18
De humai o Jethro gi daho Moses
1 Gai Jethro, ssaulaba o Moses, tangada haimeedabu o Midian, gu langona e ia mee alodahi a de Maadua gu bale ange ai Moses ma dono huaadangada go Israel, aama dana hagassao mai gilaadeu i Egypt.
2 Gai Jethro, ssaulaba o Moses, ne dugu Zipporah, de bodu o Moses i ono daha, i dua de hai a Moses ia gi hano, 3 madali luaana dama daane; de ingoo o dahi go Gershom*Gershom e dagu bei de muna Hebrew, tangada noho gaainga. (go hiidinga ia ne hagadaba, “Au e noho i dahi henua gee”).*Acts 7.29 4 Gai ia ne hagaingoo ange tama daane ange laa go Eliezer†Eli i muna Hebrew e bei go dogu Maadua, gai ezer e bei de bale. (go hiidinga ia ne hagadaba, “De Maadua o dogu damana ne bale mai au ma de hagaola mai au i de gadilaasa a Pharaoh”).
5 Gai Jethro, ssaulaba o Moses, ne humai ga gaamai luu dama daane a Moses ma dono bodu madali ia gi de vao, i de mommee o Moses e hagaduu ai dono hale gaainga i gaogao de mounga o de Maadua. 6 Gai ia ne hagailoo mai gi Moses, ga hai ange bolo ia gu humai gi ono daha, gai ia gu hagaahe mai madali ia dono bodu ma luaana dama daane.
7 Gai Moses ne hano ga hedae ange gi dono saulaba ga ino ange gi de ia, ma de oso ia. Gai gilaau ga madaangudu i mee alaau gu hai, muli mai gai gilaau ne hulo gi de hale malo o Moses e noho ai laa. 8 Gai Moses ga tala ange gi dono saulaba mee alodahi a Tagi Maolunga gu hai ange gi Pharaoh ma de gau Egypt, i hiidinga o de gau Israel, ma hai ngadaa alodahi gu paa i gilaadeu i delaadeu seesee ga loomai, aama de hagaola a Tagi Maolunga gilaadeu.
9 Gai Jethro gu malangilangi i dana langona dagodo de abodonu o Tagi Maolunga ange gi de gau Israel, ma dana hagaola gilaadeu mai i daho de gau Egypt. 10 Gai ia ga hagadaba, “Duuhia Tagi Maolunga i dana hagaola goodou mai i de gau Egypt aama mai i Pharaoh. Gai ia ne hagaola donu de gau Israel mai i lalo o de gau Egypt. 11 Iainei au gu donu bolo Tagi Maolunga e maolunga ange i denga maadua ange laa alodahi, gai ia ne hai de mee nei i daho de gau Egypt, i hiidinga delaadeu hagamaolunga i de gau Israel.” 12 Gai Jethro, ssaulaba o Moses, ne hai dahi sigidaumaha dudu aama hanu sigidaumaha ange laa ange gi de Maadua. Gai Aaron ma dagi alodahi o de gau Israel ga loomai ga gaimee madali gilaau ma Moses i mada luu mada o de Maadua.
De hili a Moses de gau hagamodu muna
(Deut 1.9-18)
13 De laangi i ono dua gai Moses ga daamada de hagamodu denga dee heloongoi i magavaa o dangada. De laangi laa gai dangada ne tuu saele ga tali e hedae ange gi Moses mai i taiao ga boo ai de mee. 14 Gai ga gidee huu e Jethro mee alodahi a Moses ne hai ange gi dangada, gai ia ga ssili ange gi Moses, “Ni hegau aha aau e hai laa ma e bale ange ai dangada? Gai gu aha go koe ai laa donu huu e hagamodu ina denga dee heloongoi o dangada, gai dangada ange laa alodahi ne tuu saele donu huu mai i taiao ga dae ai gi de ahiahi?”
15 Gai Moses ga hai ange gi de ia, “Go hiidinga dangada e loomai gi ogu daha e ssili ai gi iloo e gilaadeu lodo o de Maadua. 16 De masavaa naa huu e dee heloongoi ai magavaa o dangada, gai gilaadeu ga loomai gi ogu daha, gai go au e hagamodu ina de mee heohi i magavaa o dahi dangada ma dono soa, ga tala ange gi gilaadeu denga hagailoo aama hainga a de Maadua.”
17 Gai Jethro ga hai ange gi Moses, “E dee danuaa dau hai e hai ai de hegau naa. 18 Koe e hagadalea donu huu goe aama dangada alodahi e loomai gi de goe, go hiidinga de hegau naa se hegau hai ngadaa donu, noo go koe donu huu e haia. Koe e dee maua donu i de hai sogosogo de hegau naa. 19 Hagalaangona gai au ga tala adu dau hai e hai ai, gai de Maadua gi noho i oo daha. Dau hegau e hai go de hano i magavaa o dangada ma de Maadua, gai koe ga kave olaadeu dee heloongoi gi de Maadua. 20 Gai koe agoagona ange dangada i hagamodu a de Maadua ma ana hainga, ma de hagaago ange delaadeu hai e mouli ai, aama mee alodahi alaadeu e hai. 21 Gai koe hilia hogi hanu daane maatua abodonu mai i magavaa o dangada — ni daane e maatagu i de Maadua, ma de hai hegau i de mee abodonu aama de kino i mee ngadi gaavange hagasenga — ga vaevae ange dangada gilaadeu gi dagina; hanu e dagimano, hanu e dagillau, hanu e dagimadalima, aagai hanu e dagimadaangahulu. 22 Gai gilaadeu gi hagamodu ina muna o dangada i masavaa alodahi; gilaadeu gi gaamai gi de goe mee hai ngadaa, aagai mee hai ngaohie gilaadeu gi hagamodu ina. Gai gi maamaane adu ai gi de goe, gai gilaadeu gi bale adu ai goe i de hegau nei. 23 Gai noo koe e hai hegau i de mee nei, bei de hai a de Maadua gu tala adu gi de goe, gai koe e maua donu i de hai de hegau nei, gai dangada alodahi gu maua hogi i de aahe gi olaadeu hale i de baba.”
24 Gai Moses ne hagallongo ange gi muna a dono saulaba, ga hai mee alodahi aana gu tala ange gi de ia. 25 Moses ne hili mai i magavaa o de gau Israel hanu daane maatua abodonu ga vaevae ange dangada gilaadeu gi dagina; hanu e dagi e mano, hanu e dagi e lau, hanu e dagi e dinolima, gai hanu e dagi e dinoangahulu. 26 Gai denga daane nei ga hagamodu denga dee heloongoi o dangada e dee hai ngadaa laa; aagai denga dee heloongoi e hai ngadaa, gai gilaadeu ga gaamai gi Moses.
27 Aagai Moses ga hagaboo ange gi dono saulaba, ga dugu ia gi ahe gi dono henua.