1 De gau haimeedabu, nnoho mai hagalaangona muna nei!

Dangada o Israel, goodou nnoho mai hagalaangona!

Huaabodu o denga hodooligi, nnoho mai hagalaangona!

De hagaduasala nei e hai adu donu gi goodou;

go hiidinga goodou ne hagasengalia i Mizpah,

gai dahi sele gu doha i honga de mounga go Tabor.

2 Gilaadeu e hai dahi geelonga gelo i Shittim;

gai au e haele naa gilaadeu alodahi.

3 Au e iloo dagodo o Ephraim,

gai dagodo o Israel e dee maua i de hagammuni i de au.

Ephraim, koe gu hai hegau bei de hine hai be se manu,

gai Israel gu dee gilimalali.

4 Alaadeu hegau hakino gee gu daohi gilaadeu

gi dee aahe mai gi delaadeu Maadua.

Go hiidinga gilaadeu e llodo mmao i de hai be se manu,

gai gilaadeu gu dee iloo Tagi Maolunga.

5 De hagamaolunga o Israel gu hagabaubau donu huu gilaadeu;

Dangada o Israel ma Ephraim gu baakuu i lodo olaau haisala;

Judah gu baakuu hogi madali gilaadeu.

6 Gilaadeu e kave naa alaadeu hagabuulingaa ssiibi ma kaau

ga hulo ai e ssala Tagi Maolunga,

aagai gilaadeu e dee gidee naa donu ia;

ia gu hano gee mai i olaadeu daha.

7 Gilaadeu tee hai hegau ange gi Tagi Maolunga i de muna abodonu;

gilaadeu ne hagadili denga dama gaiaa.

Gai taonga i de duu de maasina i dai,

e oha naa gilaadeu ma alaadeu veelenga.

8 Ilihia de hanga manu i Gibeah,

gai ilihia de trumpet i Ramah.

Hagailoo ina de masavaa o de hebagi i Beth Aven;

denga daane hebagi o Benjamin, go goodou e dagi!*Hos 4.15

9 Ephraim e hai naa ga se mommee ngadi dagodo

i de laangi o de hagaduasala.

Au e hagailoo naa mee gu hagamodu e hai

ange gi denga aamuli o Israel.

10 Denga dagi o Judah e bei dangada

e uea laa goinga o dangada.

Au e hagaduasala naa gilaadeu

i dogu bole bei dagodo o tolona.

11 Ephraim gu hagahai ngadaa ina,

ma de maoha i de hagaduasala,

ia gu hagammahi e daudali i denga diinonga.

12 Au e bei dagodo o dahi lengisi i daho Ephraim,

gai e bei de mee bobo i daho dangada o Judah.

13 Gai de masavaa a Ephraim ne gidee ai dono magi,

gai Judah ne gidee hogi dono maanuga,

gai Ephraim ne hano gi Assyria e ssala ai dahi bale,

ia ne hai hanu gi hulo gi de hodooligi maolunga laa.

Aagai ia tee maua i de hagaieiangi ia,

aabe go de hai gi mmahu ono maanuga.

14 Au e hebagi ange naa gi Ephraim bei dahi laiono,

gai e hebagi ange gi Judah bei dahi laiono mmahi.

Au e hagalagolagohia naa gilaadeu ga tili gilaadeu gai au ga hano.

Au e kave gee naa gilaadeu,

gai e deai donu e maua i de hagaola gilaadeu.

15 Gai au e ahe naa gi dogu mommee,

ga dae ai gi delaadeu tala olaadeu haisala.

Gai gilaadeu ga ssala ai au i delaadeu duasala.