4
Cain ma Abel
Gai Adam ne hagahebaa ma donu bodu go Eve, gai de hine laa gu hai dama, ga haanau a Cain.*Cain e dagu bei de muna Hebrew au gu kave. Gai ia ga hagadaba, “Au gu kave dahi dama daane mai i daho Tagi Maolunga.” Gai muli mai gai a Eve ne haanau taina daane o Cain go Abel.
Gai Abel se dangada e hagaloosi ange denga ssiibi, aagai a Cain se dangada hai veelenga. Gai dahi laangi huu gai a Cain ga gaamai gi Tagi Maolunga dahi sigidaumaha i huamanu mai i dana veelenga. Gai Abel ne gaamai manu ne haanau i taamada i dana hagabuulingaa ssiibi ma olaadeu mee moomuna. Gai Tagi Maolunga ne malangilangi i Abel ma dana sigidaumaha,*Heb 11.4 gai ia tee malangilangi i Cain aabe go dana sigidaumaha. Gai a Cain gu kona mmao dono lili, gai luoono mada gu hagaago mai donu dono lili.
Gai Tagi Maolunga ga ssili ange gi a Cain, “Gu aha gu lili ai naa goe? Gai gu aha luoo mada gu hagaago mai ai naa doo lili? Noo koe e hai de mee heohi, gai koe e dau i ogu daha! Gai noo koe e dee hai de mee heohi, gai de baubau e bei dagodo o de manu alasala e dogoduli laa i ma too haitoga; gai e lodo go ia e huahua i de goe, aagai koe haia go koe e dagina de baubau.”
Gai a Cain ga hai ange gi dono daina daane, “Gidaau ga hulo gi tuu malaelae.” Gidaau ga hulo gi tuu malaelae: muna nei e dee daakodo i lo te Beebaa Hebrew, gai go lo te Beebaa Greek iai. Gai de masavaa olaau e nnoho ai i tuu malaelae, gai a Cain ga hebagi ange gi dono daina go Abel, ga daa ia gu magau.*Mat 23.35; Luke 11.51; 1 Jn 3.12
Gai Tagi Maolunga ga ssili ange gi a Cain, “I hee iai doo daina go Abel?”
Gai ia ga hai ange, “Au e dee iloo, gu aha, go au e diiloo ange dogu daina?”
10 Gai Tagi Maolunga ga hai ange, “Se hegau bee hee aau gu hai nei? Tilo, dodo o doo daina e tangi mai gi de au i lo te gelegele.*Heb 12.24 11 Deenei ai, koe gu hagamalaia ma gu dee maua gi hhua au manu e doo i de gelegele, go de gelegele ne holomia laa dodo o doo daina daane aau ne daa laa ga magau. 12 Gai de masavaa naa huu aau e hagabalabala ai de gelegele e doo, gai e dee maua naa donu gi hanu hua iai, gai koe e hai naa ga se dangada e silivaahea ma de hagadaga saele i honga de henua.”
13 Gai a Cain ga hai ange gi Tagi Maolunga, “Dogu hagaduasala gu kii ange i de mee aagu e mau i de hagauda! 14 Tilo, anailaa nei gai koe gu hai au gi dee noho i de henua, gai koe e hagammuni naa luoo mada i de au; au e hai naa ga se dangada e silivaahea saele ma tee noho baba i honga de henua, gai be goai naa huu e hedae mai gi de au, gai ia e daa donu au gi magau.”
15 Gai Tagi Maolunga ga hai ange gi de ia, “E dee deenaa tagodo! Gai be goai naa huu e daia goe ga magau, gai e sui ange naa gi de ia i e hidu hanonga.” Gai Tagi Maolunga ne hai dahi hagailonga ga maaga ai a Cain, kana hedae ange dahi dangada gi de ia ga daa ia gu magau. 16 Gai a Cain ga hano gee mai i mada luu mada o Tagi Maolunga ga hano ga noho i de henua go Nod, i baasi i dua o Eden.
De aamuli o Cain
17 Gai a Cain ne hagahebaa ma dono bodu, gai de hine laa gu hai dama ga haanau Enoch. Gai a Cain ga hagaduu age dahi aduhale, ga hagaingoo i de ingoo o dana dama daane go Enoch. 18 Gai Enoch ne hagadili Irad, Irad ne hagadili Mehujael, Mehujael ne hagadili Methushael, gai Methushael ne hagadili Lamek.
19 Gai Lamek ne hai bodu ange gi e dogolua haahine; de ingoo o dahi go Adah, gai de ingoo o de ia ange laa go Zillah. 20 Gai Adah ne haanau Jabal, go ia tamana o dangada e nnoho i lodo hale malo, ma de haangai denga manu. 21 Gai de ingoo o dono daina daane go Jubal, go ia tamana o dangada alodahi e hagadangidangi i de harp ma de flute. 22 Gai Zillah ne haanau hogi Tubal-Cain, go ia e agona ange gilaadeu e hai hegau i bronze ma iron. Gai taina haahine o Tubal-Cain go Naamah.
23 Gai Lamek ga hai ange gi luoono bodu:
“Adah ma Zillah, gooluu nnoho mai hagalaangona agu muna,
luu bodu o Lamek gi kana ange gi hagalaangona agu muna:
au gu daa dahi daane ma gu magau, i hiidinga dana lagohia au,
go tama daane ne hagammae ina au.
24 Noo e hidu hanonga e sui ange ai
de baubau ne hai ange gi a Cain,
gai e madahidu ma hidu hanonga e sui ange ai
de baubau e hai ange gi Lamek.” *Mat 18.22
Seth ma Enos
25 Gai Adam ne ahe ange ga hagahebaa ma dono bodu, gai de hine laa gu haanau dahi dama daane ga hagaingoo ange ia go Seth,Seth e dagu bei de muna Hebrew gu hagamodu. i hiidinga ia ne hagadaba, “De Maadua gu gaamai gi de au dahi dama e sui ai Abel, go hiidinga a Cain gu daa ia ma gu magau.” 26 Gai a Seth ga hagadili hogi dahi dama daane, gai ia ga hagaingoo ange ia go Enos. Gai deenei de masavaa a dangada ne daamada ai de hagahi ange de ingoo go Iahweh.

*4:1 Cain e dagu bei de muna Hebrew au gu kave.

*4:4 Heb 11.4

4:8 Gidaau ga hulo gi tuu malaelae: muna nei e dee daakodo i lo te Beebaa Hebrew, gai go lo te Beebaa Greek iai.

*4:8 Mat 23.35; Luke 11.51; 1 Jn 3.12

*4:10 Heb 12.24

*4:24 Mat 18.22

4:25 Seth e dagu bei de muna Hebrew gu hagamodu.