1 Mee naa koe gi bei dahi ogu daina daane,

ne unuunu i luu gaanuunu o dogu dinana!

Gai noo au gu hedae adu gi de goe i duaahaho,

gai au ga oso doo usu,

gai e deai donu se dangada e maua i de hagangadi mee ina au.

2 Gai au e dagi naa goe e kave gi de hale o dogu dinana,

go de ia ne agoagona mai au.

Gai au e gaavadu naa uvaini manongi e unu goe,

ma vai o agu pomegranate.

3 Dono lima masui e lango age ai dogu biho,

gai dono lima madau e buuludi mai au.

4 Denga damaa hine o Jerusalem,

au e hagatoo donu adu gi goodou,

goodou aude haangona de aloha

ga dae ai gi dono lodo e ala.

5 Goai de hine e hannagi ange nei gi dono dau sao

ma e loomai ai gilaau i de vao?

Au ne hhango goe i lalo de apple;

go kilaa a doo dinana ne hai dama ai i de goe,

go kilaa ne hai ai ono hagalangona ga haanau ai goe.

6 Haia au bei de mee dau i honga doo hadu manava,

ma de maaga i honga doo lima;

go hiidinga de aloha e mmahi bei de magau,

gai dono maagoda e bei de mommee o de gau maakau.

Gai e dudu bei de ahi mmahi,

gai dono ula e mmahi mmao.*gai dono ula e mmahi mmao, aabe e bei de ahi ula a Tagi Maolunga.

7 Vai lagolago e dee maua i de tuu de mmahi o de aloha,

tolona e dee maua hogi i de hagalilo de aloha.

Noo dahi dangada e gaavange goloa i dono hale e hagao ai de aloha

gai dangada e kada naa donu i de ia.

8 Gimaadeu e dahi omaadeu daina hahine,

gai tigi ssomo mai luoono gaanuunu.

Dee hee demaadeu hai e hai ai demaadeu daina,

i de masavaa o dahi daane e lodo ai e hai bodu ange gi de ia?

9 Noo ia se buibui,

gai gimaadeu ga hagatuu i ono elunga denga hale dagitilo e hai i selevaa.

Noo ia se abaaba,

gai gimaadeu ga hagaduu dahi mee buibui i laagau cedar ga duuli ai ia.

10 Au e bei dahi buibui,

gai luoogu gaanuunu e bei e lua hale dagitilo.

Gai deenei de hai a de ia oogu e aloha ai e tilo ai au:

au e bei tangada e haia gi nnoho paba dangada.

11 Solomon e dahi ana veelengaa grape i Baal Hamon;

ia ne dugu ange de veelenga laa gi hanu dangada gi diiloo ange;

gai dahi ma dahi gi hagao ina huamanu

i e mano dibaa selevaa.

12 Dagu veelengaa grape niiagu donu, gai se mee donu niiagu;

Solomon, koe e maua i de kave e mano selevaa,

gai de gau e diiloo ange denga hua gi gaavee e lualau.

13 Koe, de ia e noho laa i lodo veelenga,

madali oo soa e langona laa doo leo,

haia gi langona e au doo leo!

14 Dogu dau soa, hagamoolau humai,

bei dagodo o dahi gazelle

aabe go dahi dia daane gauligi

i honga denga mounga o mee hagamaanongi.