2
De hine dau soa
1 Au e bei dagodo o de rose o Sharon,
ma de lilii e somo laa i lodo geelonga.
Taane dau soa
2 Dogu dau soa i magavaa o denga damaa hine
e bei de lilii i magavaa o denga manu daladala.
De hine dau soa
3 Dogu dau soa i magavaa o denga dama daane,
e bei de apple i magavaa o denga manu ssomo o lodo henua.
Au e malangilangi i de noho i lalo dono malu,
gai au e hiigai ina ono hua.
4 Ia ne kave au gi de mommee hai daonga,
gai dono hagailonga i ogu elunga go de aloha.
5 Haia gi hanu ogu mahi i denga raisin,
haangai ina mai au i denga apple,
i hiidinga dogu aloha gu hai au ma gu magi.
6 Dono lima masui e lango age ai dogu biho,
gai dono lima madau e buuludi mai au.
7 Denga damaa hine o Jerusalem,
au e hagatoo donu adu gi goodou i ingoo o denga gazelle,
ma denga dia haahine o lodo henua:
goodou aude haangona ange de aloha
ga dae ai gi dono lodo e ala.
De lua daahili
De hine dau soa
8 Hagalaangona adu de leo o dogu dau soa!
Tilo, deenei ia gu humai nei,
ia e savini mai laa honga denga mounga,
ma de lellele mai laa honga denga duuduu.
9 Dogu dau soa e bei dahi gazelle,
aabe se dia daane.
Tilo, ia gu duu mai i tua omaadeu buibui,
ma e galo mai ai i tua denga abaaba vaaligiligi,
ma magavaa o denga gaini laagau o de hale.
10 Dogu dau soa e basa mai gi de au,
“Dogu dau soa, dagu ia mahamaha,
humai madali au e hulo gidaau.
11 Tilo, gu ui de masavaa hagamagalili;
gu ui de masavaa bala langi.
12 Denga huamanu i honga de henua gu aala;
gu dae mai de masavaa e daahili ai,
gai denga manu kono gu koo i honga taadeu henua.
13 De fig gu loage ono hua,
gai denga huaala o de grapevine gu manongi mai.
Dogu dau soa, hidi age humai;
dogu soa mahamaha, humai madali au.”
Taane dau soa
14 Dagu manu kono e noho laa i lo te baba,
ma de mmuni i magavaa hadu i gaogao de mounga,
hagasula mai gi gidee e au luoo mada,
haia gi langona e au doo leo,
go hiidinga doo leo e maamaane,
gai luoo mada e mahamaha.
15 Booboogia denga gaaduu de vao,
go denga gaaduu de vao vaaligiligi,
e oohaa laa denga veelengaa grape,
go hiidinga adaau veelengaa grape gu aala ono hua.
De hine dau soa
16 Dogu dau soa niiagu, gai au niiana;
ia e haangai ana ssiibi i magavaa o denga lilii.
17 Ga dae ai gi de ao de mee,
gai gu ui de gohu,
dogu dau soa, ahe mai;
koe gi bei dagodo o dahi gazelle
aabe go dahi dia daane gauligi
i honga denga mounga haduhadua.*denga mounga haduhadua, aabe go denga mounga o Bether.