1 Denga lango maakau e hai ga pilo de vai hagamanongi,

gai de lodo senga damaa mee e daemaha ange ono dagodo i de heiangi ma de hagadubu.

2 Lodo o tangada heiangi e dagi ia gi de madau,

aagai lodo o tangada lodo senga e dagi ia gi de masui.

3 Gai ga seesee naa donu tangada lodo senga i honga de haiava, gai ia e senga,

gai ia e hagaago ange gi dangada alodahi bolo ia se dangada senga.

4 Noo dahi dagi gu lili i de goe, gai koe aude dilia doo duulanga,

go hiidinga de daudonu e bale de hagaheohi de haisala laumalie.

5 Au gu gidee dahi mee baubau i lalo de laa,

go de baubau e daamada mai laa i daho dahi dagi:

6 denga duulanga maolunga gu gaavange gi de gau llodo ssenga,

gai denga duulanga maolalo gu gaavange gi de gau lava.

7 Au gu gidee de gau hai hegau i honga hoosa,

gai denga dagi o de henua e seesee, bei de gau hai hegau.

8 Be goai e gelia dahi geelinga e doo ange naa gi ono lodo,

gai be goai e oohaa dahi buibui e gaadia naa i dahi labodo hagammau.*Psa 7.15; Pro 26.27

9 Be goai e hoda ina denga hadu e lagolagohia naa i denga hadu;

gai be goai e hangahanga ina denga duudangaa laagau e hagammae ina naa i mee nei.

10 Noo de hagadaguu e madagabubu,

gai de mada tigi hakaa,

gai e hai gi mmahi tangada e hai hegau ai;

aagai go de labagau o tangada e haia ga ssula hegau.

11 Noo dahi labodo hagammau e kadi tangada i mua de hai gi dala,

gai e deai donu haigamaiana ange gi tangada e haia gi dala.

12 Muna a tangada heiangi e hai gi malangilangi dangada i de ia,

aagai muna a tangada lodo senga e hhoa donu huu dono lae.

13 Ana muna i taamada ni muna lodo senga;

gai de hagaodi o ana muna e baubau gai e bei muna a tangada senga.

14 Tangada lodo senga e lagolago ana muna e tala.

E deai dangada e iloo be ni aha e hai i muli mai;

gai goai e maua i de tala be ni aha e hai i dua dono magau?

15 Hegau a tangada lodo senga e hagadalea donu huu ia,

ia e dee iloo de haiava e hano ai gi de aduhale.

16 E vakaa naa de henua noo dono hodooligi se gauligi,

gai ono dagi e hai daonga mai i taiao.

17 E manuuia de henua noo dono hodooligi se dangada aamua abodonu,

gai ono dagi e daonga i de masavaa heohi —

e hagammahi ai olaadeu angaanga, e dee go de unu gi ssenga!

18 Noo tangada e vaiduu, gai laagau o de hale gu pobo,

gai noo tangada e ngadi noho, gai de hale gu vava.

19 Denga gai ne hai gi kada dangada,

gai denga uvaini e hai ga malangilangi tangada,

aagai denga sseene e hai ga maua mee alodahi.

20 Koe gi dee hagamalaia ina de hodooligi i oo lodo,

aabe gi hagamalaia ina tangada lava i lo te aabi oou e seni ai;

go hiidinga dahi manu lele o lo te moana e maua i de kave au muna,

gai dahi manu lele e maua i de hagadele au muna e tala.