1 De masavaa o Ephraim ne basa ai, gai dangada gu maatagu;

gai ia ne hagaamua ina i Israel.

Aagai ia ne haisala i dono daumaha ange gi Baal, gai ia gu magau.

2 Gai iainei gilaadeu gu dee modu de haisala:

gilaadeu e hai olaadeu diinonga baalanga,

gilaadeu e labagau i de hai olaadeu diinonga selevaa.

Gai dangada gu hagataba i olaadeu dagodo,

“Gilaadeu e hai sigidaumaha i dangada

ma de oso denga kaau gauligi.”

3 Deelaa ai, gilaadeu e bei naa de mama o de maluulu i taiao,

be go ssuungia o taiao e moolau laa teai,

ma gili o denga grain i de mommee hili huamanu e ilihia laa ga dee maaleva,

ma de useahi e hanage laa i tua de hale.

4 Aagai go au donu go Iahweh doo Maadua

mai loo i de henua go Egypt.

Gai e deai ange donu soo Maadua, go au donu huu;

e deai ange hogi soo Ia Hagaola, go au donu huu.

5 Go au ne diiloo adu goe i de vao,

go de henua e deai vai iai.*Deut 8.11-17

6 De masavaa aagu ne haangai ai gilaadeu,

gai gilaadeu ne boobosu danuaa;

de masavaa olaadeu ne boobosu ai,

gai gilaadeu gu hagamaolunga; gilaadeu gu ngalo donu au.

7 Deelaa ai, au e hebagi ange naa gi gilaadeu

bei dagodo o de laiono,

au e dagitilo naa gilaadeu i gaogao de haiava

bei dagodo o dahi leopard.

8 Au e lele ange naa ga gadigadi gilaadeu

bei hegau a de bea gu gaavee laa ana dama.

Au e gai naa gilaadeu bei hegau a de laiono;

gai dahi manu alasala e hangahanga naa gilaadeu.

9 Israel, au e oha naa goe;

gai goai naa donu e maua i de bale adu goe?

10 I hee iai doo hodooligi, gai ia ga hagaola ai goe?

I hee ai oo dagi i lodo oo aduhale alodahi,

go gilaadeu aau ne hai mai laa,

“Gaamai gi de au dahi hodooligi ma hanu dagi o de henua”?*1 Sa 8.5-6

11 Gai au ne gaavadu gi goodou dahi hodooligi i dogu lili,

au ne kave gee hogi ia i dogu bole.*1 Sa 10.17-24; 15.26

12 Baubau o Ephraim gu hagabudu,

gai ono haisala gu sisi ma gu daohi.

13 De mmae o de hine gu dai haanau gu tae mai gi Ephraim,

aagai ia se dama e deai sono heiangi;

de masavaa oona e haanau ai,

aagai ia e dee doo mai i de haonga o de mommee o denga dama.

14 Au e hagao mai naa gilaadeu i ssauaa o taanunga;

au e hagaola mai naa gilaadeu i de magau.

De magau, i hee iai au mee hagamaakau?

Taanunga, i hee iai doo sauaa e daa ai gi maakau?*1 Co 15.55

Au e dee lodo aloha naa donu,

15 e dee galemu donu dono hagadagadaga age

i magavaa o ono daina.

Gai de madangi i dua mai i daho Tagi Maolunga

e ssau mai naa i de vao;

ono vai e deai naa vai iai,

gai ono vai geli e maamasa naa.

Goloa hagamogomogo alodahi

i lodo ono mommee doange e gaiaadia naa.

16 Dangada o Samaria e hagaduasala donu i hiidinga olaadeu haisala,

go hiidinga gilaadeu ne hai baasi ange gi delaadeu Maadua.

Gilaadeu e daa naa ga maakau i de gadilaasa;

alaadeu gauligi e dagadagahia naa gi lo te gelegele,

alaadeu haahine hai tama e hangahanga ina naa olaadeu dinae.