2
1 Hai ange gi oodou daina daane, “Goodou go ogu dangada,” gai hai ange gi oodou daina haahine, “Goodou gu kave de lodo aloha.”
De hagaduasala ma de hagaahe mai o Israel
2 “Hagaseegina doodou dinana, hagaseegina ia,
go hiidinga ia e dee go dogu bodu,
gai au e dee go dono bodu.
Ia gi dugua gee ana dahulinga hai be se manu,
aama ana hegau dagodo haisala.
3 Au kana hagaui ono malo gi gilisau ai ia
bei de laangi oona ne haanau ai laa,
ma de hai ia gi bei dagodo o de vao,
ma de mommee e deai vai iai,
aama de daa ia gi magau i dono hieunu.
4 Au e dee lodo aloha ange naa hogi gi ana dama,
go hiidinga gilaadeu ni dama ne hagadili i de dagodo haisala.
5 Delaadeu dinana se hine hai be se manu,
de hine ne hanaua gilaadeu e hagadookaa ana dahulinga.
Ia ne hagadaba, ‘Au ga hano nei e ssala ogu dau soa,
e gaamai laa agu gai ma vai e unu,
ma agu wool ma flax, ma agu lolo aama agu mee e unu.’
6 Deenei ai, au e pono naa dono haiava i denga manu daladala,
ma de buibui ia gi dee gidee ai e ia dono haiava.
7 Ia e doolohi saele naa ono dau soa, aagai e dee daea e ia gilaadeu;
ia e ssala naa gilaadeu, aagai e dee gi gidee.
Gai ia e hagadaba naa, ‘Au ga ahe nei
e hano gi daho dogu bodu i mua,
go hiidinga au e kii ange dogu danuaa i de masavaa laa.’
8 Gai ia tee iloo donu bolo go au ne gaavange laa
ana hua grain, ma ana uvaini aama ana lolo,
go au ne hagadanuaa ina ia i selevaa ma goolo,
alaadeu ne gaavange laa gi Baal.
9 Deenei ai, au e kave gee naa agu hua grain i de masavaa e maatua ai,
ma agu uvaini i de masavaa gu hagailonga ange laa;
au e kave gee naa hogi agu wool ma agu flax,
ne hakahu ai laa ia gi dee gilisau.
10 Iainei gai au ga hagaui nei gi deai ono malo
gi dogaa ai ia i ono dau soa,
gai e deai naa donu e maua i de hagaola ia mai i de au.
11 Au e tuu naa gi dee hai ana daonga alodahi:
go ana daonga gu hagailonga, ma ana daonga i de duu de maasina i dai,
ma laangi o Sabbath, aama ana daonga alodahi gu hagailonga.
12 Au e sele iho naa ana grapevine ma ana fig
go mee aana e hagadaba laa
bolo go dono hagaoanga mai i daho ono dau soa.
Au e hai naa mommee laa gi se lodo henua,
gai denga manu lodo henua e gai naa mee iai.
13 Au e hagaduasala naa ia i hiidinga laangi
aana nogo dudu ai mee maanongi ange gi denga Baal;
ia ne hagalaagii ia i denga buulei ma hadu hagamogomogo,
ga doolohi saele ai ono dau soa,
aagai ia gu ngalo donu au,
go Tagi Maolunga e hagadaba.
14 Deenei ai, tilo, au e hagaaneane naa ia,
ga kave ia gi de vao
ga basa maamaane ange gi de ia.
15 Gai au e gaavange naa gi de ia hanu veelengaa grape i kilaa,
ga hai de geelonga o Achor*Achor i muna Hebrew e bei go de hai ngadaa.
gi se haitoga ange gi de tali hagalodolodo.
Gai ia e daahili naa bei dono daahili i de masavaa oona e damaa hine ai,
aama de masavaa oona ne sao mai ai i Egypt.*Josh 7.24-26
16 De laangi laa, go Tagi Maolunga e hagadaba,
gai koe e hagahi mai naa ‘Dogu bodu’ gi de au,
koe gu dee hai mai ‘Dogu Baal’.†dogu Baal, aabe go dogu dangada aamua.
17 Au e hai naa ia gi dee dagudagu ina ingoo o denga Baal,
gai gi dee ahe ange ia gi manadua olaadeu ingoo.
18 De laangi laa, gai au e hai naa dahi hagatoo donu hagaheloongoi ange gi gilaadeu
madali denga manu dolodolo o lodo henua ma manu llele,
ma manu e tolo i honga de gelegele.
Au e hai naa gi deai mee hholu,
ma gadilaasa, ma hebagi i honga de henua,
gai dangada alodahi e nnoho paba ma tee maatagu.
19 Gai au e hai naa goe go dogu bodu ga hano ai;
Au e hai naa goe go dogu bodu i de heohi, ma de hagamodu heohi,
ma de abodonu aama de lodo aloha.
20 Au e hai bodu adu naa gi de goe i de muna abodonu,
gai koe e iloo naa bolo go au donu go Iahweh.
21 De laangi laa, gai au e basa ange naa,
go Tagi Maolunga e hagadaba,
au e basa ange naa gi de langi,
gai de langi e hai naa ga pala iho de langi gi honga de henua;
22 gai de henua e basa ange naa gi denga grain
ma denga uvaini hoou aama lolo,
gai gilaadeu e pasa ange naa gi Jezreel,‡Jezreel i muna Hebrew e bei go de Maadua e doo.
23 gai au e doo naa ia e hai ai dagu manu i de henua.
Au e lodo aloha ange naa gi Lo-Ruhamah,§Lo-Ruhamah i muna Hebrew e bei e dee lodo aloha ange.
gai au e hai ange naa gi Lo-Ammi,*Lo-Ammi i muna Hebrew e bei e dee se huaadangada niiogu.
‘Goodou go ogu dangada’;
gai ia e hai mai naa gi de au,
‘Go koe dogu Maadua.’ ” *Rom 9.25; 1 Pe 2.10
*2:15 Achor i muna Hebrew e bei go de hai ngadaa.
*2:15 Josh 7.24-26
†2:16 dogu Baal, aabe go dogu dangada aamua.
‡2:22 Jezreel i muna Hebrew e bei go de Maadua e doo.
§2:23 Lo-Ruhamah i muna Hebrew e bei e dee lodo aloha ange.
*2:23 Lo-Ammi i muna Hebrew e bei e dee se huaadangada niiogu.
*2:23 Rom 9.25; 1 Pe 2.10