1 “De masavaa o Israel e gauligi ai, gai au ne aloha i de ia;

au ne hagahi dagu dama ga hagasao mai ia i Egypt.*Exo 4.22; Mat 2.15

2 Aagai ga dee modu huu dagu hagaagahi gilaadeu,

gai gu kii ange donu delaadeu hulo ga hagammao gee i de au.

Gilaadeu ne sigidaumaha ange gi denga Baal,

ma de dudu mee maanongi ange gi denga diinonga.

3 Gai go au ne agoagona ange Ephraim gi seesee,

go au ne boogia olaadeu lima;

aagai gilaadeu tee iloo donu

bolo go au ne hagaieiangi ina gilaadeu.

4 Au ne dagi gilaadeu i de abodonu

ma de lodo aloha ange gi gilaadeu.

Au ne aau de laagau hagahai hegau i honga olaadeu ua,

ma de ino iho ga haangai ange gilaadeu.

5 E aha, gilaadeu e dee aahe naa gi Egypt,

gai Assyria e dee dagi naa gilaadeu,

i hiidinga delaadeu dee llodo e daahuli olaadeu lodo?

6 De gadilaasa e hano naa laa lodo olaadeu aduhale,

ga oha mee hagamakaga o denga haitoga,

ma de hai gi dee ssula alaadeu hagatau.

7 Ogu dangada e nnoho huu e daahuli gee i de au,

gai ga hagahia naa donu e gilaadeu de Ia Maolunga Mmao laa,

aagai ia e dee hagahiihidi age donu gilaadeu.

8 Ephraim, e maua e au i de tili goe?

Israel, e maua e au i de dugu goe gi hano?

E maua e au i de hai goe bei dagodo o Admah?

E maua e au i de hai goe bei dagodo o Zeboiim?

Ogu lodo gu dee baba mmao,

au gu dee maua i de golomagi dogu lodo aloha.*Deut 29.23

9 Au e dee hagasula naa donu i dogu lili,

aabe e huli ange ga oha Ephraim.

Go hiidinga au go de Maadua, au e dee se dangada,

go de Ia Dabu e noho laa i oodou magavaa.

Au e dee hanadu naa donu ma dogu bole.

10 Gilaadeu e daudali ange naa i Tagi Maolunga,

ia e oo naa bei de laiono e goo laa;

uaa, ia e oo naa bei de laiono e goo laa,

gai ono dangada e bolebole naa ga loomai ai i dai.

11 Gilaadeu e bolebole naa ga loomai ai

bei denga manu llele mai i Egypt

ma denga manu kono mai i de henua go Assyria.

Gai au e hagaahe mai naa gilaadeu gi delaadeu mommee,”

12 Ephraim gu duuli au i denga muna hhadu,

de gau Israel gu daahanga mai au;

gai a Judah goi hai baasi ange huu gi de Maadua,

de Ia Dabu e hai hegau laa i de mee abodonu.