Taahili Dau
a Solomon
(Song of Songs)
Hanu dagodo o de beebaa nei
De beebaa go Taahili Dau (aabe Song of Songs) go Solomon ne siia (1.1), i daha de masavaa o dono nohoanga hodooligi. Gai ni daahili i dagodo o de aloha. Mee lagolago i lo te beebaa nei, go daahili a dahi daane ange gi dahi hahine, ma daahili a dahi hahine ange gi dahi daane.
De gau Ssuu e hagataba bolo daahili nei, se ada e tala ai dagodo mee e hai i magavaa o de Maadua ma ono dangada, gai denga Christian bolo go de ada i dagodo mee e hai i magavaa o Klisdo ma de Nohoanga dabu.
Dahi gubu hagamogomogo: “Au nii dogu dau soa, gai dogu dau soa niiagu; ia e haangai ana ssiibi i magavaa o denga lilii” (6.3).
Denga vaevaaenga
Tahi daahili (1.1—2.7)
De lua daahili (2.8—3.5)
Tolu daahili (3.6—5.1)
De haa daahili (5.2—6.3)
De lima daahili (6.4—8.4)
De ono daahili (8.5-14)
1
1 Taahili dau a Solomon.*1 Ki 4.32
Tahi daahili
De hine dau soa
2 Ia gi oso ina mai au i hanonga lagolago,
go hiidinga doo aloha e danuaa ange i uvaini.
3 Doo vai hagamanongi e manongi danuaa;
doo ingoo e bei de lolo manongi gu llingi laa,
deelaa ai, denga damaa hine e aaloha i de goe.
4 Gaavee au madali goe; gidaau ga hagamoolau e hulo!
De hodooligi gu kave au gi lodo ono aabi.
Denga haahine
Gimaadeu e malangilangi naa ma de llodo danuaa i de goe,
gimaadeu e tuhi naa doo aloha;
doo aloha e danuaa ange i denga uvaini.
De hine dau soa
E heohi donu delaadeu aaloha i de goe!
5 Denga damaa hine o Jerusalem,
au e uliuli, gai e mahamaha,
bei denga hale malo o Kedar,
ma denga malo buibui o Solomon.
6 Goodou gi dee haaina mai au i hiidinga au e uliuli,
i hiidinga go de laa ne haia au ga uliuli.
Ogu daina daane ne llili i de au
gai gilaadeu ga hai au gi diiloo ange denga veelengaa grape;
gai au ne tili donu huu dagu veelengaa grape.
7 De ia oogu e aloha ai, daalaa mai
be go hee aau e haangai ai au ssiibi,
gai go hee o au ssiibi e hagammabu ai i de hualaangi.
Gai gu aha gu hai ai gi bei au dagodo o de hine e haoli dono biho
i gaogao denga hagabuulingaa ssiibi o oo soa?
Taane dau soa
8 De hine mahamaha hugadoo i denga haahine, noo koe e dee iloo,
gai koe daudali ange i duulangaa dabuvae o de hagabuulingaa ssiibi,
ma de kave au guudi gi gaimee
i gaogao hale malo o de gau hagaloosi ssiibi.
9 Dogu dau soa, koe e bei dahi hoosa hahine,
e daangia laa denga hada hebagi o Pharaoh.
10 Oo hakai dalinga e hagamahamaha luoo galaahuu,
doo ua e mahamaha i de dau ai hadu hagamogomogo.
11 Gimaadeu e hai naa hanu hakai dalinga goolo moou,
e hagadaakodo ange gi honga denga selevaa.
De hine dau soa
12 De masavaa o de hodooligi e dagodo ai i honga dono moenga,
gai de manongi o dogu vai i lo te moana.
13 Dogu dau soa e bei tamaa beagi iai laa mee maanongi,
e dagodo laa i magavaa luoogu gaanuunu.
14 Dogu dau soa e bei hogi de gau looloa huaala o de henna
mai i denga veelengaa grape o En Gedi.
Taane dau soa
15 Dogu dau soa, ga dae laa doo mahamaha!
Koe e mahamaha mmao!
Luoo ganomada e bei e lua manu kono.
De hine dau soa
16 Dogu dau soa, koe e mahamaha mmao!
Koe e mahamaha abodonu!
De leebunga o taau moenga e nuui.
17 Denga dogai o taau hale e hai i cedar,
gai denga gili hale e hai i cypress.