10
1 Israel e bei dagodo o dahi grapevine lau kohu,
gu loage laa ono hua.
Gai ga hagadaga ange huu de lagolago ono hua
gai ia ga hagaduu gu kii ange de lagolago ono mommee o ssigidaumaha.
Gai ga hagadagadaga age huu dono lava,
gai ia ne hagalaagii ono duludulu hadu dabu.
2 Gilaadeu gu llodo lagolago,
gai gilaadeu e hagaduasala naa donu i hiidinga olaadeu baubau.
Tagi Maolunga e oha naa olaadeu mommee o ssigidaumaha,
ma duludulu o olaadeu diinonga.
3 Gai gilaadeu e hagataba naa: “Gimaadeu e deai donu semaadeu hodooligi,
go hiidinga gimaadeu tee maatagu i Tagi Maolunga.
Aagai ga dahi naa donu omaadeu hodooligi,
gai ni aha naa aana e hai mai gi gimaadeu?”
4 Gilaadeu e tala hanu ngadi muna,
ma de hai denga ngadi hagatoo donu hagaheloongoi;
deelaa ai, de hagaduasala gu sula age
bei dagodo o denga helii hagammau
e ssomo age laa i de mommee gu hagabalabala.
5 Dangada e nnoho i Samaria gu maatagu
i hiidinga o dahi ⌊diinonga e hagadulagi ange laa gi de⌋ kaau i Beth Aven.*Beth Aven i muna Hebrew e bei go de hale o de baubau. Gai e hagasengasenga ange gi Bethel, e bei go hale o de Maadua.
Dono huaadangada e tangi naa i hiidinga o delaadeu diinonga,
ono dangada haimeedabu e tangi naa hogi,
aama dangada ne malangilangi i de mahamaha o tiinonga laa,
go hiidinga gu gaavee gee mai i olaadeu daha.*Hos 4.15
6 Tiinonga laa e gaavee naa gi Assyria,
ga gaavange gi de hodooligi maolunga laa.
Ephraim e dogaa naa,
Israel e dogaa naa hogi i dono diinonga.
7 Samaria ma dono hodooligi e daahea naa
bei de laa manu damaa mee i honga denga vai.
8 Denga mommee daumaha o Aven†Aven e bei go Beth Aven, diiloo hogi de gubu e 5. e oha naa,
go de mommee o Israel ne haisala ai.
Manu daladala ma manu duiduia e ssomo age naa
i honga olaadeu mommee o ssigidaumaha.
Gai gilaadeu e hai ange naa gi denga mounga, “Haolia gimaadeu!”
gai e hai ange naa gi denga duuduu, “Baakuu mai haolia gimaadeu!” *Luke 23.30; Rev 6.16
9 De gau Israel, goodou ne haisala mai huu i de masavaa o Gibeah,
gai gilaadeu goi duudagi donu huu de haisala.
E aha, e dee dae mai naa de hebagi ga hagaduasala gilaadeu i Gibeah?*Jdg 19.1-30
10 De masavaa naa huu oogu e lodo ai, gai au e hagaduasala naa gilaadeu;
denga huaahenua e hagabuni naa ga hebagi ange gi gilaadeu
ga noonooa gilaadeu i hiidinga olaadeu haisala gu lagolago.
11 Ephraim e bei de kaau gu agoagona laa,
ia e malangilangi i de duuduu grain;
gai au e hagauda ange naa gi honga dono ua mahamaha laa
de laagau hagahai hegau.
Au e hai naa Ephraim gi daangia de laagau hagahai hegau,
Judah gi hagabalabala ina de gelegele,
gai Jacob gi oohaa age de gelegele.
12 Goodou dooa ange de heohi gi oodou lodo,
gai goodou ga hagihagi ai hua o de abodonu;
hagabalabala ina de gelegele makaga i oodou lodo,
go hiidinga gu dae mai de masavaa
oodou e ssala ai Tagi Maolunga,
ga dae ai gi dono humai
ga hai gi hano iho de heohi gi oodou elunga.*Jer 4.3
13 Goodou ne doo de baubau,
gai goodou gu hagihagi hua o de baubau,
goodou ne gai hogi hua o de hadu muna.
Gai go hiidinga goodou ne kai ange gi oodou mahi donu
ma oodou daane hebagi soa,
14 deenei ai, de hagalongaa o de hebagi e dae mai naa gi oo dangada,
gai oo mommee buibui makaga alodahi e oha naa —
bei de hai a Shalman ne oha ai laa Beth Arbel
i de masavaa o de hebagi,
ma de masavaa o denga dinana ma alaadeu dama
ne dagadagahia ai gi lo te gelegele.
15 Bethel, mee nei e hai adu naa gi de goe,
go hiidinga de kona de lagolago oodou baubau.
De hodooligi o Israel e daia naa ga magau
i de dae mai de laangi laa.