4
Taane dau soa
1 Dogu dau soa, ga dae laa doo mahamaha!
Tilo, koe e mahamaha mmao!
Luoo ganomada e bei e lua manu kono i lalo de malo haoli.
Oo ngaangaaulu e bei de hagabuulingaa guudi
e lellele ma e loiho ai i de mounga go Gilead.
2 Oo niho e tea bei de hagabuulingaa ssiibi
gu dahi ma gu hakaugau ma gu loage i lo te vai;
alodahi e dau ngaadahi,
e deai donu se gilaadeu e dee maleva.
3 Luoo malaungudu e bei deleisi mmea,
gai doo ngudu e tilo danuaa.
Luoo galaahuu e bei luu dibaa pomegranate
i lalo doo malo haoli.
4 Doo ua e bei de hale dagitilo maolunga a David,
ne hagaduu ga hagalaagii,*ga hagalaagii: muna Hebrew i kinei e dee iloo danuaa dono hagadoonunga.
ma e daudau ai e mano mee hungihungi,
ni mee alodahi nii denga daane hebagi dau.
5 Luoo gaanuunu e bei e lua gazelle gauligi,
ma luu dama a dahi gazelle,
e gaimee saele laa i magavaa lilii.
6 Ga dae ai gi de ao de mee
gu dee gohu de mee,
gai au e hano naa gi de mounga o denga myrrh
ma tuuduu iai frankincense.
7 Dogu dau soa, koe e mahamaha mmao;
e deai donu se mee baubau daudahi i doo angaanga.
8 Dogu hagababa, humai madali au i Lebanon;
humai madali au gi Lebanon.
Hano iho mai i ulu de mounga go Amana,
ma mai i ulu luu mounga go Senir ma Hermon,
ma mai i de mommee iai hale o denga laiono,
ma mai i mounga iai haonga o denga leopard.
9 Ogu lodo e maanadu donu huu goe, dogu daina hahine, dogu hagababa,
ogu lodo gu maanadu donu huu goe,
i doo galo mai ga tilo au,
ma de hadu hagamogomogo e dau laa i doo ua!
10 Dogu daina hahine, dogu hagababa,
doo aloha e hagamalangilangi mmao!
Doo aloha e hagamalangilangi ange i denga uvaini,
doo vai hagamanongi e manongi ange i denga mee hagamanongi!
11 Dogu hagababa, luoo malaungudu e bei denga madaua hooni,
lalo doo alelo iai denga hooni ma vai uu;
oo malo e manongi bei Lebanon.
12 Dogu daina hahine, dogu hagababa,
e bei de veelenga e lloga laa,
ma de vai gu pono laa.
13 Au manu e doo ni pomegranate hhua danuaa,
ma henna ma nard,
14 ma nard ma saffron, ma calamus ma cinnamon,
ma hagadaagangaa manu iai mee hagamanongi,
ma myrrh ma denga aloe,
aama denga mee hagamanongi danuaa alodahi.
15 Koe e bei de veelenga iai dahi vai,
gai se vai geli iai vai hoou
ma denga vai e ssali iho laa i Lebanon.
De hine dau soa
16 De madangi mai i ngaiho, alahage!
De madangi mai i ngaage, alahage!
Ilihia honga dagu veelenga,
gaavee dono maanongi gi daha.
Haia gi humai dogu dau soa gi lo tana veelenga,
gi mamia ange ai ono huamanu danuaa.