4
Hanu hagadaagangaa mee hai ngadaa
1 Gai au ne ahe ange hogi ga tilo de vaivai haia o dangada i lalo de laa.
Au ne gidee loimada o dangada e vaivai haia,
gai e deai dangada e hagaaneane ina gilaadeu.
Ssauaa gu gaavange gi gilaadeu e vaivai haia dangada;
gai e deai donu se dangada e balea ange gilaadeu.
2 Au ne tuhi de gau maakau,
go gilaadeu gu maakau odi laa,
gilaadeu e malangilangi ange i gilaadeu goi mouli.
3 Aagai tangada e danuaa ange i gilaau ngaadahi
go tangada tigi haanau laa,
ia tigi gidee denga hegau baubau e hai i lalo de laa.
4 Au ne gidee hogi bolo hegau alodahi ma denga hegau labagau alodahi ne hai i hiidinga de lodo gaiaa o tangada i tangada ange laa. De mee nei e deai hogi ono haigamaiana, gai e bei de ngadi doolohi a tangada de madangi.
5 Tangada lodo senga e ngadi noho donu huu ga hagapogo luoono lima,
ga hagahiigai ai donu huu ia.
6 De lima e honu laa i de noho baba,
e danuaa ange i lodo luu lima e hoohonu laa i denga hegau kona,
ma de ngadi doolohi a tangada de madangi.
7 Au ne gidee ange hogi hanu mee deai olaadeu haigamaiana i lalo de laa:
8 E dahi dangada e noho sogosogo,
e deai sana dama daane be se daina daane.
Gai e dee maua donu gi lava ana hegau e hai,
gai ia e dee maua hogi gi malangilangi i dono lava.
Gai ia e hagadaba, “Goai donu oogu e hai hegau kona ange nei aagena,
gai gu aha gu dee hai ai nei donu huu au de mee e danuaa mai gi de au?”
De mee nei e deai hogi ono haigamaiana, gai se hegau hagadaemaha!
9 Dogolua dangada e danuaa ange i dahi dangada sogosogo,
go hiidinga e lagolago ange alaau mee e mau i alaau hegau ngaadahi.
10 Gai noo dahi gilaau gu baguu,
gai dono soa e maua i de bale ange ia.
Aagai e hagaaloha tangada e baguu laa,
gai e deai donu se dangada e hagahidi age ia!
11 E bei ai hogi, noo e dogolua dangada e hebaa ma e daakodo ai,
gai gilaau e mahanahana.
Aagai dee hee de hai o dahi dangada sogosogo
e maua ai gi mahanahana?
12 Tangada sogosogo e maua gi hagadee kii ina,
gai e dogolua dangada e maua i de buibui gilaau.
Taula e dua dolu laa e dee moolau de modu.
13 Tama daane hagaau aloha heiangi e danuaa ange i dahi hodooligi madumadua lodo senga gu dee maua laa i de hagallongo dahi muna e hagakana ange, 14 e dee galemu be tama daane laa ne sao mai i lo te hale pono ga hodooligi, aabe ia ne haanau i dono nohoanga hodooligi ga hagaau aloha. 15 Au ne gidee bolo alodahi e mouli laa ma de seesee i lalo de laa ne daudali ange i dahi gauligi, go de ia ne gaavee tuulanga o de hodooligi. 16 Gai e soa dangada aana e dagi. Aagai dangada e loomai i ono dua e dee malangilangi i de ia. Ni muna abodonu, de mee nei e deai hogi ono haigamaiana, gai e bei de ngadi doolohi a tangada de madangi.