4
De hagabaubau ina o Israel
1 De gau Israel, nnoho mai hagalaangona muna a Tagi Maolunga;
go hiidinga Tagi Maolunga e dahi ana mee
e hai baasi ange ai gi dangada e nnoho i de henua.
Gu deai dangada e hai hegau i de mee abodonu, aabe se aloha,
gai dangada i honga de henua gu dee iloo de Maadua.
2 Gilaadeu e hagatoo donu i de hagasenga,
e hadu muna, ma de daa gi maakau dangada, e gaiaa ma de dagodo haisala.
Gilaadeu gu oha hainga alodahi,
ma de duudagi de daa ga maakau dangada.
3 Deenei ai, de henua gu ngadi dagodo,
gai alodahi e nnoho i kilaa gu deai olaadeu mahi,
denga manu dolodolo o lodo henua ma manu llele
ma mamu i lausedi gu maakau.
4 Aagai gi deai se dangada e hagadau hebagi,
gai gi deai dangada e hagadau hagabaubau
i olaadeu magavaa,
tangada haimeedabu, go koe aagu e hagabaubau.
5 Goodou e baakuu i de laangi ma de boo,
gai denga pelaabisi e baakuu hogi madali goodou.
Gai au e oha naa doo dinana.
6 Ogu dangada gu maakau i hiidinga teai selaadeu iloo mee.
Go hiidinga koe ne tili de iloo mee,
au e tili gee naa hogi goe
i tuulanga o dogu dangada haimeedabu;
go hiidinga koe tee anga ange gi hainga a doo Maadua,
au e dee anga ange naa hogi au dama.
7 Gu kii ange de soa de gau haimeedabu,
gai gu kii ange hogi delaadeu haisala mai gi de au;
au e hai naa delaadeu mahamaha gi se dookaa.
8 Gilaadeu e gaimee i mee e maua i haisala o ogu dangada,
ma de llodo i alaadeu hegau baubau.
9 Dangada ma de gau haimeedabu gu dagodo daudahi donu huu;
au e hagaduasala naa gilaadeu i hiidinga o alaadeu hegau,
ma de hagao ange alaadeu hegau baubau.
10 Gilaadeu e gaimee naa
aagai e dee maua gi boobosu;
gilaadeu e hai be se manu naa,
aagai e dee maua i de hagadili;
go hiidinga gilaadeu gu daahuli gee i Tagi Maolunga
gai ga dugu ange gilaadeu 11 gi de hai be se manu,
ma denga uvaini duai ma uvaini hoou,
e haia laa ga dee tonu ange 12 o ogu dangada.
Gilaadeu e ssili ange naa gi dahi diinonga laagau,
gai go dahi bido laagau e basa ange.
Gai de hagasaalunga o de hai be se manu gu dagi gee gilaadeu;
gilaadeu gu dee hai hegau ange gi delaadeu Maadua i de mee abodonu.
13 Gilaadeu e hai alaadeu sigidaumaha i ulu mounga,
ma de dudu alaadeu sigidaumaha i honga duuduu,
ma lalo denga oak, ma poplar aama terebinth,
go de mommee e lilo danuaa.
Deelaa ai, oodou damaa hine gu hai ma gu ni haahine hai be ni manu,
gai oodou saulaba gu dagodo haisala.
14 Au e dee hagaduasala naa donu oodou damaa hine
i delaadeu hai be ni manu;
aabe hagaduasala oodou saulaba
i delaadeu dagodo haisala,
go hiidinga denga daane e hulo hogi
gi daho denga haahine hai be ni manu,
ma de hai alaadeu sigidaumaha
madali denga haahine hai be ni manu;
de huaadangada e dee hai laa gi tonu ange
e hagaduasala naa donu.
15 Israel, e dee galemu donu doo dagodo haisala,
gai Judah gi dee dagodo haisala bei oo dagodo.
Goodou aude hulo gi Gilgal, be go Beth Aven.*Beth Aven i muna Hebrew e bei go de hale o de baubau. Beth Aven i muna Hebrew e hagasengasenga ange gi Bethel, e bei go hale o de Maadua.
Gai gi dee hagatoo donu gi hagataba,
“Au e hagatoo donu i de mouli o Tagi Maolunga.”
16 De gau Israel e hagamakaga olaadeu lodo,
bei dagodo o de kaau hahine;
gai e maua ai naa e Tagi Maolunga i de hagaloosi gilaadeu
bei denga ssiibi i de mommee laumalie iai helii?
17 Ephraim gu hagabuni ange gi denga diinonga,
dugua donu huu ia.
18 De masavaa naa huu e odi ai alaadeu mee unu,
gai gilaadeu ga hai denga dahulinga dagodo haisala;
olaadeu dagi e malangilangi hogi
i denga dahulinga hagadookaa.
19 De madangi gu haoli gilaadeu i luoono bakau,
gilaadeu e dookaa naa i hiidinga o alaadeu sigidaumaha.
*4:15 Beth Aven i muna Hebrew e bei go de hale o de baubau. Beth Aven i muna Hebrew e hagasengasenga ange gi Bethel, e bei go hale o de Maadua.