27
Taahili o de magau o Tyre
1 Gai Tagi Maolunga ne hagaago mai ana muna gi de au, ga hai mai, 2 “Tama a tangada, huudia taahili o de magau o Tyre, 3 hai ange gi Tyre, e duu laa i de haitoga ange gi dai, go de mommee iai de gau hagao mee o huaadangada o denga henua i tagudai: ‘E hagadaba de Ia Aamua go Iahweh,
Tyre, koe e hagadaba,
“Dogu mahamaha e honu danuaa.”
4 De ngaadonga o doo mommee go honga tai;
denga labagau ne hagaduu goe ga mahamaha abodonu.
5 Gilaadeu ne hai oo baabaa alodahi
i laagau o denga fir mai i Senir;*Senir e bei go Hermon.
gilaadeu ne kave dahi cedar mai i Lebanon
ga hai ai doo bou.
6 Gilaadeu ne hai oo hoe i laagau
o denga oak mai i Bashan;
gai ne hai doo deege i laagau
o denga pine mai i mommee i tagudai o Cyprus,†Cyprus: de Beebaa Hebrew e hai ange Kittim.
gai ne hagalaagii goe i denga ivory.
7 Doo saiolo ne hai i denga linen gu maaga mai i Egypt,
gai e hai ai hogi doo hagailonga;
oo mee hagasagasaga e buluu ma de purple
mai i mommee i tagudai o Elishah.
8 Dangada o Sidon ma Arvad ni daane gabegabe niiou;
Tyre, denga labagau i honga de vaga ni daane hai moni.
9 Denga daane maatua o Gebal‡Gebal e bei go Byblos. i honga de vaga
e labagau i de bonobono ange denga mommee vava.
Vaga alodahi i honga tai ma olaadeu daane hai moni,
e hagamaamaane i oo gaogao e hagao ai oo goloa.
10 Denga daane o Persia, ma Lud aama Put
ne hebagi madali doo hagabuulinga hebagi.
Gilaadeu ne hagalaulau age alaadeu mee hungihungi
ma olaadeu goobai baalanga i honga doo buibui
ga hagamahamaha ai goe.
11 Daane o Arvad ma Helek
e hagaloosi doo buibui alodahi;
Gai denga daane o Gammad e tuu
i lodo oo hale dagitilo maolunga.
Gilaadeu e hagalaulau age olaadeu mee hungihungi i doo buibui;
gilaadeu ne hai ga honu danuaa doo mahamaha.
12 Tarshish ne hagao hogi oo goloa; gilaadeu ne hagao oo goloa i selevaa, ma iron, ma dini aama lead, i hiidinga de kona doo lava i denga goloa.
13 Javan, ma Tubal, ma Meshek ne hagao hogi oo goloa; gilaadeu ne hagao oo goloa i de gau hai hegau aama goloa e hai i bronze.
14 Dangada o Beth Togarmah ne hagao oo goloa i denga hoosa, ma hoosa hebagi aama denga donkey.
15 Dangada o Dedan§Dedan: hanu beebaa duai ange laa e hai ange Rhodes. e hagao hogi oo goloa, gai denga henua i tagudai ni mommee e hagao ina oo goloa; gilaadeu ne hagao oo goloa i hanga o denga elephant, aama laagau ebony.
16 Syria ne hagao mee i oo daha i hiidinga de lagolago oo goloa; gilaadeu ne hagao oo goloa i denga turquoise, ma malo purple, ma malo gu maaga, ma linen danuaa, ma denga manu mangamanga, aama denga ruby.
17 Judah ma Israel ne hagao mee hogi i oo daha; gilaau ne hagao oo goloa i grain mai i Minnith ma keege, ma hooni, ma lolo olive, aama balm.
18 Gai go hiidinga de lagolago oo goloa danuaa, ma doo lava i denga hagadaagangaa goloa, Damascus ne hagao oo goloa i denga uvaini mai i Helbon ma huluhulu manu mai i Zahar.
19 Gai Dan ma de gau Javan mai i Uzal ne hagao hogi oo goloa; gilaadeu ne hagao mee nei i iron, ma laagau cassia, ma calamus manongi.
20 Dedan ne hagao oo goloa i denga malo e nnoho ange ai gi honga hoosa.
21 Arabia ma denga dagi alodahi o Kedar ne hagao hogi oo goloa; gilaadeu ne hagao oo goloa i denga ssiibi gauligi ma denga ssiibi daane, aama guudi.
22 De gau hagao mee o Sheba ma Raamah ne hagao hogi oo goloa; gilaadeu ne hagao oo goloa i denga hagadaagangaa mee hagamanongi alodahi, ma denga hadu hagamogomogo, aama goolo.
23 Haran, ma Canneh, ma Eden, ma de gau hagao mee o Sheba, ma Assyria, aama Kilmad ne hagao hogi oo goloa. 24 Gilaadeu ne hagao oo goloa i denga malo mahamaha, ma malo buluu, ma malo gu maaga, ma mee hagalaagii e hhola i lodo hale, gai iai denga deleisi gu hilo leebunga ma gu nnoa.
25 Denga vaga o Tarshish
e hagauda mai oo goloa.
Koe e bei de vaga i honga tai gu honu baabaa
ma de daemaha i goloa.*Rev 18.11-19
26 Oo daane gabegabe ne kave goe
gi honga de moana.
Aagai de madangi mai i dua ne oha goe
ga too dagidahi i de moana mmao.
27 Doo lava, ma au goloa e hagao gi daha ma oo goloa,
ma oo daane honga tai, ma oo daane hai moni, ma oo giabini,
ma de gau hagao mee, ma daane hebagi alodahi,
aama dangada alodahi i honga de vaga
e aabulu naa gi lo te moana,
i doo laangi e maoha ai.
28 Leo o de gau hai moni e tangi ai
e hai naa ga ngalungalue de henua.
29 Gai denga daane gabegabe alodahi,
ma denga daane hai moni,
ma denga eligi alodahi i honga tai
e iho mai naa i honga olaadeu vaga,
ga tuu i de gabugabu tai.
30 Gilaadeu e oo naa ga tangi,
ga gaavage gelegele gi honga olaadeu biho,
aama de tige saele i lodo lehu.
31 Gilaadeu e dahi naa olaadeu biho ga malali i oo hiidinga,
ma de kahu i malo daladala.
Gilaadeu e tangi ssee naa ma de daemaha olaadeu lodo,
i de kona delaadeu hinangalosaa.
32 Gilaadeu e hua naa doo daahili magau
i de masavaa olaadeu e tangi ssee ai ga hagataba:
“Tigi ai ange donu se henua ne oohaa bei dagodo o Tyre,
ma gu ngadi dagodo i lo te lausedi.”
33 De masavaa ne hulo ai oo goloa i honga denga moana,
gai koe ne hai ga malangilangi denga huaadangada soa;
doo lava laumalie ma au goloa e hagao
ne hai ga lava denga hodooligi o henua i lalo.
34 Iainei koe gu maoha i de moana,
ma gu abulu gi lo te moana gelo;
oo goloa ma oo daane hai moni,
gu aabulu madali goe.
35 Dangada alodahi e nnoho i denga modu
gu llele mouli i oo dagodo,
olaadeu hodooligi gu bolebole mmao ma de maatagu.
36 De gau hagao mee o denga huaadangada
gu llele mouli i oo dagodo;
koe ne baubau donu doo hai ne magau ai,
gai koe gu dee gidee ange naa donu.’ ”