7
Taane dau soa
1 Tamaa hine hodooligi,
luoo vae e mahamaha i de ulumagi ange ai mee vae,
luoo gauanga e mmoe bei denga hadu hagamogomogo,
bei de mee a dahi labagau e hai i luoono lima.
2 Doo gona e bei dahi boolo moe
e honu laa i denga uvaini i masavaa alodahi.
Doo dinae e bei de hagabuudungaa grain
e duuli laa luu baasi i denga lilii.
3 Luoo gaanuunu e bei e lua dia gauligi,
go dama a dahi gazelle.
4 Doo ua e bei de hale dagitilo maolunga e hai i ivory.
Luoo ganomada e bei denga mommee gaugau i Heshbon,
i gaogao de haitoga o de buibui o Bath Rabbim.
Doo usu e bei de hale dagitilo maolunga o Lebanon,
e huli ange laa gi Damascus.
5 Doo biho e bei de mounga go Carmel.
Oo ngaangaaulu e bei denga malo purple;
de hodooligi gu haaina donu huu doo biho lloa.*de hodooligi gu haaina donu huu doo biho lloa: muna Hebrew i kinei e dee iloo danuaa dono hagadoonunga.
6 De ia oogu e aloha ai,
ga dae laa doo mahamaha ma doo tilo danuaa,
e hagamalangilangi oo dagodo!
7 Doo angaanga e bei dahi nui,
gai luoo gaanuunu e bei gau looloa huamanu.
8 Au ne hagadaba, “Au ga gage nei i de nui nei,
e hagihagi ai ono hua.”
Luoo gaanuunu gi bei denga gau looloa grape,
de madangi o dau manava e manongi bei denga apple,
9 gai luoo malaungudu e bei uvaini danuaa hugadoo.
De hine dau soa
Denga uvaini gi ssali gi hulo gi dogu dau soa,
gai gi ssali maalie gi honga luoono malaungudu ma ono niho.
10 Au nii dogu dau soa,
gai go au oona e lodo ai.
11 Dogu dau soa, humai, gidaau ga hulo gi de mommee iai veelenga,
gai gidaau ga sseni ai i lodo aduhale vaaligiligi.
12 Gidaau e oho boo age e hulo gi denga veelengaa grape,
e tilo ai be gu matili age hua o denga grape,
be gu aala olaadeu hua
aabe denga pomegranate gu loage olaadeu huaala;
gai au ga hagaago adu ai dogu aloha i de goe i kilaa.
13 Denga mandrake e maanongi mai,
gai gaogao taau haitoga iai hagadaagangaa huamanu lleu,
go huamanu se goodo lleu ma mee gu lleu i mua,
ni mee niiagu gu hagadabena adu gi de goe, dogu dau soa.
*7:5 de hodooligi gu haaina donu huu doo biho lloa: muna Hebrew i kinei e dee iloo danuaa dono hagadoonunga.