33
De hai gi hulo gee i de mounga go Sinai
1 Gai Tagi Maolunga ga hai ange gi Moses, “Goodou ma dangada aau ne hagassao mai naa i de henua go Egypt hulo gee mai kinei, goodou hulo gi de henua aagu gu hagatoo donu ange laa gi Abraham, ma Isaac, aama Jacob, ma gu hai ange, ‘Au e gaavange naa de henua nei gi doo aamuli.’ *Gen 12.7; 26.3; 28.13 2 Gai au e hai naa tangada de langi gi hano i oo mada i mua, gai ia ga hai ai gi hulo gee de gau Canaan, ma de gau Amor, ma de gau Heth, ma de gau Perez, ma de gau Hiv, aama de gau Jebus. 3 Goodou loage hulo gi de henua iai vai uu ma hooni lagolago; aagai au e dee hanage madali goodou, go hiidinga goodou ni dangada makaga oodou lodo, kana daia e au goodou ga maakau i taadeu seesee e hulo.”
4 Gai ga langona huu e dangada muna hagalodo baubau nei, gai gilaadeu gu daemaha; gai teai donu se gilaadeu ne daulia hanu mee hagalaagii be ne gahu hagadanuaa. 5 Go hiidinga Tagi Maolunga gu hai ange gi Moses, “Daalaa ange gi de gau Israel hai ange, ‘Goodou ni dangada makaga oodou lodo; gai noo au e hano madali goodou i dahi damaa masavaa, gai au e daa naa goodou gi odi i de maakau. Deenei ai, goodou aaua gee oodou mee hagalaagii ma mee kahu hagadanuaa, gai au ga hili ai be se aha e hai adu gi goodou.’ ” 6 Deelaa ai, de gau Israel ne aau olaadeu mee hagalaagii ma olaadeu malo hagadanuaa, ga daamada mai i de mounga go Horeb ga hulo ai.
De hale malo hagabuni
7 Gai Moses e mau i de kave dahi hale malo ma e hagaduu i tua de mommee nnoho gaainga, i dahi mommee mmao mai i de mommee nnoho gaainga, gai ia ne hagaingoo ange de hale laa go de hale malo hagabuni. Gai tangada naa huu e lodo e dangidangi ange gi Tagi Maolunga i dahi mee, gai ia ga hano gi de hale malo hagabuni, i tua de mommee nnoho gaainga. 8 Gai de masavaa naa huu o Moses e sao ai e hano gi de hale malo laa, gai dangada alodahi ne hiihidi age ga tuu i gaogao haitoga o olaadeu hale malo ga haaina adu ai Moses, ga dae ai gi dono hano ga ulu gi lo te hale malo laa. 9 Gai de masavaa naa huu o Moses e ulu ai i de hale malo laa, gai tuludulu hagausinga ga hano iho ga duu i ma te haitoga o de hale malo laa, gai Tagi Maolunga ga basa ange gi Moses.
10 Gai de masavaa naa huu a dangada e gidee ai tuludulu hagausinga laa gu duu i ma te haitoga o de hale malo, gai gilaadeu alodahi ga hiihidi mai ga duuduli ga daumaha i gaogao haitoga o olaadeu hale malo. 11 Deenei hugadoo de hai o Tagi Maolunga e huli ange ai ga madaangudu ange gi Moses, bei dagodo o dahi hai soa. Gai de masavaa naa huu o Moses e ahe mai ai gi de mommee nnoho gaainga, gai Joshua, tama daane a Nun, de ia bale o Moses, gai e gauligi mai ange, e dee hano gee donu i de hale malo laa.
De dalodalo o Moses i dangada
12 Gai Moses ga hai ange gi Tagi Maolunga, “Koe ne hai mai au gi gaamai de huaadangada nei, aagai koe tigi tala mai donu be goai aau e hai gi hano madali au. Gai koe gu hai mai hogi, ‘Au e iloo oo dagodo ma de malangilangi i de goe.’ 13 Deenei ai, au e dangidangi adu, noo koe e malangilangi i de au, gai koe hagaagona mai oo haiava, gi iloo ai e au goe gai gi malangilangi ai goe i de au. Koe gi manadua bolo de huaahenua nei go oo dangada donu.”
14 Gai Tagi Maolunga ga hai ange, “Au e hano donu madali goe, gai au e gaavadu naa gi de goe de noho baba.”
15 Gai Moses ga hai ange gi de ia, “Noo koe e dee hano madali au, gai koe gi dee haia gimaadeu gi hulo gee mai i kinei. 16 Gai dee hee ai naa de hai a dangada e iloo ai bolo koe e malangilangi i de au, go gimaadeu ma doo huaadangada? E aha, e dee go doo hano madali gimaadeu e haia ga dagodo gee gimaadeu, go au ma oo dangada, mai i denga huaadangada ange laa i henua i lalo?”
17 Gai Tagi Maolunga ga hai ange gi Moses, “Au e hai donu gi bei de mee oou gu dangidangi mai ai; go hiidinga au e malangilangi i de goe, gai au e iloo oo dagodo.”
18 Gai Moses ga hai ange, “Au e dangidangi adu, koe gi hagaagona mai gi de au doo mahamaha!”
19 Gai Tagi Maolunga ga hai ange, “Au e hai naa ogu dagodo danuaa alodahi gi hano i oo mada i mua, gai au e tala naa dogu ingoo, go Iahweh; au e abodonu ange gi gilaadeu oogu e lodo abodonu ange aagena, gai e lodo aloha ange gi gilaadeu oogu e lodo e aloha ange aagena.” *Rom 9.15 20 Gai ia e hai ange hogi, “Koe e dee maua i de tilo luoogu mada; go hiidinga e deai donu se dangada e gidee au e maua gi mouli!”
21 Gai Tagi Maolunga ga hai ange, “Tilo, e dahi mommee i ogu gaogao oou e maua i de duu ai i honga dahi hadu, 22 gai de masavaa naa huu o dogu mahamaha e hanadu ai laa oo gaogao, gai au ga hagaduu ange goe gi magavaa o denga hadu, ga haoli goe i dogu lima ga dae ai gi dogu ui gee. 23 Gai au ga aau dogu lima, gai koe e gidee naa dogu dua; aagai e deai donu e maua gi gidee luoogu mada.”