9
De hagaodi o dangada alodahi
1 Au ne hagasaele mee nei alodahi ga hagadaba bolo gilaadeu e heohi ma gilaadeu e heiangi, aama alaadeu hegau, go de Maadua e hagasauaa ina. Gai e deai donu se dangada e iloo be go de aaloha aabe go de kino e gaavange gi de ia. 2 Gai de hagaodi o dangada alodahi se dagodo daudahi — tangada heohi ma tangada baubau, tangada danuaa ma tangada dee heohi, tangada gilimalali ma tangada e dee gilimalali ono lodo, tangada e haia sigidaumaha ma tangada e dee haia sigidaumaha.
Mee e hai ange gi tangada danuaa,
e hai ange hogi gi tangada haisala;
gai gilaadeu e haia hagatoo donu
e bei hogi gilaadeu e dee hagatoo donu.
3 Deenei de mee baubau e hai i mee alodahi e hai i lalo de laa: de hagaodi o dangada alodahi e dagodo daudahi donu huu. E dahi ange mee, lodo o dangada e hoohonu i de baubau, gai de llodo ssenga e dagodo i olaadeu lodo i de masavaa olaadeu e mouli ai, gai muli mai gilaadeu e hulo gi daho de gau maakau. 4 Tangada goi mouli laa e dahi donu ana tali, gai de gaaduu goi mouli laa e danuaa ange i de laiono gu magau laa!
5 Gai dangada goi mouli laa e iloo bolo gilaadeu e maakau naa donu,
aagai de gau maakau e deai donu alaadeu mee e iloo;
e deai ange donu olaadeu hagaoanga,
gai dangada gu dee manadua hogi gilaadeu.
6 Olaadeu aaloha, delaadeu kino
ma delaadeu lodo gaiaa gu llilo odiodi,
gai e deai ange naa donu selaadeu diba
i dahi mee e hai i lalo de laa.
7 Hannoo, gaina au gai ga malangilangi, ma de unu au uvaini ga lodo danuaa, go hiidinga de Maadua e malangilangi i dau hai mee nei. 8 Gahu i malo tea, gai hagasulu ina doo biho i lolo i masavaa alodahi. 9 Koe gi malangilangi madali doo bodu, go de ia oou e aloha ai, i laangi alodahi e deai haigamaiana, a de Maadua gu gaavadu i doo mouli i lalo de laa, go hiidinga deenei doo duuhanga i de mouli nei, ma au hegau i lalo de laa. 10 Be ni aha naa huu aau e gidee e hai, gai koe hagaduu ngae haia, go hiidinga de mommee o de gau maakau, go de mommee oou gu dai hano naa aagena, e deai donu hegau e hai ai, e deai hogi hagatau, be se iloo mee aabe se heiangi.
11 Au ne gidee ange dahi mee i lalo de laa:
de saavini houhou e dee se mee ange donu huu gi tangada gemo,
taua e dee se mee ange donu huu gi tangada mmahi;
denga gai e dee ni mee ange donu huu gi tangada heiangi,
gai de lava e dee se mee ange donu huu gi tangada iloo mee,
gai de abodonu e dee se mee ange donu huu gi tangada gu agoagona;
aagai de masavaa ma mee e hai ni mee ange gi gilaadeu alodahi.
12 E dahi ange mee: e deai donu se dangada e iloo dono masavaa:
de mamu e buulou i lo te galauna baubau,
gai de manu lele e noodia i dahi sele,
gai e bei ai hogi dangada e gaavee i denga masavaa baubau
e daa hagalele laa donu huu de dae mai gi gilaadeu alodahi.
De heiangi e danuaa ange i de lodo senga
13 Au gu gidee hogi ma de lele ogu mouli i de hagadagodo o de heiangi i lalo de laa. 14 E dahi damaa aduhale e sogoisi dangada iai. Gai dahi hodooligi mmahi ne humai e hebagi ange aagena, ia ne duuli luu baasi ma de hagatuu denga mee e oha ai de aduhale laa. 15 Gai e dahi daane hagaau aloha gai e heiangi e noho i kilaa, ia ne hagaola de aduhale laa i dono heiangi. Aagai teai donu se dangada ne manadua taane hagaau aloha laa. 16 Gai au e hagadaba bolo de heiangi e danuaa ange i de mmahi, e dee galemu donu de heiangi o taane hagaau aloha ne hagangadi mee ina e dangada, gai dangada e deai anga ange gi ana muna.
17 Muna a tangada heiangi e musumusu,
e heohi donu dau hagallongo
i muna a tagi o de gau ssenga e oo laa ma e tala.
18 De heiangi e danuaa ange i denga goloa o de hebagi,
aagai dahi dangada haisala e oha mee danuaa lagolago.