1 Magaa au pelaoaa gi honga tai

gai koe e ahe ange naa ga gidee i dua hanu laangi lagolago.

2 Duuhaa ange gai gi e dogohidu aabe e dogovalu dangada,

go hiidinga koe e dee iloo be se hai ngadaa bee hee e humai gi honga de henua.

3 Noo denga hagausinga gu hagagohu age,

gai de langi e pala iho naa donu gi honga de henua.

Noo dahi manu somo e baguu gi ngaage aabe go ngaiho,

gai e dagodo naa donu huu i tuulanga laa.

4 Be goai e dagidiiloo de ssau de madangi

e dee doo donu dahi manu daudahi;

gai be goai e daalia gi loage denga hagausinga e dee hagihagi.

5 Koe e dee iloo de hai o de hagasaalunga ne humai ai

aabe go de hai ne hagahale ai denga ivi i lo te dinae o de hine hai dama,

gai koe e dee donu ange hogi gi hegau a de Maadua,

go de ia ne haia mee alodahi.

6 Koe gi doo ina au golee i taiao,

gai koe gi dee ngadi noho i de ahiahi,

go hiidinga koe e dee iloo be dee hee de mee e somo,

go de mee nei aabe go de mee ange laa,

aabe go luu mee nei ngaadahi e ssomo.

7 De maalama e hagamalangilangi,

gai tangada e malangilangi i de tilo de maalama o de laa.

8 Gai ga lagolago naa donu ngadau o tangada e mouli ai,

gai ia e malangilangi i ngadau alodahi.

Aagai ia gi manadua bolo laangi o de gohu e lagolago naa donu.

Gai mee alodahi e loomai e deai donu haigamaiana.

9 Tama daane, koe gi malangilangi i de masavaa oou e dama daane ai,

gai oo lodo gi malangilangi i laangi oou e dama daane ai.

Gai haia oo mee e lodo ai i mee alodahi aau e gidee,

gai koe gi iloo bolo de Maadua e hagamodu naa oo muna i mee nei alodahi.

10 Deenei ai, haia koe gi dee manavasaa,

gai doo angaanga gi deai mee e mmae ai,

go hiidinga de masavaa oou e mmahi ai e deai donu ono haigamaiana.