De Beebaa go
Ezekiel
Hanu dagodo o de beebaa nei
Go de pelaabisi go Ezekiel, tama daane a Buzi ne siia De Beebaa go Ezekiel. Ia ne gaavee gi Babylon i de masavaa a Nebuchadnezzar ne hagadee kii ai Jerusalem, i tahi hanonga i de ngadau e 597 b.c., gai go mua de oohaa o Jerusalem. Ia ne agoago ange dangada ne nnoho i Jerusalem, aama dangada ne gaavee laa gi Babylon. De beebaa nei e maua i de vvae ono:
1. De hagahi a de Maadua Ezekiel e hai gi se pelaabisi.
2. De hagakana ange o Israel i dagodo o de hagaduasala a de Maadua gilaadeu, ma de oohaa o Jerusalem.
3. Muna mai i daho Tagi Maolunga, i dagodo o dana hagaduasala denga huaahenua, i hiidinga delaadeu vaivai ono dangada ma delaadeu dagi gee Israel mai i de Maadua.
4. De hagaaneane o Israel i dua de hagadee kii o Jerusalem, ma de hagatoo donu o de manuuia i de masavaa e humai.
5. De tala pelaabisi dagodo o Gog.
6. De tala pelaabisi a Ezekiel de hagaahe age o de temple, ma de huaahenua.
Ezekiel se daane mmahi i de gai, ma de lagolago ana mee e maanadu. Mee lagolago aana e maanadu ne hidi mai i denga midi hagaago ange, gai ana agoago lagolago ne hagaago danuaa mai i ana mee ne hai. Ezekiel ne agoago i dagodo de hagahoou o de lodo ma de hagasaalunga o tangada. Ia ne tala bolo haisala o dahi ma dahi e dau ange donu gi de ia. Ia ne tala hogi dana tali hagalodolodo, bolo de huaahenua o Israel e aahe mai naa donu gi de Maadua. Ia e dee se pelaabisi donu huu, gai se dangada haimeedabu hogi, deelaa ai, ia ne malangilangi i de temple ma de hai gi dabu abodonu dangada.
Hanu gubu hagamogomogo: “Au e hagaahe mai naa goodou i daho denga huaahenua; au e hagabuni mai naa goodou i denga henua alodahi, ga hagaahe mai gi doodou henua. Au e hagassii adu naa denga vai gilimalali gi goodou, gi gilimalali ai goodou. Au e hagagilimalali naa goodou mai i oodou dahulinga hakino gee alodahi, aama mai i oodou diinonga alodahi. Au e hagahoou naa oodou lodo, ma de gaavadu gi goodou dahi hagasaalunga hoou; au e aau gee de lodo makaga bei de hadu mai i oodou daha, gai ga gaavadu gi goodou de lodo e bei laa dagodo o kano hoou” (36.24-26).
Denga vaevaaenga
De hagahia o Ezekiel (1.1—3.27)
Denga agoago i dagodo de oha o Jerusalem (4.1—24.27)
De hagaduasala a de Maadua denga huaahenua (25.1—32.32)
De hagatoo donu a de Maadua e hagamanuuia ono dangada (33.1—37.28)
De tala pelaabisi dagodo o Gog (38.1—39.29)
De midi hagaago ange i dagodo o de temple ma de henua (40.1—48.35)
1
Denga mee mouli e haa ma de mahamaha o de Maadua
1 De matolu ngadau huu, i de lima laangi o de haa malama, i dogu masavaa e noho ai madali dangada ne gaavee laa gi dahi henua gee, i gaogao ssaalingaa vai go Kebar, gai gu mahuge mai de langi, gai au gu gidee hanu midi hagaago ange, mai i daho de Maadua.*Rev 19.11
2 Gai de lima laangi huu o de malama (de lima ngadau i dua de gaavee gee o de hodooligi go Jehoiachin i de henua),*2 Ki 24.10-16; 2 Ch 36.9-10 3 gai Tagi Maolunga ne hagaago ange ana muna gi tangada haimeedabu go Ezekiel, tama daane a Buzi, i gaogao ssaalingaa vai go Kebar, i de henua o de gau Babylon, gai ssauaa o Tagi Maolunga gu hano iho gi ono elunga.
4 Gai tilo, au ne gidee de madangi mmahi e humai i ngaiho, gai e dahi hagausinga maadolu e labalaba mai ai denga uila, gai gu kona de maalama luu baasi alodahi. Gai lo te ungaalodo o de ahi laa e dahi mee malamalama bei de baalanga, 5 gai lo te ahi laa iai e haa mee mouli. Gilaadeu e bei hoolinga o dahi dangada,*Rev 4.6 6 aagai gilaadeu e dagihaa olaadeu mada ma bakau. 7 Olaadeu sugi vae e ssoe donu huu, olaadeu alohi vae e bei alohi vae o dahi kaau gauligi, gai e malamalama bei bronze gu hagamalamalama laa. 8 Gai lalo olaadeu bakau, i denga baasi e haa laa iai hanu lima dangada. Gai e hanu olaadeu mada ma bakau, 9 gai olaadeu bakau e hagadau hebaa. Gai gilaadeu e llele ma e hagassoe gi mua, e dee huuhuli saele donu.
10 Gai aanei dagodo o olaadeu mada: denga mee mouli e haa laa e dagidahi olaadeu mada bei luu mada o tangada, gai olaadeu mada i de baasi madau, e bei luu mada o de laiono; olaadeu mada i de baasi masui, e bei luu mada o de kaau; gai olaadeu mada ange laa, bei luu mada o de igele.*Ezk 10.14; Rev 4.7 11 Aanei hoolinga o olaadeu mada. Olaadeu bakau e doha age gi lunga; gai e dagilua olaadeu bakau, gai olaadeu bakau e hagadau hebaa; e dagilua olaadeu bakau e haoli ai olaadeu angaanga. 12 Gai dahi ma dahi e lele donu huu ma e hagassoe gi mua. Gai be go hee naa huu o de hagasaalunga e hano aagena, gai gilaadeu e hulo hogi, gai gilaadeu e dee huuhuli saele donu i delaadeu hulo. 13 Gai hoolinga o denga mee mouli laa e bei maga ahi o de ahi ula, ma denga laama. Gai de ahi e aheahe saele i magavaa o denga mee mouli laa; gai e kona mmao de maalama, gai denga uila e labalaba mai i ono lodo.*Rev 4.5 14 Denga mee mouli laa e kemo bei dagodo o de llaba o de uila.
15 Gai ga galo ange huu au ga tilo denga mee mouli laa, gai au gu gidee hanu hagasii e tuu gi honga de gelegele i olaadeu gaogao, e dahi hagasii i gaogao dahi mee mouli laa, e haa ono ganomada.*Ezk 10.9-13 16 Gai aanei dagodo o denga hagasii laa ma de hai e tuu ai: hagasii laa e malamalama bei chrysolite,*chrysolite, aabe ni beryl. gai e dagodo daudahi donu huu. Dahi hagasii laa e dagodo be e pigi ange gi lo te hagasii ange laa. 17 Gai de masavaa o denga hagasii e ngaalue ai, gai gilaadeu e maua i de hulo gi denga baasi alodahi, gai denga hagasii laa e dee huuhuli saele donu, i de masavaa o denga mee mouli laa e hulo ai. 18 Gai mee e daohia hagasii laa e duuduu gai e hagalele mouli, gai e dohu i denga ganomada.*Rev 4.8
19 Gai de masavaa naa huu o denga mee mouli laa e ngaalue ai, gai hagasii laa gu ngaalue hogi madali gilaadeu; gai de masavaa naa huu o denga mee mouli laa e hagamaalanga age ai i honga de gelegele, gai denga hagasii laa gu maalanga age hogi. 20 Gai go hee naa huu o de hagasaalunga e hano aagena, gai gilaadeu e hulo hogi, gai denga hagasii laa e maalanga age hogi madali gilaadeu, i hiidinga de hagasaalunga o denga mee mouli laa i lodo hagasii laa. 21 De masavaa naa huu o denga mee mouli laa e ngaalue ai, gai hagasii laa gu ngaalue hogi; gai ga tuu naa huu gilaadeu, gai denga hagasii laa gu tuu hogi; gai ga hagamaalanga age naa huu gilaadeu mai i honga de gelegele, gai denga hagasii laa gu maalanga age hogi, i hiidinga de hagasaalunga o denga mee mouli laa i lodo hagasii laa.
22 Gai honga biho o denga mee mouli laa iai dahi mee be se moana, e malamalama bei crystal, gai e haoli iho ai honga olaadeu biho.*Rev 4.6 23 Gai olaadeu bakau e doha gi daha ma de hagadau hebaa i lalo de moana laa, gai dahi mee mouli laa e lua ono bakau e haoli ai dono angaanga. 24 Gai de masavaa naa huu olaadeu e ngaalue ai, gai au gu langona bolo de gabagaba olaadeu bakau e bei de ngolo o denga vai mmilo, bei de leo o de Ia Mmahi Mmao laa, ma de hagalongaa o dahi hagabuulinga hebagi. Gai de masavaa naa huu olaadeu ne tuu ai, gai gilaadeu ga dugu iho olaadeu bakau.*Rev 1.15; 19.6
25 Gai dahi leo ne basa iho i lo te moana i honga olaadeu biho laa, i de masavaa olaadeu e tuu ai ga dugu iho olaadeu bakau. 26 Gai lo te moana i honga olaadeu biho laa iai dahi mee be se nohoanga hodooligi e hai i sapphire;†sapphire, aabe ni lapis lazuli. gai honga de mee be se nohoanga hodooligi laa e noho ai dahi e bei hoolinga o tangada.*Ezk 10.1; Rev 4.2-3 27 Gai au ne gidee bolo mai i lo tono ungaalodo ga hanage ai e bei dahi baalanga malamalama, gai e ula ai de ahi, gai mai i kilaa ga hano iho ai e bei de ahi ula, gai de maalama laa e duuli ia.*Ezk 8.2 28 Gai de maalama masalaba e duuli ai laa ia e bei de umada i lodo hagausinga i de laangi bala langi.
Deenei dagu hai ne gidee ai dagodo o de mahamaha o Tagi Maolunga. De masavaa aagu ne gidee ai, gai au ga ino gi honga de gelegele, gai au gu langona de leo o dahi e basa ai.