngaangaaulu lloa o dagi o denga hagadaumee.”

43 Denga huaahenua, goodou duuhia dono huaadangada,

go hiidinga ia e sui ange naa mee ne hai ange gi dono huaadangada hai hegau.

Ia e sui ange naa hegau baubau a ono hagadaumee

gai ia e degi ange gi dono henua ma dono huaahenua.*

44 Gai Moses ne humai madali Hosea‡ tama daane a Nun ga ago ange muna o taahili nei gi dangada.

Muna hagaodi a Moses

45 Gai ga lava huu i de tala ange a Moses muna nei gi de gau Israel alodahi, 46 gai ia ga hai ange gi gilaadeu, “Goodou daohia muna alodahi aagu e tala adu gi goodou anailaa nei i oodou lodo, gai goodou ga tala ange ai gi oodou dama gilaadeu gi kana ange gi daohia muna alodahi o de hainga nei. 47 Gai e dee ni ngadi muna donu huu e tala adu gi goodou, aagai go doodou mee donu e mouli ai. Gai go muna nei oodou e mouli ai ga daulooloa, i de henua oodou ga hulo naa e kave i baasi i dai o Jordan.”

De tala de magau o Moses

48 Gai Tagi Maolunga ga hai ange gi Moses i de laangi laa donu huu,* 49 “Gage age gi de mounga go Abarim, mage hanage gi de mounga go Nebo, i de henua o de gau Moab, i de baasi gee o Jericho, ga tilo adu ai de henua go Canaan, aagu gu dai gaavange gi de gau Israel gi henua ai. 50 Gai koe e magau naa i honga de mounga oou e gage naa e hano aagena, ga hano gi daho oo dubuna madagidagi, bei de hai o doo daina go Aaron ne magau ai laa hogi i honga de mounga go Hor, ga hano gi daho ono dubuna madagidagi. 51 De mee nei ne hai i hiidinga gooluu tee hai hegau i de muna abodonu i madamada o de gau Israel i de vai go Meribah Kadesh i lo te vao o Zin, ma hiidinga gooluu tee hai hegau mai gi de au i de dabu i magavaa o de gau Israel. 52 Koe e gidee adu naa de henua i de mommee mmao, aagai koe e dee dae naa donu gi de henua aagu e gaavange gi de gau Israel.”

*32:8 dama a de Maadua: hanu beebaa duai ange laa e hai ange dama a Israel.

*32:8 Acts 17.26

†32:15 Jeshurun i muna Hebrew e bei go de ia e heohi laa, e bei go Israel.

*32:17 1 Co 10.20

*32:21 1 Co 10.22; Rom 10.19

*32:32 Gen 18.16—19.28

*32:35 Rom 12.19; Heb 10.30

*32:36 Psa 135.14

*32:43 Rom 15.10; Rev 19.2

‡32:44 Hosea go dahi ingoo o Joshua.

*32:48 Num 27.12-14; Deut 3.23-27