1 Tagi Maolunga, aude ngalo mee gu hai mai gi gimaadeu;

galo mai ma gi diiloo, gimaadeu gu hagangadi mee ina!

2 Demaadeu henua gu gaavange gi de gau henua gee,

omaadeu hale gu gaavee e de gau mai moni.

3 Gimaadeu gu bei denga gauligi gu deai laa olaadeu damana;

omaadeu dinana gu maakau olaadeu bodu.

4 Gimaadeu e hagao amaadeu vai unu,

gai amaadeu lahhie e dahi hogi olaadeu hagaoanga.

5 Dangada e dolohia gimaadeu gu dae mai gimaadeu;

gimaadeu gu daalea gai gu dee maua i de hagammabu.

6 Gimaadeu ne dugu ange gimaadeu gi Egypt ma Assyria,

gi hanu ai amaadeu gai.

7 Omaadeu dubuna ne haisala, gilaadeu gu dee mouli iainei;

gai gimaadeu gu hagaduasala i hiidinga o olaadeu baubau.

8 Gai gu ni dangada hai hegau e dagina gimaadeu;

gu deai hogi dangada e hagaola ina mai gimaadeu i olaadeu daha.

9 Gimaadeu e hai hegau ange gi amaadeu mee gai,

ma de manavasaa i omaadeu mouli,

i hiidinga o de gadilaasa i lodo henua.

10 Omaadeu gili gu vvela bei de mommee dao gai,

gai gu mahanahana i demaadeu hiikai.

11 Denga haahine o Zion gu haia gi de mahi,

aama denga bua mmoe i aduhale o Judah.

12 Denga dagi gu daudau age i olaadeu lima;

denga daane maatua gu dee hagadubulia.

13 Denga dama daane gu hagahai hegau ina,

i de mommee e mmili ai denga grain;

denga gauligi daane e hagauda

denga noodangaa laagau daemaha.

14 Denga daane maatua gu dee hagabuni

i ma te haitoga o de aduhale;

denga dama daane gu dee hagadangidangi.

15 Gu deai donu se malangilangi i omaadeu lodo;

gimaadeu gu dee aanu, gai gu hinangalosaa.

16 De hau i honga omaadeu biho gu doo.

Gu vakaa loo gimaadeu, i hiidinga gimaadeu gu haisala!

17 Gimaadeu gu mmae omaadeu lodo i hiidinga o de mee nei,

omaadeu ganomada gu dee kide i hiidinga o mee nei.

18 De mounga go Zion gu ngadi dagodo,

denga jackal gu nnoho i kilaa.

19 Aagai koe, e Tagi Maolunga,

e hodooligi ga hano ai;

doo nohoanga hodooligi e dagodo naa donu huu

i denga atangada alodahi.

20 Gu aha goe gu ngalo ai naa gimaadeu i masavaa alodahi?

Gai gu aha gu daulooloa ai naa dau tili gimaadeu?

21 Tagi Maolunga, hagaahea mai gimaadeu gi oo daha,

gi maua ai e gimaadeu i de aahe mai.

Hagahoou ina omaadeu laangi, bei omaadeu dagodo madagidagi —

22 aabe koe gu tili naa donu gimaadeu,

ma de kona donu doo lili i gimaadeu.