28
De hagaduasala o de hodooligi o Tyre
1 Gai Tagi Maolunga ne hagaago mai ana muna gi de au, ga hai mai, 2 “Tama a tangada, hai ange gi de hodooligi o Tyre, ‘E hagadaba de Ia Aamua go Iahweh:
Koe e hagadaba i doo lodo maolunga,
“Au se maadua;
au e noho i honga de nohoanga o dahi maadua,
i lo te ungaalodo o de moana.”
Aagai koe se dangada donu huu, e dee se maadua,
gai koe e maanadu bolo koe e heiangi bei dahi maadua.
3 Gai koe e kii ange doo iloo mee i Daniel;
e deai se mee daudahi e hagammuni i de goe.
4 Doo iloo mee ma doo donu
gu hai goe ma gu lava,
gai koe gu hagabudu goolo ma selevaa lagolago
i lodo oo mommee doange.
5 Doo heiangi i de hagao mee,
gu hai ma gu kona doo lava,
gai koe gu hagamaolunga
i hiidinga o doo lava.
6 Deenei ai, e hagadaba de Ia Aamua go Iahweh:
Go hiidinga koe e maanadu bolo doo iloo mee
e bei de iloo o dahi maadua,
7 deelaa ai, tilo, au e hai naa gi loomai
de gau henua gee gi hai baasi adu,
go dangada o denga huaahenua baubau mmao,
gai gilaadeu e dada mai naa alaadeu gadilaasa
ga oha ai de mahamaha o doo heiangi,
ma de oha doo mahamaha.
8 Gilaadeu e tili iho naa goe gi lo te geelonga o de gau maakau,
gai koe e daa naa ga magau
i lo te ungaalodo o de moana.
9 E aha, e maua naa huu e goe i de hagadaba, “Au se maadua,”
i madamada o dangada e daia goe ga magau?
Koe e bei donu huu dagodo o dangada e maakau laa, e dee se maadua,
i de masavaa alaadeu e poo ai goe ga daa gi magau.
10 De gau henua gee e daa naa goe ga magau
bei dagodo o dangada tigi tuu dagaholiage.
Au gu lava i de tala hagadonu mee nei,
go de Ia Aamua go Iahweh e hagadaba.’ ”
11 Gai Tagi Maolunga ne hagaago mai ange ana muna, ga hai mai, 12 “Tama a tangada, huudia dahi daahili magau i dagodo o de hodooligi o Tyre, ma de hai ange gi de ia, ‘E hagadaba de Ia Aamua go Iahweh:
I mua gai koe se mee hagaago e honu danuaa,
doo heiangi e honu gai koe e mahamaha mmao.
13 Koe nogo noho i de veelenga a de Maadua go Eden;
koe ne hagalaagii i denga hadu hagamogomogo alodahi,
go de ruby, ma de topaz, ma de emerald,
ma de chrysolite, ma de onyx, ma de jasper,
ma de sapphire, ma de turquoise, aama de beryl.
Gai mee e hagabigibigi ange aagena
aama mee e maaga ai ni goolo.
Mee nei ne hagadabena adu gi de goe,
mai i de laangi oou ne hagadau ai.
14 Au ne hai goe gi se cherub e hagaloosia,
koe nogo noho i honga de mounga dabu o de Maadua;
gai koe ne seesee i magavaa o denga hadu malamalama.
15 Koe e deai donu oo haisala
i de masavaa oou ne hagadau ai
ga dae ai gi de masavaa ne gidee mai ai de baubau i oo daha.
16 Doo hano saele ga hagao mee lagolago
gu hai goe ma gu se dangada e vaivai haia dangada,
gai koe gu haisala.
Gai au ne alualu goe mai i de mounga o de Maadua
ma de hagangadi mee goe.
De cherub e hagaloosia laa, au ne hai goe gi hano gee goe,
mai i magavaa o denga hadu o de ahi.
17 Koe ne lodo maolunga
i hiidinga doo tilo danuaa,
gai koe ne oha doo heiangi
i hiidinga doo mahamaha.
Gai au ne tili iho goe gi henua i lalo;
au ne hai goe gi se mee hagakana niio denga hodooligi.
18 Oo haisala lagolago ma doo hai hegau i de hadu muna
ne hai ga hakino gee oo mommee dabu.
Deelaa ai, au ne hai gi hanage de ahi i oo daha,
gi duungia goe gi odi,
ma de hai goe gi ni lehu i honga de gelegele
i madamada o dangada alodahi ne gidee.
19 Denga huaadangada alodahi gu iloo laa oo dagodo
gu llele mouli i oo dagodo;
koe ne baubau donu doo hai ne maoha ai,
gai koe e dee gidee ange naa donu.’ ”
De tala de hagaduasala o Sidon
20 Gai Tagi Maolunga ne hagaago mai ana muna, ga hai mai,*Joel 3.4-8; Zec 9.1-2; Mat 11.21-22; Luke 10.13-14 21 “Tama a dangada, basa pelaabisi hai baasi ange ai gi Sidon, 22 ga hai ange: E hagadaba de Ia Aamua go Iahweh:
Tilo, au e hai baasi adu gi de goe, Sidon,
gai au e hagaago mai naa dogu mahamaha i oo daha.
Gai gi iloo ai e gilaadeu bolo go au donu go Iahweh,
i de masavaa aagu e hagaduasala ai ia,
ma de hagaago mai bolo au e dabu i kilaa.
23 Au e hai naa gi humai de mee hagamaakau gi honga de henua,
ma de hai honga ono haiava gi hoohonu i denga dodo.
Dangada e maakau naa i kilaa,
gai de gadilaasa e hai baasi ange naa gi de henua alodahi.
Gai gi iloo ai e gilaadeu bolo go au donu go Iahweh.
Israel e manuuia naa
24 “Gai dangada e paa ange laa gi de gau Israel, go gilaadeu e hagangadi mee ina gilaadeu, gu dee hagammae gilaadeu bei dagodo o denga manu daladala ma manu duiduia. Gai gi iloo ai e gilaadeu bolo go au donu de Ia Aamua go Iahweh.
25 E hagadaba de Ia Aamua go Iahweh: De masavaa naa huu aagu e hagaahe mai ai de gau Israel i denga huaahenua olaadeu gu mavaevae saele laa aagena, gai au ga hagaago ange gi denga huaahenua bolo au e dabu. Gai gilaadeu e aahe mai naa ga nnoho i delaadeu henua, go de henua aagu gu gaavange gi dogu dangada hai hegau go Jacob. 26 Gai gilaadeu e nnoho paba naa i kilaa, ga hagatuu olaadeu hale, ma de hai alaadeu veelengaa grape. Gilaadeu e nnoho paba naa, gai au e hagaduasala naa dangada alodahi e paa ange gi gilaadeu, go dangada ne hagangadi mee ina laa gilaadeu. Gai gi iloo ai e gilaadeu bolo go au donu go Iahweh delaadeu Maadua.”