33
De hagamanuuia o denga aamuli
1 Deenei de hai a Moses, taane hai hegau o de Maadua, ne hagamanuuia ai de gau Israel, i mua dono magau. 2 Ia ne hagadaba:
“Tagi Maolunga ne hano iho i Sinai
ga hagamaalama gilaadeu mai i Seir,
gai ne hagamaalama mai hogi i de mounga go Paran.
Ia ne humai madali de gau dabu e dahisemada,
gai ia e poo de ahi ula i dono lima madau.*Muna Hebrew i kinei e dee iloo danuaa donu hagadoonunga.
3 Ni muna abodonu, koe e aloha i oo dangada;
koe e daohi oo dangada dabu alodahi i doo lima.
Gilaadeu alodahi e ino i gaogao luoo vae,
ma de hagallongo muna mai i oo daha.
4 Moses ne tala mai gi gimaadeu de hainga,
gai se boolonga donu ange gi de hagabuulingaa dangada o Jacob.
5 Tagi Maolunga gu hodooligi i Jeshurun,†Jeshurun i muna Hebrew e bei go de ia heohi, e bei go Israel; diiloo hogi de gubu e 26.
i de masavaa o denga dagi o de huaadangada
ma denga aamuli o Israel ne hagabuni ai.
6 De aamuli o Reuben gi mouli, gi dee maakau,
e dee galemu donu de sogoisi ono dangada.”
7 Ia ne tala dagodo o Judah, ga hagadaba,
“Tagi Maolunga, hagalaangona tangidangi a Judah,
gaamai ia gi buni ange madali ono dangada.
Luoo lima gi suuia ia gi hebagi ai
gai koe balea ange ia e hebagi ange ai gi ono hagadaumee.”
8 Ia ne tala dagodo o Levi, ga hagadaba,
“Gaavange gi Levi dau Thummim‡de Urim ma de Thummimni hadu nii tangada haimeedabu e hagamodu ai lodo o de Maadua.
gai dau Urim gi gaavange gi doo dangada dabu.
Koe ne hagatale gilaadeu i Massah
gai ne hagadaumee ange gi gilaadeu i de vai go Meribah.*Exo 17.7; 28.30; Num 20.13
9 Ia ne hagadaba i dono damana ma dono dinana,
‘Au e dee anga ange donu gi gilaau.’
Ia ne hagangadi mee ono daina
gai ne tili ana dama.
Go hiidinga gilaadeu ne daudali i au muna,
ma de daohi dau hagatoo donu hagaheloongoi.
10 Gilaadeu e agoago ange naa Jacob i au hagamodu;
gai agoagona de gau Israel i au hainga.
Gilaadeu gi haia ssigidaumaha o mee maanongi i oo mada i mua,
gai gi haia sigidaumaha dudu i honga dau mommee o ssigidaumaha.
11 Tagi Maolunga, hagamanuuia ina olaadeu goloa,
gai malangilangi i alaadeu hegau e hai;
hagadee kii ina olaadeu hagadaumee ma dangada e kino i gilaadeu,
ga dae ai gi delaadeu dee aahe ange e hiihidi age.”
12 Ia ne tala dagodo o Benjamin, ga hagadaba,
“De ia o Tagi Maolunga e aloha ai gi nnoho paba;
ia e duuli gilaadeu mai i taiao ga boo ai,
gai gilaadeu e kage i honga luoono eu.”
13 Ia ne tala dagodo o Joseph, ga hagadaba,
“Tagi Maolunga e hagamanuuia delaadeu henua
i denga mee danuaa mai i de langi i lunga aama lalo de henua,
14 ma denga huamanu danuaa e hhua mai i hiidinga o de laa,
ma mee danuaa alodahi e hhua i denga malama,
15 ma mee danuaa alodahi e hhua i honga denga mounga mai madagidagi,
ma mee danuaa lagolago o denga duuduu e tuu laa ga hano ai,
16 ma hua danuaa alodahi e honu ai laa henua i lalo,
ma de manuuia o de ia i lo te manu somo e ula laa.
Manuuia nei alodahi e daakodo i honga de biho o Joseph,
ma honga de biho o tagi i magavaa o ono daina.
17 Dono mahamaha e bei dagodo o de kaau mmahi,
gai luoono hanga e mmahi bei hanga o de kaau aada.
Ia e hagalagolagohia denga huaadangada i luoono hanga,
ga usu gilaadeu alodahi gi de bido laa o henua i lalo.
Aanei dagodo o tahisemada dangada o Ephraim;
aanei hogi dagodo o tahisemada dangada o Manasseh.”
18 Ia ne tala dagodo o Zebulun, ga hagadaba,
“De aamuli o Zebulun, malangilangi i doodou hulo gi daha,
de aamuli o Issachar, goodou malangilangi i de nnoho i lodo oodou hale malo.
19 Gilaadeu e hagahi naa dangada gi loomai gi delaadeu mounga,
gai gilaadeu ga hai ai denga sigidaumaha heohi.
Gilaadeu e kave naa mee danuaa i lausedi,
ma mee hagamogomogo e danumia laa i lo te gelegele.”
20 Ia ne tala dagodo o Gad, ga hagadaba,
“Duuhia de ia e hagalaumalie ina de henua o Gad!
Gad e noho i kilaa bei de laiono,
gai ia e hhagi naa dahi lima aabe go de biho.
21 Ia ne kave de mommee danuaa hugadoo i de henua moona;
tuuhanga o tagi ne gaavange gi de ia.
De masavaa ne hagabuni ai dagi o dangada,
ia e hai gi bei hagatau heohi a Tagi Maolunga
ma ana hagamodu heohi ange gi Israel.”
22 Ia ne tala dagodo o Dan, ga hagadaba,
“Dan e bei dagodo o de laiono mmahi,
e lele mai laa i Bashan.”
23 Ia ne tala dagodo o Naphtali, ga hagadaba,
“Naphtali e honu i de abodonu o Tagi Maolunga,
gai e honu i de manuuia;
ia e kave naa de vai i baasi ngaage.”
24 Ia ne tala dagodo o Asher, ga hagadaba,
“Asher e manuuia ange naa i denga aamuli ange laa,
gai ono daina e hagamogomogo ia.
Gai ia e hhui ono vae i lolo olive.
25 Mee e hagamakaga ai oo haitoga e hai i iron ma bronze,
oo mahi e duudagi naa donu huu i taulooloa doo mouli!
26 Jeshurun, e deai ange donu e bei dagodo o de Maadua,
ia e lele mai laa lo te langi e bale adu goe,
ma de humai laa lo te langi i dono mahamaha.
27 De Maadua e mouli laa ga hano ai, go doo buibui,
gai luoono lima dee ngado mai laa e daohi age goe.
Ia e aau gee naa doo hagadaumee i oo mada i mua,
ga hagadaba, ‘Daia gilaadeu gi maakau!’
28 Gai de gau Israel gu dee maatagu,
gai hagadiilinga o Jacob gu nnoho paba,
i de henua iai denga grain ma uvaini hoou,
gai se mommee e hano iho aagena de mee suungia i de langi.
29 De gau Israel, goodou gu manuuia!
Goai e bei oodou dagodo, dangada a Tagi Maolunga gu hagaola?
Ia e bei doodou mee hungihungi ma doodou bale
aama doodou gadilaasa e kii ai.
Oodou hagadaumee e maatagu naa i goodou,
gai goodou e dagadagahi naa olaadeu mommee daumaha.”