De Beebaa Dabu Exodus 34

De ahe ange ga hai e lua duu hadu

(Deut 10.1-5)

1 Gai Tagi Maolunga ga hai ange gi Moses, “Daadaa ina e lua duu hadu bei luu duu hadu aagu ne hai i taamada, gai au ga sisi ange muna aagu ne sisi ange gi honga luu duu hadu i taamada aau ne oha laa. 2 Gai haia gi baba oo mee i taiao age, ma gi hanage gi honga de mounga go Sinai, ga duu i ulu de mounga. 3 Gai e deai ange donu se dangada e humai madali goe, e deai hogi se dangada e nnoho saele laa honga de mounga alodahi; e deai hogi ssiibi be ni kaau e dugu gi gaimee saele i gaogao de mounga.”

4 Gai Moses ga daadaa e lua duu hadu bei luu duu hadu i taamada; gai ia ga oho age i taiao ga hanage gi honga de mounga go Sinai, bei de hai a Tagi Maolunga gu tala ange ai gi de ia, ga dagidagi luu duu hadu laa ga hano ai. 5 Gai Tagi Maolunga ga hano iho i lo te duludulu hagausinga ga duu madali Moses i honga de mounga, gai ia ga hagailoo dono ingoo go Iahweh. 6 Gai Tagi Maolunga ne hano gi mada i mua o Moses, ga hagadaba, “Tagi Maolunga, Tagi Maolunga, de Maadua e lodo aloha ma de degi, e dee moolau de lili, gai e honu i de aloha aama de hai hegau i de muna abodonu,* 7 gai ia e dee helui naa donu dono abodonu ange gi dangada i denga atangada soa, ma de degi ange gi olaadeu baubau, ma olaadeu lodo dee heohi aama haisala. Aagai ia e dee degi ange naa donu gi alaadeu hegau baubau; ia e hagaduasala naa denga dama aama mogobuna i hiidinga baubau o olaadeu maadua, ga dae ai loo gi tolu ma de haa atangada.”

8 Gai Moses ga hagamoolau ga ino luoono mada gi honga de gelegele ga daumaha. 9 Gai ia ga hai ange, “Dogu Ia Aamua, noo koe e abodonu mai gi de au, gai au e dangidangi adu gi de goe, dogu Ia Aamua, koe gi humai madali gimaadeu. Ni muna abodonu gimaadeu ni dangada e makaga omaadeu lodo; aagai koe degi mai gi omaadeu baubau ma omaadeu haisala, mage haia gimaadeu go oo dangada donu.”

De hagahoou o de hagatoo donu hagaheloongoi

(Exo 23.14-19; Deut 7.1-5; 16.1-17)

10 Gai ia ne hai ange, “Tilo, au e hai dahi hagatoo donu hagaheloongoi madali goe. Au e hai naa denga mee hagalele mouli i madamada o doo huaadangada alodahi, ni mee tigi hai i mua i henua i lalo alodahi, aabe gu hai i dahi huaahenua gee. Gai denga huaadangada alodahi oodou e hulo e nnoho i olaadeu magavaa, e gidee naa hegau hagalele mouli a Tagi Maolunga e hai; go hiidinga se hegau hagamaatagu mmao aagu gu dai hai i oodou daha. 11 Gai goodou kana ange hagallongo ange gi muna aagu gu tala adu gi goodou anailaa nei. Tilo, au e hai naa gi hulo gee de gau Amor, ma de gau Canaan, ma de gau Heth, ma de gau Perez, ma de gau Hiv, aama de gau Jebus. 12 Gai goodou kana ange diiloo gi dee haia e goodou dahi hagatoo donu hagaheloongoi madali dangada e nnoho i de henua oodou gu dai hulo naa aagena, gi dee noodia ai goodou i mee nei bei dagodo o ssele. 13 Goodou oha ina olaadeu mommee o ssigidaumaha, ma olaadeu duludulu hadu aama de duuduu iho denga duludulu laagau o Asherah,* 14 go hiidinga koe e dee daumaha ange donu gi dahi diinonga gee; i hiidinga Tagi Maolunga, dono ingoo laa go de Maagoda, se Maadua maagoda.

15 Gai goodou dagidiiloo gi dee haia e goodou dahi hagatoo donu hagaheloongoi, madali dangada o de henua nei, go hiidinga de masavaa naa huu alaadeu e hai ai denga dahulinga baubau, i delaadeu sigidaumaha ange gi olaadeu diinonga, gai gilaadeu ga gauna adu goodou, gai goodou ga hulo hogi, ga gai mee gu sigidaumaha ange gi olaadeu diinonga; 16 gai goodou e kave naa hogi alaadeu damaa hine ga hagahai bodu ange gi oodou dama daane, gai alaadeu damaa hine ga hai denga dahulinga baubau i delaadeu daumaha ange gi olaadeu diinonga, gai gilaadeu ga hai oodou dama daane gi daumaha ange gi olaadeu diinonga.

17 Aude haia hanu diinonga baalanga gi daumaha ange aagena.*

18 Goodou dao ina Taonga o Pelaoaa Dee Hagahua. E hidu laangi oodou e gai ai pelaoaa dee hagahua, bei dagu hai gu tala adu ai gi goodou, i de masavaa gu hagailonga laa i de malama go Abib; i hiidinga go de malama nei oodou ne ssao mai i Egypt.*

19 Denga dama daane madua alodahi ma manu daane alodahi a oodou manu haangai bei kaau, ma ssiibi aama guudi e haanau laa i taamada niiagu.* 20 Tama i mua a dahi donkey e hagahesuihagi i dahi ssiibi; aagai noo goodou e dee hagahesuihagi, gai goodou e hhadi dono ua. Gai goodou e hagahesuihagi donu oodou dama daane maatua.

Gai e deai donu se goodou e ngadi humai gi mada luoogu mada.*

21 E ono oodou laangi e hai ai oodou hegau, aagai de hidu laangi goodou hagammabu; goodou e hagammabu donu hogi i de masavaa o de hagabalabala de gelegele ma de masavaa o de hagihagi.*

22 Gai goodou dao ina Taonga o Denga Uvigi, i de masavaa e hagihagi ai denga grain i taamada, ma Taonga o de Hagabudu i de hagaodi o de ngadau.* 23 E dolu hanonga i de ngadau o denga daane alodahi e loomai ai gi mada luu mada o de Ia Aamua go Iahweh, de Maadua o Israel. 24 Au e hai naa gi hulo gee denga huaahenua mai i oodou mada i mua, ma de hagalaumalie doodou mommee; gai e deai naa donu dangada e nnoo ange gi oodou gelegele, i de masavaa oodou e loomai ai gi mada luu mada o Tagi Maolunga doodou Maadua, i e dolu hanonga i de ngadau.

25 Aude haia dahi sigidaumaha i dodo madali pelaoaa hagahua. Gai goodou e dee dugu hogi hanu mee o ssigidaumaha o Taonga Hagasili gi doe gi taiao age.*

26 Koe gi gaamai gi de hale o Tagi Maolunga doodou Maadua, denga huamanu e hhua i taamada i honga doo gelegele.

Aude duunaa dahi guudi gauligi i lodo vai uu o dono dinana.” *

27 Gai Tagi Maolunga ga hai ange gi Moses, “Siia mage daohia muna nei, go hiidinga aanei muna o de hagatoo donu hagaheloongoi aagu gu hai madali goodou ma de gau Israel.” 28 Gai Moses ne noho i daho Tagi Maolunga i kilaa i e madahaa laangi ma e madahaa boo; gai ia tee gaimee be ne unu. Gai ia ne sisi ange gi honga luu duu hadu laa muna o de hagatoo donu hagaheloongoi, go de Madaangahulu Hainga.

De ahe iho o Moses i de mounga go Sinai

29 Gai de masavaa huu o Moses ne ahe iho ai i de mounga go Sinai ma luu duu hadu o de tala hagadonu, gai ia tee iloo donu bolo luoono mada gu kona donu de maalama, i hiidinga ia nogo basa ange ai gi Tagi Maolunga. 30 Gai de masavaa huu a Aaron ma de gau Israel ne gidee ai Moses, gai luoono mada gu kona donu de maalama, gai gilaadeu gu maatagu i de loomai e hagapaa ange gi de ia. 31 Gai Moses ga hagahi dangada gi loomai gi ono daha; gai Aaron ma dagi alodahi o hagabuulingaa dangada o Israel ga aahe mai gi ono daha; gai Moses ga basa ange gi gilaadeu. 32 Muli mai gai de gau Israel alodahi ga loomai ga hagapaa mai gi ono daha, gai Moses ga tala ange gi gilaadeu mee alodahi a Tagi Maolunga gu tala ange gi de ia i honga de mounga go Sinai.

33 Gai ga lava de basa ange o Moses gi dangada, gai ia ga haoli luoono mada i dahi malo. 34 Aagai de masavaa naa huu o Moses e hano ai gi daho Tagi Maolunga e pasa ai gilaau, gai ia ga aau de malo laa ga dae ai gi dono ahe mai. Gai de masavaa naa huu oona e sao mai ai, gai ia ga tala ange gi de gau Israel muna gu tala ange gi de ia, 35 gai de gau Israel gu gidee bolo luu mada o Moses gu kona de maalama. Aagai Moses ga hagaahe ange de malo laa ga haoli ai luoono mada, ga dae ai gi dono ahe e pasa gilaau ma Tagi Maolunga.

*34:6 Exo 20.5-6; Num 14.18; Deut 5.9-10; 7.9-10

*34:13 Deut 16.21

*34:17 Exo 20.4; Lev 19.4; Deut 5.8; 27.15

*34:18 Exo 12.14-20; Lev 23.6-8; Num 28.16-25

*34:19 Exo 13.2

*34:20 Exo 13.13

*34:21 Exo 20.9-10; 23.12; 31.15; 35.2; Lev 23.3; Deut 5.13-14

*34:22 Lev 23.15-21, 33-34, 39-43; Num 28.26-31

*34:25 Exo 12.10

*34:26 Deut 26.2; 14.21