6
1 E dahi hogi mee baubau aagu gu gidee i lalo de laa, gai e hagadaemaha ange gi dangada: 2 noo de Maadua e gaavange gi tangada de lava, ma goloa lagolago aama de hagadubu, gai gu deai donu se mee daudahi oona e duasala ai, aagai de Maadua e dee dugu ange ia gi hagadanuaa i mee nei, gai se dangada gee donu e hagadanuaa ai. De mee nei e deai hogi ono haigamaiana, gai se mee hagadaemaha baubau.
3 Noo tangada e hagadili e lau dama ma de mouli i ngadau lagolago, gai ga daulooloa naa donu dono mouli, gai noo ia e dee maua gi malangilangi i mee danuaa o de mouli nei, gai teai hogi dangada ne danumia ia, gai au e hagadaba bolo tama ssege e danuaa ange i de ia. 4 Go hiidinga teai haigamaiana dono haanau ga lava ga hano i lo te gohu, gai dono ingoo gu haolia i de gohu. 5 Gai tee gidee donu e ia de maalama o de laa aabe ne iloo e ia hanu mee, gai ia e mabu ange i taane laa, 6 e dee galemu donu taane laa e mouli i e mano ngadau, aagai ia tee maua gi dae ono lodo i mee danuaa. E aha, e dee se mommee daudahi o dangada alodahi e hulo laa aagena?
7 Hegau alodahi a tangada ni mee e ssala ai ana gai,
gai ia e dee maua donu gi bosu ai.
8 Gai se aha o tangada iloo mee
e kii ange ai i tangada lodo senga?
Gai se aha o tangada hagaau aloha e mau,
i dana iloo dono hai e ngalungalue ai i magavaa o dangada?
9 E danuaa ange doo malangilangi i au mee e gidee,
i doo galo ange gi mee e deai i oo daha.
De mee nei e deai hogi ono haigamaiana,
gai e bei de ngadi doolohi a tangada de madangi.
10 Mee e hanu gu hanu donu olaadeu ingoo,
gai dagodo o tangada gu iloo huu i mua;
gai e deai donu se dangada e maua i de hagadaumee ange
gi tangada e mmahi ange laa i de ia.
11 De lagolago muna a tangada e tala,
gai e kii ange hogi teai olaadeu haigamaiana;
gai ni aha ai naa a tangada e maua i mee nei?
12 Gai goai e iloo be se aha e danuaa ange gi tangada i dono mouli, i laangi momo ma teai haigamaiana oona e mouli ai nei, gai e moolau de odi bei dagodo o de goohunga? Gai goai e maua i de tala ange gi de ia be ni aha e hai i lalo de laa i dua dono magau?