19
De gau Israel i de mounga go Sinai
1 Gai tolu malama huu i dua de ssao o de gau Israel ga hulo gee mai i de henua go Egypt, gai gilaadeu gu tae gi de vao o Sinai, i de laangi laa donu huu hogi. 2 Gai gilaadeu ne loomai i Rephidim ga hulo gu tae gi de vao o Sinai, ga hagatuu age olaadeu hale gaainga i de vao laa; gai de gau Israel ne hagatuu olaadeu hale gaainga i mada i mua o de mounga.
3 Gai Moses ne hanage gi daho de Maadua i ulu de mounga, gai Tagi Maolunga ga hagahi mai ia i ulu de mounga, ga hai ange, “Daalaa ange muna nei gi dangada o Jacob ma de gau Israel: 4 ‘Goodou gu gidee dagu hai ne hai ai de gau Egypt, aama dagu hai ne hagauda ai goodou i honga luoogu bakau bei de igele, ga gaamai goodou gi ogu daha i kinei. 5 Gai noo goodou e hagallongo mai gi agu muna ma de daudali i dagu hagatoo donu hagaheloongoi, gai au e hili naa goodou mai i magavaa o denga huaahenua alodahi, e hai ai dogu huaadangada hagamogomogo. Niiogu henua i lalo alodahi,*Deut 4.20; 7.6; 14.2; 26.18; Tit 2.14 *1 Pe 2.9 6 gai goodou e hai naa gi se nohoanga hodooligi o de gau haimeedabu niiogu gai se huaahenua dabu.’ Aanei au muna e tala ange gi de gau Israel.” *Rev 1.6; 5.10
7 Deelaa ai, Moses ne ahe iho ga hagahi denga dagi o de gau Israel, ga tala ange muna alodahi a Tagi Maolunga gu tala ange gi de ia. 8 Gai dangada alodahi ne pasa ange, ga hai ange, “Gimaadeu e paba ange donu e daudali i mee alodahi a Tagi Maolunga gu tala adu gi de goe.” Gai Moses ga ahe age e hagailoo ange muna laa gi Tagi Maolunga.
9 Gai Tagi Maolunga ga hai ange gi Moses, “Au e hano iho naa e basa adu gi de goe mai i lo te hagausinga maadolu, gi langona ai e de gau Israel alodahi dogu leo e basa adu ai gi de goe, gi hagadonusia ai e gilaadeu goe iainei ga hano ai.” Gai Moses ga tala ange gi Tagi Maolunga muna a dangada.
10 Gai Tagi Maolunga ga hai ange gi Moses, “Ahe iho gi daho dangada mage hagadabu ina gilaadeu, ma de hai gilaadeu gi daaia olaadeu malo alodahi gi gilimalali ailaa nei aama daiao; 11 gai gilaadeu gi hagadabena ange gi de hagadolu laangi, go hiidinga au e hano iho naa gi honga de mounga go Sinai i madamada o dangada alodahi. 12 Gai koe hagailonga ina de mommee i luu baasi de mounga, ga hai ange, ‘Goodou dagidiiloo gi dee loage goodou gi de mounga, aabe gi hagapaa ange gi tahido. Gai be goai naa huu e hagabaa ange aagena, gai e daa donu gi magau;*Heb 12.18-20 13 dangada gi dee poo ange gi tangada bee nei, aagai tangada bee nei e maga donu gi magau i denga hadu aabe velo i tao; e dee hilihili be se manu aabe be se dangada, ia e dee dugu donu gi mouli.’ Gai de masavaa naa huu e hagadau looloa ai de ili de hanga manu, gai dangada gu maua i de loage gi de mounga.”
14 Gai Moses ne ahe iho i de mounga gi daho dangada, ga hagadabu gilaadeu; gai gilaadeu ga taa olaadeu malo. 15 Gai Moses ga hai ange gi dangada, “Goodou haia gi paba ange goodou gi de hagadolu laangi. Gai denga daane gi dee hagahebaa ma olaadeu bodu.”
16 Gai taiao huu o de hagadolu laangi, gai gu babaa denga hatuli ma de labalaba denga uila, gai de hagausinga maadolu gu haoli de mounga laa, gai gu kona de nganangana de ili o de hanga manu. Gai dangada alodahi i de mommee nnoho gaainga gu bolebole i delaadeu maatagu.*Rev 4.5 *Deut 4.11-12 17 Gai Moses ga dagi mai dangada i de mommee nnoho gaainga e hulo ai gilaadeu e hedae ange gi de Maadua, gai gilaadeu ga hulo ga tuu i gaogao de mounga. 18 Gai de mounga go Sinai gu buu ai de useahi, go hiidinga Tagi Maolunga gu hano iho gi ono elunga i de ahi. Gai de useahi laa gu haoli kilaa bei dagodo o de useahi o de ahi mmahi, gai de mounga laa alodahi gu ngalungalue. 19 Gai ga kona huu de nganangana de ili o de hanga manu. Gai Moses ga basa, gai de Maadua ne basa ange gi de ia.*de Maadua ne basa ange gi de ia, aabe gai de Maadua ne basa ange gi de ia i de hatuli.
20 Gai Tagi Maolunga ga hano iho gi honga de mounga go Sinai, gai ia ga hagahi mai Moses gi hanage gi ulu de mounga, gai Moses ga hanage. 21 Gai Tagi Maolunga ga hai ange gi Moses, “Ahe iho daalaa ange gi dangada, gi dee hagammahi ai gilaadeu gi loomai e tilo au, gai e soa naa gilaadeu e maakau. 22 Gai de gau haimeedabu e loomai laa ga paa ange gi Tagi Maolunga gi hagadabu ina hogi gilaadeu, ana vakaa ga daia e Tagi Maolunga gilaadeu ga maakau.”
23 Gai Moses ga hai ange gi Tagi Maolunga, “Dangada e dee maua i de loage gi de mounga go Sinai, i hiidinga koe ne hai mai gi gimaadeu, ‘Goodou hagailonga ina dahi ngaadonga i luu baasi de mounga mage hagadabu ina.’ ”
24 Gai Tagi Maolunga ne hai ange gi Moses, “Ahe iho mage gaavage Aaron madali goe, aagai koe aude dugua ange de gau haimeedabu ma dangada gi loage gi de mommee o Tagi Maolunga iai, kana daia e au gilaadeu ga maakau.”
25 Gai Moses ga hano iho gi daho dangada ga tala ange muna nei gi gilaadeu.