De Beebaa Dabu Ecclesiastes 12

1 Koe gi manadua de ia ne haia goe

i de masavaa oou e dama daane ai,

i mua de tae mai o denga laangi hai ngadaa,

ma ngadau aau e hagadaba ai,

“Au e dee malangilangi i laangi laa” —

2 i mua de hagagohu o de laa ma de maalama

ma de maasina, aama denga heduu;

i mua de aahe o denga hagausinga i dua de pala de langi;

3 ma de masavaa o de gau hagaloosi o de hale e bolebole ai,

gai denga daane mmahi gu gogo gi mua;

de masavaa o denga mee e maamaa ina mee

e dee maua ai i de maamaa, i hiidinga gilaadeu gu sogoisi,

gai gilaadeu e hagaduidui mai i lodo abaaba vaaligiligi gu dee gidee;

4 de masavaa o denga abaaba i de baasi ange gi de haiava gu pono;

gai gu dai dee langona de maamaa mee;

tangada e aala i de koo o denga manu,

gai gu dai dee langona taahili o denga damaa hine;

5 de masavaa olaadeu gu maatagu ai i de mommee maolunga,

gai denga mee hagamaatagu gu honga denga haiava;

i de masavaa e aala ai hua o de almond,

gai de itebuubuu gu tagi luoono vae,

gai gu deai donu se lodo e hanage i ono lodo;*

go hiidinga tangada e hano gi dono mommee e dee ngado mai,

gai de gau hinangalosaa e hulo saele i honga haiava;

6 i mua de modu taula selevaa,

be go de maoha o de boolo goolo,

ma de maoha de mee hhao vai i gaogao ssaalingaa vai,

aabe go de maoha o de hagasii i gaogao de vai geli,

7 gai de mama o de gelegele e ahe ange naa gi de gelegele, ne daamada mai ai laa,

gai de hagasaalunga e ahe gi daho de Maadua ne gaavange laa.

Muna hagamogomogo hagaodi

8 Tangada Agoago e hagadaba,

“E deai haigamaiana! E deai haigamaiana!

Mee alodahi e deai donu haigamaiana!”

9 Tangada Agoago e dee se heiangi donu huu, aagai ia e agoago ange hogi dangada i de iloo mee. Ia ne hagasaele ma de ssala gi donu ange ia, ma de hagamaumau ma de hagatau muna heiangi. 10 Tangada Agoago ne ssala gi gidee denga muna e danuaa ma de heohi, gai ana mee ne sisi ni muna abodonu gai e heohi.

11 Muna a de gau heiangi e bei laagau a tangada hagaloosi e hagabaa ai laa ana manu, alaadeu dalaa muna gu hagabudu ma gu daohi e bei denga neele gu tugi laa ma gu makaga — ni muna nii dahi dangada hagaloosi ssiibi. 12 Dagu dama, koe gi kana ange gi dagidiiloo denga mee laa tua o mee nei.

E deai naa donu se tuu de sisi denga beebaa lagolago, gai de hagamaumau mee e hagataalea donu.

13 Gidaadeu gu langona mee alodahi;

gai aanei muna hagaodi:

koe gi madagu i de Maadua ma de daohi ana hainga;

deenei donu de hegau laumalie a tangada e hai.

14 Go hiidinga de Maadua e hagamodu naa dagodo o hegau alodahi,

ma mee alodahi ne hai hagammuni laa,

e dee hilihili be danuaa aabe baubau.

*12:5 gai gu deai donu se lodo e hanage i ono lodo: muna Hebrew i kinei e dee iloo danuaa dono hagadoonunga.