20
De Madaangahulu Hainga
(Deut 5.1-21)
1 Gai de Maadua ne tala muna nei alodahi, ga hagadaba:
2 “Go au go Iahweh, doo Maadua, ne hagasao ina mai laa goe i de henua go Egypt, go de henua oou nogo hai hegau hagaduasala ina ai.
3 Aude haia hanu diinonga gee gi maolunga ange i de au.
4 Aude haia dahi diinonga moou, gi hagadagodo ina ange gi dahi mee i de langi, be go dahi mee i henua i lalo, aabe go dahi mee i lo te vai i lalo de henua.*Exo 34.17; Lev 19.4; 26.1; Deut 4.15-18; 27.15 5 Aude daumaha ange gi gilaadeu, aabe gi hai hegau ange gi gilaadeu; i hiidinga go au go Iahweh doo Maadua, au se Maadua e maagoda. Au e hagaduasala denga dama, i hiidinga baubau o olaadeu maadua, ga dae ai loo gi tolu ma de haa atangada o dangada e kino i de au,*Exo 34.6-7; Num 14.18; Deut 7.9-10 6 aagai au e abodonu ange gi atangada soa o dangada e aaloha i de au, ma de daohi agu hainga.
7 Aude hagangadi mee ina de ingoo o Iahweh doo Maadua, go hiidinga Tagi Maolunga e hagahaisala donu tangada e hagangadi mee ina dono ingoo.*Lev 19.12
8 Manadua de laangi o Sabbath ma gi haia gi dabu.*Exo 16.23-30; 31.12-14 9 E ono oo laangi e hai hegau ai, ga hagalava au hegau alodahi,*Exo 23.12; 31.15; 34.21; 35.2; Lev 23.3 10 aagai de hidu laangi go Sabbath a Tagi Maolunga doo Maadua, aude haia ai dahi hegau daudahi, go koe ma dau dama daane, ma dau damaa hine, ma doo daane hai hegau, ma doo hahine hai hegau, ma au manu, aama tangada henua gee e nnoho i oo daha. 11 Go hiidinga ne ono laangi a Tagi Maolunga ne hai ai de langi ma henua i lalo, ma tai ma mee alodahi i ono lodo, aagai ia ne hagamabu i de hagahidu laangi. Deelaa ai, Tagi Maolunga ne hagamanuuia de hidu laangi ga hai gi dabu.*Gen 2.1-3; Exo 31.17
12 Hagadubu ina doo damana ma doo dinana, gi daulooloa ai doo mouli i honga de henua, a Tagi Maolunga doo Maadua e gaavadu gi de goe.*Deut 27.16; Mat 15.4; 19.19; Mark 7.10; 10.19; Luke 18.20; Eph 6.2-3
13 Aude daia tangada gi magau.*Gen 9.6; Lev 24.17; Mat 5.21; 19.18; Mark 10.19; Luke 18.20; Rom 13.9; Jms 2.11
14 Aude dagodo haisala.*Lev 20.10; Mat 5.27; 19.18; Mark 10.19; Luke 18.20; Rom 13.9; Jms 2.11
15 Aude gaiaa.*Lev 19.11; Mat 19.18; Mark 10.19; Luke 18.20; Rom 13.9
16 Aude hagabaubau ina tangada e baa adu gi de goe i hanu muna hhadu.*Exo 23.1; Mat 19.18; Mark 10.19; Luke 18.20
17 Aude nnoo ange gi de hale o tangada e baa adu gi de goe. Aude nnoo ange gi de bodu o tangada e baa adu gi de goe, be go dono daane hai hegau, be go dono hahine hai hegau, be go dana kaau, be go dana donkey, aabe go dahi ana mee daudahi.” *Rom 7.7; 13.9
De maatagu o dangada
(Deut 5.22-33)
18 Gai ga langona huu e dangada de babaa denga hatuli ma de labalaba denga uila, gai gu ili de hanga manu, ma de buu age o de useahi i honga de mounga, gai gilaadeu gu maatagu ma de bolebole; gai gilaadeu ga hulo ga tuu i de mommee mmao,*Heb 12.18-19 19 gai gilaadeu ga hai ange gi Moses, “Go koe donu e basa mai gi gimaadeu, gai gimaadeu ga hagallongo au muna; aagai e dee go de Maadua e basa mai gi gimaadeu, ana vakaa ga maakau gimaadeu.”
20 Gai Moses ga hai ange gi dangada, “Goodou aude maatagu, go hiidinga de Maadua gu humai e hagatale goodou e tilo ai dagodo o oodou lodo, gai gi dagodo ai de madagu o de Maadua i oodou lodo, gi dee haisala ai goodou.”
21 Gai dangada ne hulo ga tuu mai i de mommee mmao, gai Moses ga hano ga ulu gi lo te hagausinga uli o de Maadua iai laa.
Denga hainga o de mommee o ssigidaumaha
22 Gai Tagi Maolunga ne hai ange gi Moses, “Daalaa ange muna nei gi de gau Israel: ‘Goodou gu gidee ma de langona dogu basa adu gi goodou mai i de langi: 23 Goodou aude haia hanu diinonga i ogu gaogao; goodou e dee hai hanu diinonga i selevaa aabe ni goolo.
24 Goodou haia dahi mommee o ssigidaumaha i gelegele, ga hai ai oodou sigidaumaha dudu, ma oodou sigidaumaha hagadanuaa magavaa i oodou ssiibi ma guudi aama kaau. Gai be go hee naa huu aagu e hai gi hagadubu ina ai dogu ingoo, gai au e humai naa ga hagamanuuia goe. 25 Gai noo koe e bae dahi mommee o ssigidaumaha hadu mai gi de au, gai koe e dee hai i hadu gu hagamalali; go hiidinga noo koe gu daadaa dahi hadu i goloa baalanga gai gu dee gilimalali. 26 Gai koe aude gage age i de gaagenga gi de mommee o ssigidaumaha, kana gilisau ange goe gi de mommee o ssigidaumaha.’
*20:4 Exo 34.17; Lev 19.4; 26.1; Deut 4.15-18; 27.15
*20:5 Exo 34.6-7; Num 14.18; Deut 7.9-10
*20:7 Lev 19.12
*20:8 Exo 16.23-30; 31.12-14
*20:9 Exo 23.12; 31.15; 34.21; 35.2; Lev 23.3
*20:11 Gen 2.1-3; Exo 31.17
*20:12 Deut 27.16; Mat 15.4; 19.19; Mark 7.10; 10.19; Luke 18.20; Eph 6.2-3
*20:13 Gen 9.6; Lev 24.17; Mat 5.21; 19.18; Mark 10.19; Luke 18.20; Rom 13.9; Jms 2.11
*20:14 Lev 20.10; Mat 5.27; 19.18; Mark 10.19; Luke 18.20; Rom 13.9; Jms 2.11
*20:15 Lev 19.11; Mat 19.18; Mark 10.19; Luke 18.20; Rom 13.9
*20:16 Exo 23.1; Mat 19.18; Mark 10.19; Luke 18.20
*20:17 Rom 7.7; 13.9
*20:18 Heb 12.18-19