1 Ephraim e gai de madangi,

ma de doolohi de madangi mai i dua i taiao ga boo ai.

Gilaadeu e dee modu de hadu muna ma de vaivai hai dangada;

gilaadeu e hai dahi hagatoo donu hagaheloongoi madali Assyria,

ma de kave denga lolo gi Egypt.

2 Tagi Maolunga e dahi ana mee e hagabaubau ai Judah,

ia e hagaduasala naa Jacob gi bei dagodo o ana haingaa mee,

ma de hagao ange ia gi bei dagodo o ana hegau.

3 Ia ne poo de gubu vae o dono daina daane

i de masavaa oona i lo te dinae ai o dono dinana,

gai ia ne hebagi ange gi de Maadua

i de masavaa oona ne madua ai.*Gen 25.26; 28.10-22; 32.24-26

4 Ia ne hai baasi ange gi tangada de langi,

ia ne dangi ma de dangidangi ange i dana hagamanuuia.

Ia ne gidee de Maadua i Bethel,

gai de Maadua ne basa ange gi de ia —

5 Tagi Maolunga, de Maadua o denga hagabuulinga hebagi,

gai dono ingoo hagamaanadu go Iahweh!

6 Deenei ai, koe gi aahe mai gi doo Maadua;

hai hegau i de abodonu ma de hagamodu heohi,

ma de tali hagalodolodo ange gi doo Maadua i masavaa alodahi.

7 Tangada hagao mee e hai hegau i de mee hagahidi hagasenga,

e lodo i de vaivai hai dangada.

8 Ephraim e hagadaba, “Au gu kona mmao dogu lava,

au gu lagolago mmao ogu goloa.

Gai gilaadeu e dee gidee naa donu

dahi baubau daudahi aabe se haisala i agu hegau.”

9 Go au donu go Iahweh doo Maadua

ne hagassao ina mai goe i de henua go Egypt.

Au e ahe ange naa e hai goe gi nnoho i lodo hale malo

bei laangi o denga daonga gu hagailonga laa.*Lev 23.42-43

10 Au ne basa ange gi denga pelaabisi,

ga gaavange gi gilaadeu denga midi hagaago ange lagolago,

ma de hai gilaadeu gi daalaa denga mee hagasengasenga.

11 E aha, e dee dagodo de baubau i Gilead?

Ono dangada gu deai olaadeu haigamaiana!

E aha, gilaadeu e dee hai ssigidaumaha o denga kaau i Gilgal?

Olaadeu mommee o ssigidaumaha e bei naa denga hagabuudungaa hadu

i lodo veelenga gu hagabalabala laa.

12 Jacob ne savini ga hano gi de henua go Syria;

Israel ne hai hegau gi maua ai dono bodu,

ma de hagaloosi denga ssiibi e hagao ai dono bodu.

13 Tagi Maolunga ne hai dahi pelaabisi

gi dagina mai de gau Israel i Egypt,

ma de hagaloosi gilaadeu i daho de pelaabisi laa.*Exo 12.50-51

14 Aagai Ephraim ne hai ga kona dono lili;

gai dono Ia Aamua e hagabaubau naa ia

dana daa dangada ga maakau,

ma de hagao ange ia i dana hagangadi mee dono Ia Aamua.