3
E dahi donu masavaa o mee alodahi
1 E dahi masavaa ange gi mee alodahi,
gai e dahi donu masavaa ange gi mee alodahi i henua i lalo:
2 e dahi masavaa e haanau ai,
gai e dahi hogi masavaa e maakau ai;
e dahi masavaa e doo ai manu,
gai e dahi hogi masavaa e unuunusi age ai;
3 e dahi masavaa e daa ai gi maakau,
gai e dahi hogi masavaa e hagaieiangi ai;
e dahi masavaa e oha ai,
gai e dahi hogi masavaa e hagaduu age ai;
4 e dahi masavaa e tangi ai,
gai e dahi hogi masavaa e kada ai;
e dahi masavaa e hinangalosaa ai,
gai e dahi hogi masavaa e aanu ai;
5 e dahi masavaa e hagasii saele ai denga hadu,
gai e dahi hogi masavaa e hagabudu ai denga hadu;
e dahi masavaa e hagadau buuludi ai,
gai e dahi hogi masavaa e tuu ai de hagadau buuludi;
6 e dahi masavaa e ssala ai gi gidee,
gai e dahi hogi masavaa e tuu ai de ssala,
e dahi masavaa e doange ai,
gai e dahi hogi masavaa e tili ai;
7 e dahi masavaa e saesae ai,
gai e dahi hogi masavaa e dui ange ai;
e dahi masavaa e dee mmuu ai,
gai e dahi hogi masavaa e pasa ai;
8 e dahi masavaa e hagadau aaloha ai,
gai e dahi hogi masavaa e hagadau kino ai;
e dahi masavaa e hebagi ai,
gai e dahi hogi masavaa e nnoho paba ai.
9 Gai se aha naa a tangada e mau i ana hegau kona e hai? 10 Au gu gidee de hegau daemaha a de Maadua gu hagauda ange gi honga o dangada. 11 Ia gu hai mee alodahi gi mahamaha i dono masavaa. Ia gu hai gi iloo e dangada de masavaa e dee ngado mai, aagai gilaadeu tigi maua i de tonu ange gi mee a de Maadua gu hai mai i taamada ga dae ai gi de hagaodi. 12 Au e iloo bolo e deai ange donu se mee e danuaa ange gi dangada, gai go malangilangi ma de hai tanuaa i de masavaa olaadeu e mouli ai. 13 Dangada alodahi gi gaimee ma de unu aama de malangilangi i alaadeu hegau ne hagaduu ngae ga hai; de mee nei se mee ngadi gaamai i daho de Maadua. 14 Au e iloo bolo mee alodahi a de Maadua ne hai e daakodo naa donu ga hano ai; e deai donu mee e maua i de hagapuni ange aabe go de kave gee ai. Gai de Maadua ne hai gi dagodo bee nei, gi maatagu ai dangada i de ia.
15 Mee e hanu iainei gu hanu huu i mua,
gai mee e loomai, gu lava donu i de hai i mua;
gai de Maadua e ahe ange ma e hai mee gu hai i masavaa gu hulo.
De hagamodu dee heohi o de mouli nei
16 E dahi ange agu mee ne gidee i lalo de laa:
de mommee iai de hagamodu heohi, gai iai hogi de baubau;
de mommee iai de mee heohi, gai de baubau i kilaa hogi.
17 Au ne hagadaba i ogu lodo,
“De Maadua e hagamodu naa muna o tangada heohi ma tangada baubau,
go hiidinga e dahi masavaa ange gi mee alodahi, ma hegau alodahi.”
18 Au ne hagadaba bolo de Maadua e hagatale dagodo lodo o dangada, gi gidee ai e gilaadeu bolo gilaadeu e bei dagodo o denga manu dolodolo. 19 Gai de hagaodi o tangada ma de hagaodi o denga manu dolodolo e dagodo daudahi donu huu; gilaadeu alodahi e maakau naa. Gai se dagodo daudahi delaadeu hai e manamanava ai; tangada e dee kii ange i denga manu. Mee nei alodahi e deai donu olaadeu haigamaiana. 20 Alodahi e hulo gi de mommee daudahi; alodahi ne daamada mai i de gelegele, gai e aahe ange naa hogi gi de gelegele. 21 Goai e iloo be de hagasaalunga o tangada e hanage gi lunga, gai de hagasaalunga o de manu e hano iho gi lo te gelegele?
22 Gai au gu gidee bolo de mee donu huu e danuaa ange gi tangada go dono malangilangi i de hai ana hegau, go hiidinga deenei dono duuhanga. Gai goai e maua i de hagaahe mai ia gi diiloo mee e hai i dua dono magau?