1 Boo alodahi i honga ogu moenga

gai au ne ssala de ia oogu e aloha ai;

au ne ssala ia, aagai au tee gidee ia.

2 Au e hidi age naa e hano laa lo te aduhale

gi lodo haiava ma lodo duu malaelae i kilaa;

gai au ga ssala ai de ia oogu e aloha ai.

Au ne ssala ia, aagai au tee gidee ia.

3 Denga daane hagaloosi ne hedae mai,

i de masavaa alaadeu e hagaloosi ai i lo te aduhale.

“Goodou gu gidee naa de ia oogu e aloha ai?”

4 Gai au ne damaa hano donu huu ga ui i gilaadeu,

gai au gu gidee de ia oogu e aloha ai.

Gai au ga buuludi ange ia ga daohi ia gi dee hano

ga dae ai gi dagu kave ia gi de hale o dogu dinana,

ma lo te aabi o de hine ne hai dama i de au.

5 Denga damaa hine o Jerusalem,

au e hagatoo donu adu gi goodou i ingoo o denga gazelle,

ma denga dia haahine o lodo henua:

goodou aude haangona ange de aloha

ga dae ai gi dono lodo e ala.

6 Goai deenei e humai nei i de vao

bei dagodo o de useahi,

gai gu hagamanongi i myrrh ma frankincense,

ma denga hagadaagangaa mee hagamanongi a de gau hagao mee?

7 Tilo, de hada o Solomon gu humai!

Gai e dinoono daane hebagi e hagaloosi ina ange ia,

gilaadeu ni daane dau i Israel.

8 Gilaadeu alodahi e dau alaadeu gadilaasa

gai ni daane dau i de hebagi;

dahi ma dahi e dau dana gadilaasa i honga dono dege,

e buibui ai gilaadeu i mee hagamaatagu o de boo.

9 De hodooligi go Solomon ne hai dahi hada moona

i denga laagau mai i Lebanon.

10 Ia ne hai ono vae ga haoli i selevaa,

gai tua ne hagalaagii i goolo.

Tuulanga e nnoho ai e haoli i malo purple;

gai denga damaa hine o Jerusalem ne haoli hogi ono lodo i de aloha.

11 Damaa hine o Zion, goodou ssao mai,

diiloo de hodooligi go Solomon, ma dono hau hodooligi,

go de hau a dono dinana ne hagahau ai ia

i de laangi oona ne hai bodu ai,

go de laangi oona ne malangilangi ai.