6
Denga haahine
1 De hine e mahamaha ange i denga haahine,
go hee o de ia oou e aloha ai ne hano aagena?
Dee hee dono haiava ne daa ga hano ai,
gai gimaadeu ga bale adu goe e ssala ai ia?
De hine dau soa
2 De ia oogu e aloha ai gu hano gi dana veelenga,
gi de mommee e doo ai denga manu hagamanongi,
e tilo saele ai dana veelenga,
ga hagabudu ai huaala o denga lilii.
3 Au nii dogu dau soa, gai dogu dau soa niiagu;
ia e haangai ana ssiibi i magavaa o denga lilii.
De lima daahili
Taane dau soa
4 Dogu dau soa, koe e mahamaha mmao bei Tirzah,
ma de mahamaha bei dagodo o Jerusalem,
gai e hagalele mouli bei de hagabuulinga hebagi ma olaadeu flag.
5 Huli gee luoo mada i de au,
au e dee maua i de tilo luoo mada.
Oo ngaangaaulu e bei de hagabuulingaa guudi
e loiho laa i de mounga go Gilead.
6 Oo niho e bei de hagabuulingaa ssiibi haahine,
gu hakaugau ma gu loage i lo te vai;
alodahi e dau ngaadahi,
gai e deai donu se gilaadeu e dee maleva.
7 Luoo galaahuu e bei luu dibaa pomegranate
i lalo de malo e haoli ai laa luoo mada.
8 E dinoono bodu o de hodooligi,
ma e dinovalu ono bodu laa daha,
ma denga bua mmoe soa mmao;
9 aagai dagu manu kono, e honu abodonu dono mahamaha, e dahi donu huu,
ia go tamaa hine donu huu a dono dinana,
gai e hagamogomogo i daho de ia ne hanaua ia.
Denga damaa hine e gidee ia e hagataba bolo ia e manuuia;
denga bodu o de hodooligi ma ono bodu laa daha e tuhi hogi ia.
Denga haahine
10 Goai e bei nei dagodo o de maalama o taiao,
ma de mahamaha bei de maasina, ma de maalama bei de laa,
gai e hagamaatagu bei de hagabuulinga hebagi ma olaadeu flag?*e hagamaatagu … flag: muna Hebrew i kinei e dee iloo danuaa dono hagadoonunga.
Taane dau soa
11 Au ne hano iho gi de veelenga hua laagau,
e tilo ai denga huaala i lo te geelonga,
ma de tilo be denga grape gu matili age,
aabe denga pomegranate gu loage olaadeu huaala.
12 Gai au tee angahia donu de masavaa aagu ne maanadu ai
bolo au gu noho i lodo hada o dahi dangada aamua.†bolo au gu noho … aamua: muna Hebrew i kinei e dee iloo danuaa dono hagadoonunga.
Denga haahine
13 Ahe mai, ahe mai, tamaa hine Shulam,
ahe mai, ahe mai,
gimaadeu e llodo e haaina goe.
Taane dau soa
Gu aha gu llodo ai goodou e haaina de hine Shulam,
bei doodou tilo de aanunga i mada i mua o e lua hagabuulinga hebagi?‡e lua hagabuulinga hebagi, aabe go Mahanaim.