32
De kaau goolo
(Deut 9.6-29)
1 Gai ga gidee huu e dangada bolo Moses gu mmule de ahe iho i ulu de mounga, gai gilaadeu ga hagabuni mai gi daho Aaron, ga hai ange gi de ia, “Haia hanu diinonga gi dagina gidaadeu, go hiidinga gidaadeu e dee iloo be ni aha gu hai ange gi Moses, taane ne hagassao ina mai gidaadeu i de henua go Egypt.” *Acts 7.40
2 Gai Aaron ga hai ange gi gilaadeu, “Goodou aaua denga hakai goolo i dalinga o oodou bodu, ma oodou dama alodahi gaamai gi ogu daha.” 3 Gai dangada alodahi ga aau hakai i olaadeu dalinga ga gaavange gi Aaron. 4 Gai Aaron ne kave hakai laa i daho dangada ga hagavaivai, ga hai ai dahi kaau goolo. Gai gilaadeu ga hagataba, “De gau Israel, aanei denga diinonga ne hagassao ina mai goodou i de henua go Egypt.” *1 Ki 12.28; Acts 7.41
5 Gai ga gidee huu e Aaron, gai ia ga hai dahi mommee o ssigidaumaha ga dugu i mada i mua o de kaau goolo laa. Gai ia ga hai dahi hagailoo ga hai ange, “Daiao gai gidaadeu e hai ange taonga gi Tagi Maolunga.” 6 Gai dangada ne oho age i de laangi i ono dua, ga hai denga sigidaumaha dudu ma de gaamai denga sigidaumaha hagadanuaa magavaa. Gai de huaadangada ga nnoho iho ga gaimee ma de unu, ga lava ga hiihidi age ga hai denga dahulinga baubau.*1 Co 10.7
7 Gai Tagi Maolunga ga hai ange gi Moses, “Hagamoolau hano iho gi lalo, go hiidinga au dangada ne hagassao mai i de henua go Egypt, gu hai denga dahulinga hakino gee. 8 Gilaadeu ne moolau donu de hulo gee mai i de haiava aagu gu tala ange gi gilaadeu; gilaadeu gu lava i de hai dahi kaau baalanga, ma gu daumaha ma de sigidaumaha ange aagena, ma de hagataba, ‘De gau Israel, aanei denga diinonga ne hagassao ina mai goodou i de henua go Egypt!’ ”
9 Gai Tagi Maolunga ne hai ange gi Moses, “Au gu lava donu i dagu gide dagodo o de huaadangada nei, gilaadeu ni dangada donu makaga olaadeu lodo. 10 Deenei ai, hano gee mai i ogu daha, gai au ga daa gilaadeu gi odi i de maakau i hiidinga au gu lili mmao i gilaadeu, gai au ga hai goe gi se huaahenua soa.”
11 Aagai Moses ne dangidangi ange gi Tagi Maolunga dono Maadua, ga hai ange, “Tagi Maolunga, gu aha gu kona ai naa doo lili i doo huaadangada, aau ne hagassao mai laa i de henua go Egypt, i denga sauaa maolunga ma doo lima mmahi?*Num 14.13-19 12 Gai gu aha gu hai ai gi maua e de gau Egypt i de hagataba, ‘Tagi Maolunga se hagassao donu huu gilaadeu e kave e daa gi maakau i magavaa denga mounga, ma de hai gi odi gilaadeu i teai i henua i lalo.’ Hagahelui ina doo bole, gai suuia dau hagatau, koe gi dee hagaduasala ina doo huaadangada. 13 Manadua Abraham, ma Isaac, aama Israel, oo dangada hai hegau. Koe ne hagatoo donu ange gi gilaadeu i doo ingoo donu, ga hai ange gi gilaadeu, ‘Au e hai naa oodou aamuli gi soa bei de lagolago o denga heduu i lo te langi, gai au e gaavange naa gi oodou aamuli de henua aagu gu hagatoo donu adu gi gilaadeu gi henua ai ga hano ai.’ ” *Gen 22.16-17; Gen 17.8 14 Gai Tagi Maolunga ga sui de hagatau aana ne maanadu laa de hai, ia tee hagaduasala dono huaadangada.
15 Gai Moses ga huli ga hano iho i de mounga, gai ia e poo luu duu hadu o de tala hagadonu i luoono lima; luu duu hadu laa e sisi ngaadahi luu baasi, baasi lodo ma baasi i tua. 16 Gai luu duu hadu laa go de Maadua ne haia, gai go de lima hogi o de Maadua ne sisi ai muna i honga luu duu hadu laa.
17 Gai ga langona huu e Joshua leo o dangada e hevaalogi ai, gai ia ga hai ange gi Moses, “Dangada e hevaalogi i de mommee nnoho gaainga bei de hevaalogi i hiidinga o de hebagi.”
18 Gai Moses ga hai ange,
“E dee go leo o dangada e hevaalogi i de kii deenei,
be go de hevaalogi i delaadeu maakulu;
aagai go de leo o taahili aagu e langona adu.”
19 Gai ga hano iho huu Moses ga dae iho gi de mommee nnoho gaainga, gai ia gu gidee de kaau goolo laa ma denga aanunga a dangada e hai; aagai Moses gu kona mmao de lili, gai ia ga poo luu duu hadu laa ga maga iho gi gaogao de mounga gu maoha. 20 Gai ia ga kave de kaau goolo laa ga dudu ga mmili gu lligi ga hagamalili ange gi lodo vai ga hai de gau Israel gi unumia.
21 Gai Moses ga hai ange gi Aaron, “Ni aha a de huaadangada nei ne hai adu laa gi de goe, gai koe ga dugu ange ai nei gilaadeu gi haia de baubau laumalie nei?”
22 Gai Aaron ga hai ange, “Dogu dangada aamua, koe gi dee kona doo bole. Koe e iloo naa donu dagodo o de gau nei; gilaadeu e nnoho ange huu e hai de baubau. 23 Gilaadeu ne hai mai gi de au, ‘Haia dahi diinonga gi dagina gidaadeu, go hiidinga gidaadeu e dee iloo donu be ni aha gu hai ange gi Moses, taane ne hagassao ina mai nei gidaadeu i de henua go Egypt.’ *Acts 7.40 24 Gai au ne hai ange gi gilaadeu, ‘Be goai e hanu ono mee hagalaagii goolo, gai ia gi aaua gi gaamai gi de au.’ Gai gilaadeu ga hagaui goolo laa ga gaamai, gai au ne maga ange gi lo te ahi, gai gu sula mai ai de kaau goolo nei!”
25 Gai ga gidee huu e Moses bolo Aaron gu tili ange donu huu dangada gi haia olaadeu lodo, ma de hai olaadeu hagadaumee gi pasa hakadanga ma de doo mee i gilaadeu. 26 Gai Moses ne hano ga duu i de haitoga o de mommee nnoho gaainga, gai ia ga hai ange, “Be goai naa huu e dau ange gi Tagi Maolunga, gai ia gi humai gi duu i ogu daha.” Gai de aamuli alodahi o Levi gu loomai ga tuu madali ia.
27 Gai Moses ne hai ange gi gilaadeu, “E hagadaba Tagi Maolunga de Maadua o Israel, ‘Dahi ma dahi gi dau ina dana gadilaasa, ma gi hano laa magavaa o dangada i de mommee nnoho gaainga, ga daia ai gi maakau ono daina donu, ma dono soa, aama tangada e paa ange gi de ia.’ ” 28 Gai denga aamuli o Levi ga hulo ga hai gu bei muna a Moses; gai gilaadeu ne daa ga maakau e dolumano dangada i de laangi laa. 29 Gai Moses ga hai ange, “Anailaa nei gai goodou gu hagadabu ange goodou gi hegau a Tagi Maolunga, go hiidinga dahi ma dahi gu hai baasi ange donu gi oodou dama ma oodou daina, deelaa ai, ia gu hagamanuuia goodou ailaa nei.”
30 De laangi i ono dua, gai Moses ga hai ange gi dangada, “Goodou gu hai dahi baubau laumalie mmao. Gai au ga hanage nei gi daho Tagi Maolunga e tilo be au e maua i de tala oodou haisala.”
31 Gai Moses ne ahe gi daho Tagi Maolunga, ga hai ange, “De huaadangada nei gu hai dahi haisala laumalie mmao! Gilaadeu gu hai hanu diinonga goolo moolaadeu. 32 Aagai noo koe e malangilangi, gai koe degi ange gi olaadeu haisala; gai noo e deai, gai au e dangidangi adu, sooloa dogu ingoo mai i lo tau beebaa gu sisi ai laa ingoo.” *Psa 69.28; Rev 3.5
33 Aagai Tagi Maolunga ga hai ange gi Moses, “Be goai naa huu e haisala mai gi de au, gai go ia aagu e ssolo dono ingoo i lo tagu beebaa. 34 Iainei gai koe hannoo dagina de huaadangada naa gaavee gi de mommee aagu gu tala adu gi de goe. Gai dogu dangada de langi e hano naa i oo mada i mua. Aagai de laangi naa huu aagu e hagaduasala ai gilaadeu, gai au ga hagaduasala gilaadeu i hiidinga olaadeu haisala.”
35 Gai Tagi Maolunga ga gaamai dahi mee hagamaakau gi honga de huaadangada, i hiidinga o de kaau goolo a Aaron ne hai laa.