1 Dogu daina hahine, dogu hagababa,

au gu humai gi dagu veelenga,

au gu hagabudu agu myrrh ma agu mee hagamanongi.

Au gu gai de mee e hhao ai hooni ma hooni iai;

au gu unu agu uvaini ma agu vai uu.

Luoomaadeu soa, gooluu gaimee ma de unu;

luu dau soa, gooluu unu gi boobosu!

2 Au e mmoe luoogu mada, gai ogu lodo e ala.

Hagalaangona adu! Dogu dau soa e dugidugi:

“Dogu daina hahine, dogu dau soa, huugea mai de abaaba,

dagu manu kono, dogu soa mahamaha abodonu.

Dogu biho gu ssui lebelebe i de maluulu o taiao,

ogu ngaangaaulu gu ssui i de maluulu o de boo.”

3 Au gu lava i de hagaui dogu malo;

e aha, ga ahe ange au e gahu?

Au gu lava i de hhui luoogu vae;

e aha, ga ahe ange au e hai gi gelegele luoogu vae?

4 De ia oogu e aloha ai ne velo mai dono lima laa magavaa denga laagau,

gai ogu lodo gu bolebole i dogu malangilangi mmao.

5 Au ne hidi age e hhuge ange de abaaba gi de ia oogu e aloha ai;

gai luoogu lima e too mai ai madaua o denga myrrh,

ogu madannia e ssali mai ai denga myrrh

i de masavaa aagu e poo ai de gau o de abaaba.

6 Au ne hhuge ange de abaaba gi dogu dau soa,

aagai ia gu huli ma gu hano.

Gu deai ogu mahi i dagu langona dono leo.

Au ne ssala ia, aagai au tee gidee ia;

au ne hagaagahi ia, aagai ia tee basa mai.

7 De gau hagaloosi ne hedae mai gi de au

i de masavaa alaadeu e hagaloosi saele ai i lo te aduhale.

Gilaadeu ne hagailiili au ga lagohia;

denga daane hagaloosi o de buibui ne kave dogu malo e saabini ai.

8 Denga damaa hine o Jerusalem, au e hai adu gi goodou,

noo goodou gu gidee dogu dau soa,

gai goodou daalaa ange gi de ia

bolo au gu magi i dogu aloha.

9 Ni aha o doo dau soa e kii ange i denga haahine ange laa,

koe de hine mahamaha hugadoo i magavaa o denga haahine?

Ni aha o doo dau soa e kii ange ai i denga dau soa ange laa,

gai koe ga basa mai ai naa bee naa gi gimaadeu?

10 Dogu dau soa e mahamaha ma de mmahi,

ono dagodo e dubu ange i denga daane e dahisemada.

11 Dono biho e mahamaha bei goolo danuaa hugadoo,

ono ngaangaaulu e hadihadi

ma de uli bei de manu lele go de raven.

12 Luoono ganomada e bei e lua manu kono

e toga laa i gaogao denga vai,

gu hakaugau i lodo vai uu,

ma denga hadu hagamogomogo gu hagadaakodo danuaa laa.

13 Luoono galaahuu e bei daanunga

e doo ai mee hagamanongi e kona mmao de manongi.

Luoono malaungudu e bei denga lilii

gai e too madaua mai ai laa denga myrrh.

14 Luoono lima ni laagau goolo

e hagalaagii i denga chrysolite.

Dono angaanga e bei de ivory gu hagamalali,

ma de hagalaagii i denga sapphire.*sapphire, aabe ni lapis lazuli.

15 Luoono vae e bei denga duludulu marble

e hagatuu laa i honga denga dagelo goolo.

Dono angaanga alodahi e bei de mounga go Lebanon,

ma ono cedar danuaa hugadoo.

16 Dono ngudu e maimai mmao,

gai au e vaasuu i ono dagodo alodahi.

Denga damaa hine o Jerusalem,

deenei dogu dau soa, gai deenei dogu soa.